وطـن فى غرفة الإنعــاش

أوجاع وطن مجروح يبكى على شهدائه ، يبكى على ثورته فهل من المنطق بعد سنتين على قيام الثورة مازلنا نبحث عن من قتل الثوار حتى وإن أحرقت الفيديوهات وتكسرت الكاميرات فكل شاب حضر الثورة وحضر الموت كان شاهد على القتل احنا الشرايط واحنا الفيديوهات واحنا الكاميرات ، احنا اللى مات اصحابنا والدم مازال على ملابسنا ، عيون أحمد حرارة ورضا عبد العزيز خير شاهد ، ست البنات وسميرة ابراهيم خير شاهدات ، هل المنطق بعد انتخاب رئيس قالوا عليه ثورى أن يعطى القتلة قلادات النيل ويستشيرهم فى كيفية ادارة البلاد بعد خروجهم الآمن وإتباع النظام القديم فى الشحاته على البلد وثورتنا ثورة كرامة لا تقبل مد اليد ولا الاهانه ، هل من المنطق ان يتم استلام اوراق السفير المصرى لدى الكيان الصهيونى فى القدس مما يدل على اعترافنا بان القدس عاصمة لاسرائيل ومرفق معه خطاب الغرام، فهل من المنطق تجنس اكتر من 50 ألف فلسطينى فى صفقة أخشى ان تكون تمت فعلا وهى بيع 600 كيلو متر من سيناء ب 12 مليار دولار والتى رفضها المخلوع فى السابق ، فهل هى تلك الصفقة التى أتت بالجماعات الاسلاميه على راس النظام الذى لم يسقط ، وفتح امريكا واسرائيل ذراعيهما بالاحضان لتلك الجماعات ؟؟!! ، فهل من المنطق أننا بعد قيام ثورة تحدث عنها العالم أن يحكمنا دستور شكلته لجنه غير دستورية وقامت المحكمة الدستوريه سابقا بحلها ، وتنظر من جديد أمام المحاكم وبعد اعادة المحكمة الادارية العليا القضية من جديد للمحكمة الدستورية وأطلقت الكلمات برفض الدستورية للاوراق ، ولكن الحقيقة انها رفضتها لعدم استكمال الامضاءات والاوراق المطلوبه ، وايضا لابد من الحكم بحل التأسيسيه قبل يوم 12 نوفمبر لانه الموعد المحدد لطرح المواد النهائية والإستفتاء عليها ووقتها يكون قرار المحكمة أى كان لا فائدة له ،لا يسمن ولا يغنى من جوع ، فهل يكون الرهان الوحيد وقتها على الشعب الذى أتمنى ان يكون آخذ الدرس جيداً فى إستفتاء 19 مارس وتغيب العقول ونعم للجنة ولا للنار ، وإنتخابات مجلس الشعب وتحت القبه شيخ ، وإنتخابات الرئاسة والاختيار بين القاتل والمتواطىء ،فهل تعلم الشعب الدرس جيداً ، أم مازال فى حالة غيبوبة وإرهاب فكرى وعصر الليمون ، لازم ننزل الشارع لو كنا بنحب البلد دى نوعى الناس بالدستور النووى وانهم يرفضوه ولا علاقة بغزوة الصناديق بالجنة او النار الجنة والنار بالاعمال مش بالتصويت فى انتخابات والا اى حد يهودى يقول نعم ويدخل الجنة ..الاخوانى شايف انتقاد مرسى جريمة ، والسلفى شايف انتقاد برهامى وابو اسماعيل خروج عن المله ، واليسارى شايف انتقاد صباحى جريمة ، والليبرالى شايف انتقاد البرادعى جريمة ، المصرى الغلبان عاوز ياكل عيش ويتعالج ويربى ولاده ، والدستور رخصة للبلاد لسنوات قادمة والجميع زائل الا الفكرة هى الباقيه ، لا تموت ، مصر مش بتاعة جماعة ولا بتاعة حد مصر للمصريين اللى بيحبوها ويخافوا عليها بجد ، أوجاع الوطن تنادى فهل من مداوى ؟؟

