مدونة جدع بلا جاه: أنا والثورة على أخويا

أنا والثورة الحق على أخويا حتى يعرف اخويا ان الثورة لينا احنا الاتنين وانا بكدة بنصر أخويا لان الثورة هتعمله حريه وكرامة وعدل فنصرت اخى وهو ظالم لنفسه. وعلشان بس عارف الفلاليط هيقولوا أنصر اخاك ظالم أو مظلوما أحب اقولهم انصر أخاك ظالماً أو مظلوماً، فقال: رجل يا رسول الله صلى الله عليه وسلم أنصره إذ كان مظلوماً، أفرأيت إذا كان ظالماً كيف أنصره؟! قال: تحجزه أو تمنعه من الظلم، فإن ذلك نصره.
اتمنى يكون المعنى واضح منعا للجدال وخلاص لان عندنا ترزية احاديث ماشاء الله عليهم , المهم

فى جمعة النصب على الثورة من الاخوان والخلاف العائلى بين العسكور وجماعته , الاخوان نازلين يحموا ثورة احتفلوا بنجاحها وتحقيق أهدافها !!!

الاخوان فى المليونية بتاعتهم بيفكرونى بواحد حرامى سرق شنطة بعدين اتسرقت منه قام راح يبلغ عنها

مازلت اتعجب ...
الى الان .. ومنذ حكم الاخوان .. جميع قرارتهم خاطئه فلماذا العناد اذا .كان بعضنا يتصور انهم اكثر خبرة واكثر ذكاء واكثرة احتكاك بالحياة السياسة واتضح فيما بعد ان .. كل قرارات مكتب الارشاد خاطئة وان رؤيه و ذكاء شباب 6 ابريل اكثر حنكه ودهاء منهم فمن يستحق البرلمان اذا, وأنا لست فى موضع حكم على أحد ولكن الافعال هى التى تحكم على الرجال وليست الأقوال المرصعة بالعسل المدسوس بداخله السم

هل ممكن حد يصدق الاخوان تانى؟ طيب كانوا فين فى محمد محمود وقالوا علينا بلطجية ومخربين وعجلة الانتاج , طيب كانوا فين فى ماسبيروا ولما الجثث اترمت فى النيل وفى الصحرا بعد ماندهست , طيب كانوا فين فى مجلس الوزرا , كانوا فين لما عروا البنت المسحولة بكلامهم , كانوا فين من مذبحة بور سعيد , أوك فيه ناس بتقول ننسى اللى فات وانا واخويا على ابن عمى وكلام عاطفى مينفعش فى الثورات ولا الحقوق والمفروض انا والثائر على الحق حتى لو كان على اخويا نفسه مش على ابن عمى بس

لكن أوك ممكن اتغاضى وأحاول أصدق مع انى عن نفسى لا يمكن أصدقهم ولا آآمن لهم لانى قارىء جيد لتاريخهم على مدار ال 80 عام وهى عمر الجماعة , لو علشان اصدقهم واحاول اخد نبذة من الفكرة انهم جاديين حتى ولو واحد فى المليون يعملوا الآتى حتى يثبتوا حسن نواياهم 1/ سحب مرشحيهم من السباق ويكونوا على عهدهم بانهم مش هيكون لهم مرشح رئاسى

2/ يجتمعوا مع القوى الوطنية ويتم الاتفاق على مرشح رئاسى مدنى او مجلس رئاسى مكون من 4 أو خمس أفراد رئيس والباقى مستشاريين بحيث يغطى كافة الاطياف للتصدى للفلول وغيرهم

الاعتذار للثورة والثوار اللى قالو عليهم بلطجية وبياخدوا ترمادول ونزلو هما يطالبوا باللى الثوار بيطالبوا بيه من 14 شهر 3/ العمل بجدية لتفعيل لجنة دستورية مكونة من كافة اطياف الشعب المصرى وينسوا حكاية احنا الاغلبية لان الدستور مش بالاغلبيه الدستور بالمشاركة من جميع مؤسسات الدولة وجميع اطيافها لانه هو رخصة البلد اللى هتمشى بيه على الاقل مائة عام.

وباقى الطلبات تفعل مع كافة القوى الثورية من استرجاع حق الشهداء والعمل على تفعيل قانون الغدر بجدية على كل من افسد الحياة السياسية وباع دم الشهيد لان قانون العزل اللى عملتوه دا غير قانونى اصلا ومش هيفعل لان قانونا بعد موافقة مجلس الشعب بيروح القانون على مجلس العسكر وفى خلال 30 يوم يرد بالموافقة او الرفض على مجلس الشعب وبالتالى هيكون يوم 26 ابريل فات وتكون نزلت اسماء المرشحين وسجل من سجل ورفض من رفض وبالتالى مفيش طعون ودا الدستور اللى انتم قلتم عليه نعم ومازالت نعم بتاعتكم نعانى منها وانتم اول من لسع بنارها .

