منتخب الأصابع

ياجدعان فيه أصابع بتلعب فى مصر ، والنعمه قالها الريس ، ولما الريس يقول كلمه تعرفوا إنها مش من فراغ ، بس الريس مقلناش هى بتلعب فى أنه فريق ولا أنه ملعب ، علشان نروح نشجع أصابع بلدنا ، بس المشكله كنا عاوزين نعرف هى أصابع روج ، ولا أصابع محشى ، ولا أصابع زينب ، لأن كده هيبئى منتخب اصابع نسائى ، ولازم معاهم كف يد محرم ، وناخدوا الهىء والمىء وشجع أختك يا ابن بلدى ، ولو اصابع كفته ، ولا أصابع ملبن ، يبئى منتخب أصابع رجالى ، وناخدوا الزمامير وشجع ياجدع ، بس ياريس يكنش الصباعين تلاته دوول اللى تقصدهم صباع مبارك ، وصباع الفنجرى وصباعك ياريس ، وهما دوول التَلت أصابع اللى ببتتوغل وتنتشر وتستمر ، عموما ياريس أنى أرى أصابع خفيه تلعب فى السياسه الداخليه ، ولا بد من قطعها لأنها خطر ع الأمن القومى والمنتخب القومى ، وأولى الأصابع اللى خربت البلد هى اللى بصمت بنعم فى الإستفتاء 19 مارس ، واللى نزلت الانتخابات وقالت مرسى أو شفيق ، فكلاهما واحد ، اللى نزلت قالت نعم لدستور الفته والاستقرار ، وصباع النهضه الكبير أوى ، طيب أيه رأيك فى الأيادى بئى ياكبير اللى بتخرب مصر مش صباع ولا إتنين بيلعبوا ، ماتيجى نشوف الأيادى والأصابع الكامله زى المليشيات ، واللجان الألكترونيه اللى بتنشر إشاعات على أى حد يعارض ، والأيادى اللى بتخطف الشباب الثورى وترجعهم على المشرحه أو فاقدين الوعى ومتشرحيين أحياء وأموات ، ماتيجى نشوف الأصابع اللى نزلت على وش ميرفت موسى ، ماتيجى نشوف الأيادى اللى مش عاوزه تمضى على ورقه لحق الشهيد ولا المصابين ولا المعتقليين ، ماتيجى نشوف الأيادى والأرجل والكروش اللى بتعتصم عند الدستوريه ومدينة الإنتاج الإعلامى ، ماتيجى نشوف الأيادى اللى بتهرب إستثمار مصر والسياحه وبتشترى مصر بأبخث الأتمان ، ماتيجى نشوف الأيادى اللى بتتوغل فى كل مؤسسات البلد ،ماتيجى نشوف البلاعه اللى اتفتحت وخرج منها شيوخ الظلام تشوه فى الإسلام وتكفر كل حد وكلهم طالعين من السجون دكاترة ومليونيرات ، ماتيجى نشوف الأيادى اللى سرقت حلم الشباب والثورة ، ولا إنت ياريس واخد بالك من الأصابع ومش شايف الأيادى ، بس احب أقولك ياكبير الأهل والعشيره ، الثوار هى اللى هتقطع الأيادى دى كلها وخليك أنت مع الأصابع وإلعبوا سوا ومتنساش تديها قلادات نيل الله يكرمك ، وفى النهايه وبعد حكايه مصر لم تركع وطلعت ناسيه  100 ركعه ، ودخولنا فى مرحله الأصابع اللى بتلعب ، أحب أقول لكل الثوار فقط إن مصر بتلعب فيها وبيها جماعه مش  مجرد أصابع ، إنتهى 

fawzy elrashidy   

          

فراق لا إفتراق( وداعــا ) د / محمد يسرى سلامه

جدع بلا جاه مرسَى الهموم قلبو دايما يقول الآه والذنب  مش ذنبو ، إنه الإنسان المسلم الذى عشقه المسيحى والمسلم  لما لاقوا فيه من آداب الإسلام وآخلاقياته ، وإحترام النفس والآدميه وقول الحق ولا يخشى فيها لومة لائم ، إنه دكتور محمد يسرى سلامه.