الله.......الوطن .......حق الشهيد..............الثورة 
fawzy elrashidy

fawzy elrashidy

خطاب الآفاعى

وماذا بعد خطاب الحب اللذيذ بين الآفاعى فهل من المنطق تحارب من تحب أو من تعتبره صديقك الوفى ، وهل من المنطق قطع الغاز عن حبك الجديد ، أين الكلام عن غزه فى كل المحافل الدوليه ، فهل هناك صفقة ما بتوطين الفلسطينين بسيناء ، وهل هناك صفقة ما تمت لوصول الآفاعى لحكم مصر بموجبه تجنيس الفلسطينين فى قطاع غزة بالجنسية المصرية حتى يكون لهم الحق فى المواطنة المصرية ، هل تم بيع 600 كيلومتر من سيناء بمقابل مادى 200 مليون دولار التى رفضها المخلوع من قبل ذلك ، لماذ فتحت أمريكا وإسرائيل أبوابها وأحضانها للإخوان والجماعات الإسلاميه فهل تريد دخول البلدان العربية بطرق أكثر ديمقراطيه بعد وفاة إبن لادن الذى كانوا يدخلون البلدان على حسه هو وطالبان ، الثوار كانوا بيطالبوا بالقصاص  وأهداف الثورة وإخوانا وصفوت حجازيهم يقولك على القدس رايحين نبوس بالملايين ، أحب أقولك أعم مرسى إنت والشيخ بيريز ، نظرا لأن النعمة فاقت حدها ، ولأننا مش قدها ، ولأن فعلا إنجازاتك فوق طاقتنا نعدها ، ولأننا غرقنا فى جمايل مستحيل هنردها ، نستحلفك ، ترحمنا من طلعة جنابك حبتين ، بينى وبين حضرتك ، دا شعب فقرى مايستحقش رومانسيتك ، أنا عارف إنه شعب ماينفعوش إلا شارون وبيريز وبوش ، عاوز يجرب الامتهان ، ويعيش عميل الامريكان ، بيمد غازه لإسرائيل ، يومين كمان ويمد النيل ، أهو يعنى نشرب ميه واحده وندوب فى بعض ، ماء و ماء و ماء ،  ونفض سيرة الإنتماء ، وتبقى البلد مستوطنة متسلطنة ومتسرطنة ، أيه اللى خدناه من الكرامه والإباء ، حبة خطب وكلام كلام ، إحنا راهينا على النظام ، طلع النظام هو النظام ، طيب أيه النظام ؟؟  وفى النهايه يا عم مرسى إنت والشيخ بيريز يامتلقحين جوه قلبى وأنا قلبى مش متين من حلاوتكم جانى السكر ادونى أنسولين ولا انتم بتتفقوا  والصفقة من فلسطين ، بصراحة وحثتنى رثايلكم من زمان يعنى علثان اتكثرت ثنانى فى الثورة تنثونى ياعثثثل. 
آه يانى انا همشى أحسن هاتفجر مع السلامو عليكو 
اهلى وعشيرتى موتوا بغيظكم ، فين حق الشهدا فين اهداف الثورة فين القصاص فين وفين وفين ، كان نفسى تنجح يا تتح بس أعمل أيه أكدب؟ وأقول إنجازات مفتكسه ولا أطبل وأبرر؟؟ ودا مش مبداى ولا هيكون ، ولا أجيب أخبار وإنجازات من بلد تانيه وأقولها؟؟
الله .......الوطن ......حق الشهداء ...الثورة 
fawzy elrashidy