والميدان لكل المصريين مش لطائفة ولا حزب ولكن المصرين بجد والثوار بجد أتمنى والامنيه صعب تحقيقها وحتى وان مر الجمل من خرم الابره فلن يصدق الاخوان ولكنها مجرد أمنيه ان ترجعوا حقا للصف الثورى دون تعالى على الثوار الحقيقين وعموما كلنا نازلين يوم الجمعة 20 أبريل من اجل مصر فقط اتمنى ان ننسى الجماعة والمرشد وتنزلوا بقناعة ثورية مش أمر مرشد لان الثائر بينزل بقرار ثورى ويخرج من الميدان بتحقيق ثورتة ولكن اللى بينزل بقرار مرشد هيخرج بردو بقرار مرشد
ونصيحتى للجميع أحذروا عمرو موسى واحمد شفيق فهم الاخطر على الساحة بعد الاخوان اذا رجع الاخوان فى حضن الثورة بعد استكمالهم لشروط الرجوع وبرده حرص من صاحبك ولا تخونه وفى حالة الاخوان حرص وخونة حتى تسلم من لدغاته , احذروا اجمد شفيق وعمرو موسى وان لم تجد قانون لاقصاءهم من الانتخابات فيجب اقصاءهم فى الشارع وفى الصندوق مع رقابة دوليه أو على الاقل ثورية على الانتخابات

المهم احنا نازليين للاسباب دى فمن معها اهلا بيه ومصر للجميع
اما موضوع نزولنا الجمعة 20 ابريل عايز تعرف ليه انا نازل،،،حاضرهقولك.

* نازل علشان اطالب بمحاكمة مبارك،اللى يعتبر اول مسجون اشوفه فى العالم يعمل معاملة الملوك،اول مسجون يبقى مقيم فى مستشفى 5 نجوم ،المسجون اللى تطبق عليه شروط السجن فقط فى العلاج الـ 5 نجوم،المسج...ون اللى هيشجع كل الحرامية الكبار انهم يسرقوا، ما هو اللى بيتسجن بيقيم فى شرم يتعالج هناك دلوقتى.

* نازل علشان اطالب بسرعة استرداد الاموال المنهوبة من كل الحرامية اللى فى السجون،الاموال اللى لولا سرقتها ماكنشخيرة شباب البلد سابوها وهجوا برة علشان لقمة العيش.
* نازل علشان اطالب بسرعة محاكمة نزلاء طرة وشرم الشيخ، اللى كل يوم نسمع عن اللى مراته اختفت، اللى معهوش فلوس، ومنهم اللى بيطلع وبياخد افراج كمان.
* نازل علشان اطالب بمحاكة اللى قتل اخواتى، اللى محدش بيجيب سيرتهم من الناس اللى على الساحة دلوقتى غير بالتعويضات.
* نازل علشان اطالب بضبط كل قاتل من 25 يناير،كل قناص من القناصين اللى معروفين بالاسم.
* نازل علشان اطالب بالتحقيق مع كل الضباط اللى قتلوا اخواتنا وسرعة محاكمتهم.
* نازل علشان اطالب بمحاكمة ضباط امن الدولة (الامن الوطنى الحالى) على جرايمهم وتعذيبهم للمعتقلين بدون وجه حق، ولسة لحد دلوقتى بيتعمل لهم حفلات تكريم.
* نازل علشان اطالب بتطهير جهاز الشرطة من القادة الفاسدين اللى فيه، اللى لحد دلوقتى مش قادرين يوفروا الامن والامان فى الشارع المصرى.
* نازل علشان اطالب بالافراج عن المعتقلين اللى اعتقلوا من بداية احداث الثورة، وكل ذنبهم انهم حسوا ان اخيرا يقدروا يتكلموا من غير ما يخربوا ولا يدمروا حاجة.
* نازل علشان تطهير الاعلام ككل، سواء المقروء او المسموع او المرئى علشان الضلال اللى بسببهم الشعب بيخبط فى بعضه.
*********************************************************
لا نازل علشان اخرب ولا اكسر ولا اضر حد، واللى هشوفه بيعمل كده انا بنفسى اللى هوقفوا عند حده....
لا هدمر الاقتصاد ولا هخرب الشوارع
نازل اجيب حقى المنهوب، واللى مش عايز ييجى معايا بقوله خليك، انا هجيبلك حقك، زى ما جبته لغيرك فى 25 يناير

وفى النهاية اتمنى الخير لمصر وثوارها والثورة مستمرة فى كل الظروف وكل الاحوال بأخوان او من غيرهم وطول مافيه شباب لايهمه الا مصر فمصر بخير وولاده ولاد أحرار

الله ..................................الوطن.....................................الثورة

fawzy elrashidy

فلان الفلانى

كلنا أيد واحدة