والله إن القلم ليحزن وهو يكتب عن وفاته ، وإن العين لتدمع وتخط بحبر نزيفها الكلمات التى تقر له حزنا و ألماً ، إنه الثورى المصرى الحق الذى أحب الوطن فأحبه الوطن ، إنه طبيب الأسنان ، والمتحدث السابق بإسم حزب النور السلفى والذى تركه يوم 18 أغسطس 2011 ، وكان من أبرز مؤسسى حزب الدستور، إنه دكتور محمد يسرى سلامه الذى ولِد فى الاسكندريه 1 أكتوبر 1974 ورحل عن ثورتنا ومصرنا وعالمنا يوم 24 مارس 2013 ، لقد رحل الرجل عن عن عمر يناهز ال 39 عاما ، ولكنه ترك فينا أثراً جميلا يحيا به آلاف السنين ، فليس كل من مات غاب ، وليس كل من هو حى موجود ، فكم من أحياء تراهم أموات ، وكم من أموت تراهم أحياء ، إن هذا الرجل المسلم الحق والثورى الحق والمصرى الحق ، ليس كباقى الناس ممن ينتمون لنفس الفكر لانهم ببساطه ينتمون  فى المظهر فقط ولا ينتمون فى العقل والتفكير ، فدائما كان يرى الناس فيه المسلم الحق لا المتاسلم المسىء للاسلام ، دائما كان عاليا وحتى ان ارادوا النيل منه لابد من رفع رؤوسهم لأعلى لأنه كالبدر المنير فكرا وخلقا ولابد حتى تراه أن ترفع له رأسك للأعلى ، بينما نار ودخان اعداءه ومشوهيه كالدخان لابد ان يرتفع كى تراهم ،

وسأختم كلمتى بمقولته الرائعه التى اتذكرها دائما ،إن النمو ر لاتمشي في قطيع، تمشي فرادا والواحد منهم كفيل بقطيع كامل خصوصا إن فقدوا سيدهم، فلا تصدقهم ان حاولوا اقناعك ان كثرة الغنم تغلب الشجاعة.

إنه سماء من الأخلاق والثورة والوطنيه تمناها الجميع حتى أمطرت عيوننا دموع فراق لا افتراق ، فوداعا أيها الثائر المصرى  دكتور محمد يسرى سلامه رحمة من الله عليك وسلاما .
fawzy elrashidy

الذكرى السنوية للاستحمار

الذكرى السنوية للاستحمار

ذكري استفتاء 19 مارس اول ضربه للثورة وصور الصوابع والابتسامات البلهاء ونعم للاستقرار وللاستحمار والمادة التانية, وكل استكراد وانتو بخير
تلك الذكرى كانت هى اولى استحمار الشعب بقيادة عسكرية ومحلل شرعى للفساد وهم الجماعات المتآسلمة وكل من قال نعم فى ذاك اليوم وماهو الا بيوم نكسة على الثورة المصرية ..هم نفسم من يقولون نعم للعسكر ...نعم لاخفاء الحقائق ...نعم عن العفو عن القتلة ودفع الدية مع العلم ان الدية للقتل الخطأ...نعم لاستكمال المحاكمات الهزلية ...نعم لاجهاض الثورة
وكانت بداية لانقسام الشعب وفتنة طائفية ليست بين مسلم ومسيحى فقط بل اصبحت بين مسلم ومسلم اخوانى أو سلفى ..