fawzy elrashidy 

الحساب عند الشعب

جاء مرسى من الجماعة وتحكم فى مصر والبلد أصبحت مجموعة إخوان او تقدر تقول ممكن نعمل لافتة ونكتب عليها مرسى وشركاه ...كنا زمان نسمع عن لانشون أمريكانا او إخوان ، حاليا مصر كلها مفرمة إخوان أما بالتكفير او الترهيب ، لكن دا للى يقبل يدخل خلاط الإخوان أو مفرمة الإخوان أو يرضى بالمر من اجل الأمر كالعادة ، وأعتقد الشعب جرب نظامهم ودى مشكلة الشعب المصرى دايما ياخد المر من اجل الأمر او ياخد قلم الأول وبعدها يفوق ولكن اتمنى تفوق ياشعب ، وأنا متاكد ان الثوار مازالوا فى بريق عيونهم ثورة شهيد وفى قلوبهم ثورة عيش حرية عدالة إجتماعيه ، فلقد سرقت الثورة ودفع الثوار التمن من أرواحهم واجسادهم وحريتهم ، وفعل بينا الإخوان كما فعلت الأم الكاذبه التى سرقت ما كانت تدعى انه ولدها والولد من حسن خلقه ودعها على انها أمه ، فكان هناك شاب دخل سوبر ماركت ، وبينما هو يتجول ، لاحظ بمراقبة سيدة له وتتبع خطواته ، حتى إقتربت منه كثيرا ، فقال لها الشاب يا أمى إنتى عاوزة حاجة ، إلتفتت له السيدة وبكت وقالت له يا إبنى أنت تشبه ولدى فلقد توفى ، ومن وقتها لم اسمع كلمة امى ، أخذ الشاب يصبرها ويقولها يا أمى حتى تستريح السيدة ، وقالت له عاوزة منك طلب ياابنى ، عاوزاك تنادينى بأمى وانا خارجه من الماركت ، فصار يرددها كثير مع السلامة يا امى يا أمى يا امى ، وتمنى الشاب أن لا يرى تلك السيدة الحزينة ثانية ، وذهب ليدفع الحساب فقال له الكاشير ، حسابك 450 جنيه وحساب أمك 1550 جنيه ، قاله الشاب أمى !! هى فين امى ؟؟ قاله الكاشير اللى خرجت دى وانت بتودعها وتقولها مع السلامه يا امى ، قاله الشاب لا دى ست غلبانه وبتعرف  ربنا دى مش أمى ، قاله الكاشير أنا مابعرف غير الحساب وبس ، ففعلها الإخوان فى الثورة ، أوهمونا أنهم ثوار مع ان التاريخ خير دليل على قتل النقراشى باشا ووقوفهم مع الملك ضد الوفديين ووقوفهم ضد ثورة 1952 ، وإرهاب التسعينات وغسيل الأموال ومليشياتهم الارهابيه ، ونزولهم الثورة يوم 28 مع الشرطة بالاتفاق معهم ، ونزلوا وقت نزول الشرطة ولما الثوار نجحوا فى اقتحام حاجز الخوف على كوبرى قصر النيل ، انضم الاخوان للثورة بعد ثبوت فشل مبارك فى الرجوع  والحمايه وبعد خطاب مبارك يوم 2 فبراير وبدا الناس تتعاطف معاه ، فكر الإخوان فى موقعة الجمل لأنهم لو رجعوا بعد نقدهم العهد مع مبارك هيتنفخوا فكان لازم فى اختلاق شىء يدين النظام الفاسد والأيام هتثبت كل كلمة ،وشوفوا موقعة الخرفان الاخيرة هتعرفوا ان مليشيات الاخوان هم الطرف التالت وشوفوا الصفقات مع العسكر وعمر سليمان والخروج الآمن للقتله وأقالة رئيس تحرير بمجرد التنويه لحساب طنطاوى وعنان ، وفيلم النائب العام اللى قالك تكليفه بسفارة الفاتيكان مع ان قانونا السفير بيطلع معاش على سن ال 60 والنائم العام عنده 67 سنة ، متعرفش إزاى تدار البلد أو المصالح المشتركة  ،والمشكله لسه ناس بتطبل وتقول مع السلامة يا مرسى ياثورى.... اخوان ياثوريين وأتاريهم ثورة مضادة ، والثوار الحقيقين هما اللى بيدفعوا الحساب مع باقى الشعب الطيب ...أفيقوا يرحمكم الله .