كان هو اليوم الأول لضياع الثورة وبداية صفقة على دم الشهداء ..
خلاص مدعي التدين والاخوان والوطنى حطوا ايدهم، وقدروا يغسلوا مخ الناس خلاص ... شايفيين بجاحتهم وخططهم !!
احنا نهاجر بقى ...، كلهم كانوا زى كل المصريين، لأن الثورة كانت ثورة مصريين مش ثورة فئات او طوائف ... ازاى بقى دلوقتى قدروا يعملوا كده ويفرقوا الناس، ويوظفوا الدين لحسابهم .. ايه القلب ده؟؟ وايه بجاحة الحزب الوطنى الاخوانى دا؟
كانت بداية خسارة للثورة ..
وعلى رأى الدكتورالاسوانى: "قبل ان تصبح الثورة فرصة ضائعه" ... وبلال فضل لما كتب عن "محاولات اجهاد ثورة" ... ايوه كل ده صحيح، وصحيح اننا مش زى تونس .. لان التوانسه ماعندهمش نسبة الامية اللى عندنا، ولا الفقر والتوجيه والشحن اللى عندنا .. ولا عندهم امن دولة و حزب وطنى كلهم بجاحة واجرام واستخدام بلطجية ... ولا عندهم متآمرين معروفين لسه ماحدش راضى يخلصنا منهم ..
لسه بيغرسوا جوانا الاعشاب الضارة دى، بيحاولوا يزرعوها علشان تعمل جذور جوانا ونسيب لهم البلد !!
وبعد إنتخاب رئيس جاء باراده جماعته وعشيرته وعصير الليمون وقد ندم عاصرى الليمون ، وبعد دستور بطعم الفته لا يحفظ إلا حقوق اللحم الضانى ،ولذلك تجد أغلب بنوده ترعى الدوله لأنه كُتب لرعاية الأغنام فقط وليس البنى آدمين ، فمازال إستمرار مسلسل الإستحمار شغال ،إنه إحتلال الحريه والديمقراطيه،بل احتلال الانسانيه وهنا الفرق بين الإستعمار والإستحمار ، فالإستعمار ، إستعمار خارجى ،أما الإستحمار فهو إستعمار داخلى ، ومازال نهر الدم يجرى بين الطرقات ،حتى نتخلص من الاحتلال والاستحمار، ولا للاستقرار المزيف وليس كل الاستقرار آمان ، فاستقرارهم كما استقرار جهنم ،{ إِنَّهَا سَاءَتْ مُسْتَقَرًّا وَمُقَامًا }  فهنياَ لهم باستقرارهم.

قال رسول الله صلى الله عليه واله وسلم:

ستأتى على أمتى سنوات خداعات يكذب فيها الصادق و يصدق فيها الكاذب ويؤتمن الخائن و يخون فيها الامين وينطق فيها الرويبضه قيل وما الرويبضه؟ قال: الرجل التافه السفيه يتكلم فى أمر العامة

الله..الوطن..حق الشهداء..الثورة

fawzy elrashidy

                                                       الشيخ حسان ونعم والاستقرار

                                   