الله....الوطن ...حق الشهداء.... الثورة

fawzy elrashidy

البلد اللى حيلتى باظت

البلد اللى حيلتى باظت ، الله يرحمك ياشهيد نزلت تصلحها وهى مكسرة من كل التخبيط  وبعد ماصلحتها جه سواق ركبها ومعاه جماعته اخدوا البلد ونزلوا كل المواطنين منها وكمان بيدسوهم بحجة إنهم كفار وموتهم معنويا وجسديا جهاد فى سبيل الكرسى ، وكمان بيجهزوا رخصة للبلد بدستور لا يسير إلا فى قندهار فهناك كل شىء مباح ، تمشى شمال تمشى يمين مش مهم ، المهم الكبار تمام والشعب يغوور ، الشهداء ماتوا وإستلم مفتاح البلد جماعة بتجرب تشغل الشعب بمزاجها وكأننا حقل تجارب اللى ينفع ويطبل يعدى واللى ثابت على مبدأ الثورة يتم تشويهه ، وحكاية البلد اللى باظت دى بتفكرنى بصديق راح يصلى بما اننا بما لايخالف شرع الله ، يقول صاحبنا ،مرة وأنا فى أحد المساجد والإمام يصلى ، بدأت اسمع من الجهة اليمنى وإحنا ساجدين صوت طفل صغير يقول (شععععععن شعععععععن) وكأنه يحاول تشغيل صوت سيارة ، ثم أسمع صوت رجل كبير يكح ويتنحنح ، وعلى كدة فى كل مرة نركع أو نسجد ، المهم كل مرة الصوت يقترب منى وأنا أسمع (شععععن شعععععن) ومرات يقول خربانه السيارة ، ثم أسمع احمم من المصليين ، المهم وصل الصوت للى جنبى وحسيت به يفز ، المهم معرفتش السر لحد ماوصلنى الدور ، أتارى الطفل سرق مفتاح عربية أبوه وعمَال يحط المفتاح فى  أٌذن الجميع، وعَمال يحط المفتاح من أُذن لأُذن والمشكله إنه مجرب المفتاح فى الجماعة كلهم ، والشخص اللى يعمل نفسه تقيل وميقلش احمم ولا يفز ، يقول عنه الطفل خربانه السيارة ، ودا بالظبط حال البلد المفتاح مع واحد بيجرب قرار لو دار أوك ، ولو مدرش القرار ورجع فيه ، يبقى العيب فى الشعب مش فى القرار ، والبلد ركبها جماعة ومعاهم رخصة دستورية من مجلس أمناء شرطة التأسيسة لدهس الشعب الليمونى والغير ليمونى ، شباب الثورة يلا نشوف قطار الثورة وندهس كل ماهو ضد الثورة ونسير فى طريق الثورة ودستور لكل المواطنين وحق الشهداء ،  و عيش حرية عدالة إجتماعية ولا نترك البلد اللى حيلتنا تبوظ بسائق وجماعة ورخصة دستورية من لجنة تهديميه وليست تأسيسية ، واللى يقولك موتوا بغيظكم مع إنها حرام ولا تقال إلا للكافر ، فيكون الرد موتوا بغبائكم 

الله ......الوطن ......حق الشهداء ........ الثورة 

fawzy elrashidy

الجمل والجمَّال

فى مهرجان البراءة للجميع وبعد براءة متهمى موقعة الجمل وبعد قدوم رئيس بيقولوا عليه ثورى وهو كان بيقول هاحاكم قتلة الشهداء بس الكلام دا قبل الإنتخابات طبعا ، وبعد ماقال انه هيفرج عن المعتقليين الشعب طبعا طيب أوى ياخال و فهم غلط أن الإفراج عن المعتقليين الثوريين والراجل كان يقصد الافراج عن المعتقليين اللى قتلوا الثوريين ، بس هناك ظلم قائم لأن تم الإفراج عن كل القتلة ماعدا موباريك والعادلى أفندى ، المفروض الناس دى تخرج ولا هما ولاد البطة السودة يعنى ، والشعب المفروض يتحبس لأنه شعب بيستخدم الأحماض كتير وشغال عصر ليمون لما خلى البلد طعمها مِزز ، شعب فهم إنه فيه رئيس ثورى بجد ونسى إن القاتل زى المتواطىء لافرق ، شعب فضل منتظر حد يجيبله حقه ونسى إن ماحك جلدك مثل ظفرك ، شعب فضل منتظر إدانة القتلة وأصبح عندنا مشكلة الإنتظار ، رغم إننا قمنا بثورة وساعتها هما كانوا فى الحمام وقالوا مش نازليين  شعب فضل يجرب يسمع إدانة من المتواطىء وعمل زى الراجل اللى عنده مشكلة حرف الشين زى احنا كدة عندنا مشكلة الانتظار والتجريب ، الراجل دا كل مايقول كلمة فيها حرف الشين يقعد حوالى نص ساعة ، وفى مرة كان عاوز ياكل شاورما وقعد يفكر يعمل أيه ، لأنه لو راح المطعم نص ساعة مش هتكفيه عشان يقول شاورما والناس هتزهق ، فكر فى حل أول مايركب التاكسى يفضل يقول شاورما لما يوصل المطعم يكون جاب نهاية الكلمة ، راح وهو يقول ششششششششش ، وصل المطعم وجالو الجرسون ، صاحبنا ماصدق ، قالو واحد شاورما ، الجرسون قاله أيه مسمعتش ممكن مرة تانية ، رد عليه وقاله يلعن أبوك أدينى واحد طعمية ، والشعب بتاعنا الجميل كدة فضل يجرب فى البراءة وينتظر وفى الآخر المحكمة والرئيس الثورى أدونا على قفانا ، وعاوزين يضيعوا جمعة الحساب بحشد الأتوبيسات بساندوتشاتهم ببابا غنوجهم عشان يقيلوا النائب العام ، على أساس إن النائب العام قال هيقتص للشهداء!! وقال  دم الشهدا فى رقبتى !! وقال أنا مرشح الثورة !! على فكرة الجمل لو بيتكلم هيقول على الحقيقة وهيرحم اهالى الشهداء لأنه ممكن يكون عنده ضمير وقلب أفضل من بنى الإنسان الخائن اللى باع الثورة والدم ، والدم مش وجهات نظر ، الدم قصاص ودا الشرع