                                           وقالت الصناديق ناااااااااااعم

أنــا الحكــــــــومه

من النهارده مفيش حكومه ، أنا الحكومه ، أنا الحكومه.
بعد قرار النائب العام الخاص ، بقرار الضبطيه المضبطه ، إن ممكن مواطن يقبض على مواطن ، يعنى البلطجى هيقبض على الشريف ، لأن الشريف غلبان وطيب لكن البلطجى معاه سلاح وشغال فى جماعه بتحركه وفى ثانيه يجمعوا بعض زى الدبابير وكأن الدبوره إتنقلت على الأرض بعد ماكانت على الكتف ونزلت تبلطج على هيئه مليشيات بالقانون ، وأنا كمواطن ومرسى كمواطن والنائب العام كمواطن حتى وهم ضد الوطن فيعدوا من المواطنين ، وبتلك القانون من المفروض أى مواطن يقبض على النائب العام الخاص ، لأنه جاء بطريق البلطجه وغير قانونى ، وأيضا أريد القبض على مرسى لأنه مسئول سياسيا وجنائيا عن دماء الشهداء التى سالت فى عهده.
إنها دولة اللادوله ، وقانون اللاقانون ، يعنى أيه تقنن للجماعات الإرهابيه إنها تقبض على أى مواطن عشان مش عاجب سيادته ، بكره نلاقى كل واحد ولا جماعه عامله سجن خاص بيها ، وشويه ويعملوا جيش خاص ، وشويه وكل واحد يبئى رئيس جمهورية نفسه ، وشويه وكل واحد يعمله دوله ونبئى دويلات ، يااااااااااااااااه ياعبد الصمد كان نفسك تقبض على البرادعى وصباحى وأى حد لجان التشويه مش نافعه معاه ، وكان نفسك تطلع ظابط وأهى جاتلك ع الطبطاب ومن غير كليه ولا كشف هيئه ووجع دماغ ، لأنك بكرش وبهلول وكنت هتسقط فى كشف الهيئه ، يلا كارنيه المليشيات فى جيبك ، سلاحك الأبيض والأسود فى ايدك ، غباءك فى دماغك وإنزل برطع فى البلد، ماهى خلاص بلادنا وبتاعتنا وأى حد يقولك ثوره ولا ليبرالى ولا مسيحى ولا من الثوار ، أقبض عليه واعمل الغلط معاه ، زى يوم الاتحاديه كده ، المهم محدش يجيب سيرة الصندوق ولا الراجل المنتخب ، فاهمين يامليشيات ياحلويين ، يلا إنطلقوا على بركة الله.
الله.......الوطن ........حق الشهداء .......الثوره
fawzy elrashidy

جعلـــونى إخـــوانياً

جعلونى إخوانياً ، قصة شاب إسمه على ، كان مصرى نشأ فى بيت الإخوان ، تربى على السمع والطاعه وعدم الجدال والنقاش ، وأن هناك مؤامرت كونيه تدار ضدهم ، حتى أصبح الشاب لا حول ولا قوة إلا بالله إخوانى.
كان على يجلس مع الأهل والعشيره من الإخوان وجماعات نبذ العنف فى حفلة عقيقه فى سبوع اخوانى صغنن ، وبعد  إجتماع المرشد ، والبودى جارد بهلول أبو كرش ، ومجموعه من مشاهير نبذ العنف بشويش ، وجيهة ضمير مش موجود ، فلقد قرروا بعد أكل الفته وشرب البيبسى اللى بيساعد على بناء دولة إسرائيل كما قال كبيرهم ، إنه رجس من عمل الشيطان ، فلقد قرروا فى إجتماعهم المغلق بقتل الثوره وخطف الثوار وقتل كل من يعارضهم حتى لو قتلوا مليون مصرى ، وخرجوا من إجتماعهم المغلق وقرأوا نَص الإتفاق ، بأنهم قرروا قتل مليون مصرى ثائر وطبيب بيطرى ،فنظر جميع الأهل والعشيره فى دهشه وسأولوا فى نفس واحد ولماذا طبيب بيطرى ،ماذنب الحيوانات ؟  فهز كبيرهم رأسه وقال ألم أقل لكم لم ولن يسألوا عن قتل المليون ثائر !! ، ففهم على بأنه لا يجادل ولا يناقش لأن الغايه تبرر الوسيله على حسب ماقالولوا ، وإقتل ياذكى ياقدره يقتل ذكى قدره ، إدبح ياذيكو ياقدره يدبح ذيكو قدره ، أنزل ع الاتحاديه ياذيكو ياقدره ينزل ذيكو قدره ، وحاليا ذكى قدره بيجهزوا مليشيات ليقوموا بدور الشرطه فى حمايه قال أيه البلد، يعنى ذكى قدره عاوز يقتل بالقانون ، فى دولة اللاقانون ، أتمنى أن يتوب الله على على من جماعة الإخوان  ويرجع إلى الله فالدين ليس جماعه ولا عمل إرهابى ولا كدب ولا نفاق ولا خداع ، فهم يريدون بأن تصبح مصر كلها على ، وأختم كلمتى بقول الله عز وجل ، ( أفلم يسيروا في الأرض فتكون لهم قلوب يعقلون بها أو آذان يسمعون بها . فانها لا تعمى الأبصار و لكن تعمى القلوب التي في الصدور ") صدق الله العظيم 
الله....الوطن ....حق الشهداء ....الثوره
fawzy elrashidy