الله ......الوطن ....حق الشهداء....الثورة

fawzy elrashidy  

لقد وقعنا فى الفخ

لقد وقعنا فى الفخ بعد ثورة وشهداء ومصابيين ومعتقليين تستغلهم السلطة ككارت بلانش فى اى وقت تضع خروج المعتقلين فى ماكينة الصرف الثورى لتهدئة الثوار بعد أى مصيبة سلطوية ، وأصبحنا ننتظر وننتظر ونستمر فى الإنتظار حتى قضى معظم الثوار عقوبتهم الظالمة والإسم إفراج، وأصبحنا تحت يد الفاهم الأوحد كما كنا فى السابق هناك رئيس فاهم كل شىء وحزب وطنى يفعل كل شىء ، والآن نفس الأسلوب والمنهج فلقد رحل الرئيس وبقى النظام والحزب مع إختلاف الأسماء ، وفعلنا كما فعل البروفسير والطالب الفاشل ، كان هناك طالب جامعى مهمل وفاشل وبعد رسوبه فى مادة المنطق راح للدكتور ، وقاله يادكتور هل صحيح حضرتك تفهم كل شىء فى المنطق ؟ رد الدكتور وقاله طبعا ، رد الطالب وقاله ممكن أسألك سؤال فى المنطق وتجاوبنى عليه ، بس على شرط لو معرفتوش تغير درجتى من رسوب لامتياز ، رد الدكتور وقاله موافق، قال الطالب ماهو الشىء القانونى لكن غير منطقى ، وماهو الشىء المنطقى ولكن غير قانونى ، والشىء الغير منطقى والغير قانونى ، الدكتور إحتار جدا ولم يعرف الإجابة وغير نتيجة الطالب من رسوب لنجاح بامتياز ، وبعدها بكام يوم مر عليه أحسن طالب متميز عنده فى الجامعة ، فسأله نفس السؤال، جاوب الطالب المتميز وقاله بسيطة يادكتور أنا أجاوبك ، حضرتك عندك 65 سنة ومتزوج واحدة عمرها 24 سنة وهذا قانونى لكن غير منطقى ، وهى تخونك وتحب طالب عمره 25 سنة وهذا منطقى ولكن غبر قانونى ، وهذا الطالب أكثر طالب مهمل فى الجامعة وحضرتك عطيته درجة ممتاز وهذا غير قانونى وغير منطقى ، فهمت يادكتور ، وفهمت ياشعب مصر وياثوار الثورة فلقد اعطينا الثورة والرئاسة والبلد لنفس الطالب الفاشل اللى بيخونا وباع دمنا  وكمان فاشل ، ومشروع الفنكوش بيفكرنى بالتلاتة اللى كانو عاوزين يمسكوا البلد فيهم اتنين أذكياء وواحد غبى الشعب قالهم علشان تمسكوا البلد كل واحد فيكم يجيب تمساح ، راحوا ورجع اتنين منهم كل واحد بتمساح لأنه يقدروا يشيلوا البلد ويتحملوا مسؤليه ، فاضل الغبى إتاخر ولم يرجع ، خرج الناس للبحث عنه ، وجدوه ماسك بـ أبو برص ونازل فيه ضرب فين أبوك فين أبوك ؟ وبردوا مسك البلد فى صفقة وبدل مانشوف تمساح النهضة رجع لنا ببرص النهضة ومازلنا نبحث عن الأب ، ومشروع ال100 يوم وخطبة الجمعة يوم السبت فى الاستاد وتصفيق الاخوان المشجعيين ، ياثوار أفيقوا من الفخ الذى وقعنا فيه وإنتبهوا جيدا للدستور ومواده وتفاعلوا مع الشارع وانزلوا فهموا الناس بالدستور والمواد ، فهموا الناس يعنى أيه ثورة قامت ولم يحاكم قتله ثوارها حتى الآن ، فهموا الناس ان الثورة فكرة ومش ممكن تموت ، لقد اصبحنا اكثر يقينا انه لايصلح لقيادم مصر الثورة بعد 25 يناير إلا رئيس ثورى وليس إصلاحى فالثورة عمل إستثنائى وتحتاج لرئيس إستثنائى يتخذ قرارات ثورية داخليا وخارجيا بحكم الشرعية الثورية
الله .........الوطن ............حق الشهداء..........الثورة
fawzy elrashidy

fawzy elrashidy

مشروع الحمل الكاذب

حد يقول للناس اللى بتكدب إن اللى بيكدب بيروح النار والنار دى حاجة وحشه أوى وكمان الكدب عندهم أصبح من عاده لعباده ، وحد يقولى فين ذكرى اكتوبر والعروض العسكريه ، الإستاد مليان عروض أخوانيه فقط والزمر اللى قتل السادات وأعلام إخوانيه ، كنت حاسس انها مباراة فى حب قتل الساادت بين منتخب الإخوان وفريق الإخوان وعروض لمشاكل ال 100 يوم وكلام غريب جدا مثلا ،إن تم حل أغلب المشاكل بنسبة 70% ، أعتقد اننا عايشين فى 30% التانيين الوحشيين اللى لسه متحلوش، من الأخر الشعب هو اللى بتاع مشاكل شعب كخه ، ومرسى بيقول طلع أغلب المعتقليين بس محددش إنه معتقليين ، إحنا يهمنا اللى تبعنا بتوع الثورة ، مش اللى تبعكم بتوع الجماعات  وكل دا فى ذكرى اكتوبر مش فى حملة انتخابيه  ،موضوع ال 100 يوم دا ومشروع الفنكوش بيفكرونى بقصة الحمل الكاذب ، كان فيه بنت عندها 21 سنة ظهر عليها اعراض حمل ، الام اتهبلت وبقت تشد فى شعرها وتقولها من هو ابن التييييت وفضلت تضرب فى البنت ، راحت البنت اتصلت بواحد وبعد نص ساعة وصلت عربية وقفت قدام البيت عربيه فيرارى آخر موديل عمر أهل البنت ما ركبوها ونزل منها شاب وسيم ولابس ملابس فخمة جدا عمر اهل البنت مايجيبوا حتى زرار منها ، دخل الشاب البيت وحط رجل على رجل ، وقالهم يا جماعة بنتكم قالتلى على الخبر ، لكن فى الحقيقة انا مش هانقدر نتجوزها لظروفى العائليه الخاصة ، لكن انا هاعوضها إذا جابت بنت هاكتب بإسمها مركز تجارى وفيلا على البحر ومليون دولار ، وإذا جابت ولد هاكتب بإسم الولد مصنعيين و 2 مليون دولار ، أما إذا جابت توأم هاكتب لكل واحد مصنع ومليون دولار ، أبو البنت وامها هيتعبطوا من الكلام ، وكمل الشاب كلامه وقالهم طيب لو مجبتش حاجة و طلع الحمل كاذب ، تحبوا التعويض يكون ايه ، تنح ابو البنت وأمها وقالولوا حاول مرة تانية يا إبنى .

بالظبط مرسى والجماعة عاوزينا نسمع بوعود وكلام معسول وعهود علشان الشعب يقول حاول مرة تانيه وجرب فينا يا ولدى وكأن الشعب ومصر حقل تجارب وخد فرصة والكل اخد فرص إلا الشعب، هيطلع حد من إياهم يقولك انتم صبرتم 30 سنة هاقوله إحنا عملنا ثورة علشان منصبرش تانى وهو اللى وعد وحدد الوقت ولا يمكن ان نضع مصر فى موضع تحميل فرعون آخر ، هيطلع حد يقول موتوا بغيظكم احب أقوله يامن تتكلم بالدين تلك الآيه الكريمة نزلت فى الكفار ولا يجوز قولها لمسلم وان كنت لا تعلم فتلك مصيبة وإن كنت تعلم فى المصيبة أعظم ، ولا يتيقى لى إلا أن اقول للمطبلاتيه والمبرراتيه ، موتوا بغبائكم 