يوم مصرى بلون الدم

يوم مصرى بلون الدم ، إنه يوم السبت 9 مارس القادم ، يوم النطق بالحكم على مرتكبى أحداث مذبحه إستاد بور سعيد ، سواء منهم أبرياء أو جناه ، لكن من الواضح إن من بينهم أضحيات تم تكملة المشهد بهم فقط ، وعلى سبيل المثال وليس الحصر المشجع الأهلاوى أحمد رضا من ضمن المحكوم عليهم بالاعدام !! يجب القصاص من الفاعل الحقيقى ويجب تجنب السياسه فى الحكم ، 
عموما إنه يوم بلون الدم ويجب على المسؤلين أن يخرج أحد على الإعلام يهيأ على الأقل نفسياً لتقبل الحكم ،لأنه فى الغالب حكم بالاعدام ، وأن الحكم القادم ليس آخر المطاف ، ومن الممكن الطعن على الحكم فى خلال 60 يوم من صدوره ، و قرار المفتى  ماهو إلا رأى شرعى بحت ، وفى الغالب يوافق على قرار حكم الإعدام ، حتى وإن تم قبول 20 منهم ورفض واحد ،فهو عباره عن رأى إستشارى من المفتى للقاضى ،وغير ملزم وللقاضى حرية القرار على خلفية الرأى الشرعى ، و تحيل محاكم الجنايات وجوباً إلى فضيلة المفتى القضايا التى ترى بالإجماع وبعد إقفال باب المرافعه وبعد المداوله إنزال عقوبة الإعدام بمقترفيها وذلك قبل النطق بالحكم وذلك تنفيذاً للماده (2/183) .
يجب حقن الدماء فى الشارع على خلفية الحكم يجب فهم أن هناك خطر فى الشارع سواء القاهرة أو بور سعيد ، أولتراس أهلاوى من مصر وإخواتنا ودمهم مصرى وغالى على الجميع ، وبور سعيد بلد مصريه ودمها مصرى وبيتم إغتيالها فعلاً، الكل يريد العدل فقط ، ومن الصعب بناء دولة العدل والقانون على رمال متحركه ، يجب بناء دولة على أرض ثابته و إستكمال الثورة التى نادات بالعدل والقصاص من كل من خان الثورة وأستباح نقطة دم مصريه . لا يجب بناء المصالح من جثث الشهداء ودموع الأمهات .
يَـٰأَيُّهَا ٱلَّذِينَ ءامَنُواْ كُونُواْ قَوَّامِينَ بِٱلْقِسْطِ شُهَدَاء للَّهِ وَلَوْ عَلَى أَنفُسِكُمْ أَوِ ٱلْوٰلِدَيْنِ وَٱلاْقْرَبِينَ إِن يَكُنْ غَنِيّاً أَوْ فَقَيراً فَٱللَّهُ أَوْلَىٰ بِهِمَا فَلاَ تَتَّبِعُواْ ٱلْهَوَىٰ أَن تَعْدِلُواْ وَإِن تَلْوُواْ أَوْ تُعْرِضُواْ فَإِنَّ ٱللَّهَ كَانَ بِمَا تَعْمَلُونَ خَبِيراً
حفظ الله مصر وشعبها وأحقن دماءها الطاهره

الله....الوطن....حق الشهداء.....الثوره

fawzy elrashidy