الله....الوطن .....حق الشهداء ...الثورة

fawzy elrshidy

زمن القرود

زمن الموضة العمياء فى تشويه الشرفاء والثوريين ، امثال دكتور محمد البرادعى بالتكفير والعماله رغم أننى متاكد جدا 99 % من الذين يشوهون ذلك الرجل لا يعرفونه غير أنها موضة كلام وإستلام وردية تشويه من شخص لشخص يسلكون نفس الإتجاه ، كما يتم تشويه المناضل حمدين صباحى بانه خمهم ولا ندرى مانوع الخم سوى بغبغ وليتهم يقرءون عنه وعن تاريخه وكيف تم سجنه فى قضايا وطنية لا قضايا غسيل أموال ولا مليشيات ولا إرهاب ، إن المشوهتيه يريدون تحويل دفة الدولة إلى إتجاه واحد حتى وإن كان على حساب الآخرين ، وإن جادلتهم أصبحت تجادل الدين ، ليس بيننا مصرى ضد الدين ولكننا ضد من يتخذ الدين غطاء لأفعاله وكسب مناصب زائله ولسنا ضد من يريد مناصب ولكن لا تجعل الدين حملة انتخابية لان الدين ثوابت والسياسة متغيرات ، ولأن الدين ثابت لايتغير ولكن يتغير المتدينون. فيجب ان نفكر فيما يقال وفيما ياخذنا هؤلاء ولا نكون كالقردة الموضوعة فى قفص يحركنا من يدعون العلم والمعرفة ، فلقد وضع مجموعة من العلماء 5 قرود فى قفص واحد وفى وسط القفص يوجد سلم وفى أعلى السلم يوجد بعض الموز وفى كل مرة يطلع احد القرود لأخذ الموز يرش العلماء باقى القرود بالماء البارد ، بعد فترة بسيطة أصبح كل قرد يطلع لأخذ الموز يقوم الباقيين بمنعه وضربه حتى لا يرتشوا بالماء ، وبعد فترة من الوقت لم يجروء أى قرد على صعود السلم لأخذ الموز ، على الرغم من كل الإغراءات خوفا من الضرب ، بعدها قام العلماء بتبديل أحد القرود الخمسة ليأخذ الموز ولكن فوراً الأربعة الباقيين يضربونه ويجبرونه على النزول ، بعد عدة مرات من الضرب يفهم القرد بان عليه أن لا يصعد السلم مع أنه لا يدرى ما السبب ، قام العلماء أيضا بتبديل أحد القرود القدامى بقرد جديد وحل به ماحل بالقرد البديل الأول حتى القرد البديل الأول شارك زملائة بالضرب وهو لايدرى لماذا يضرب ، وهكذا حتى تم تبديل جميع القرود الخمسه الأوائل بقرود جديدة حتى أصبح فى القفص خمسة قرود لم يرش عليهم ماء بارد أبداً ومع ذلك يضربون أى قرد تسول له نفسه صعود السلم بدون أن يعرفوا ما السبب ، لو فرضنا وسألنا القرود لماذ يضربون القرد الذى يصعد السلم ؟ أكيد سيكون الجواب لا ندرى ولكن وجدنا آباءنا وأجدادنا له ضاربين ، هناك شيئين لا حدود لهما ... العالم وغباء الإنسان هكذا قال أينشتاين ، ومعركتنا فى الدستور فلا تدع احد يضعك فى القفص حتى تصبح مضرب عن الحريه والكرامة وتصبح من عادة لعبادة ، فالثوار لا يقبلون أن يتحولوا لمجموعة من القردة والشعب المصرى لن يقبل أن يوضع فى قفص النهضة حتى وإن كان ذهبياً.
الله ....الوطن ...حق الشهداء....الثورة 
fawzy elrashidy  

حمدين وبغبغ

فى بلدى الجميع حائرون يفكرون فى جنون عن النسر صباحى كيف خم الإخوان فهل ياترى كانوا نائمون ، وكيف كان نوع الخم ، هل سرق الثورة ، هل ترك الثوار وانشغل بالصفقات مع عمر سليمان ، هل صفق بحرارة عندما تم سب وقذف البوب والشهداء تحت القبة بتاعة تحت القبة شيخ ، هل جلس مع شفيق من ورا الستار ، ولا يمكن استخبى ورا الحيطة والاخوان معديين طلع قالهم بخ فــ مبخوش ، بس المهم ميكنش هو اللى آكل الجبنة لانها كدة خم للبلد كلها ولكريم عبد العزيز.

وكل الشعب الكافر كما وصفه العلامة الفذ الشيخ وجدى غنيم ، ان الشعب كله كافر والكفار دوول يتسائلون ومعاهم حزب الدستور سابقا الكفار حاليا ورئيس الكفار دكتور البرادعى أبو لهب الجميع يسأل ويريد ان يعرف خمكم فى أيه ، الحكاية دى بتفكرنى بقصة بغبغ
واحد راح المطعم ، لقى لافته كتب عليها ( إذا اردت ان تعرف سر بـغـبـغ..أشترى  همبورجر)، أشترى همبورجر لقى داخلها رسالة اذا اردت معرفة سر بغبغ أطلع من المطعم و روح يسار ، طلع و راح يسار ولقى لافتة كبيرة مكتوب عليها اذا اردت معرفة سر بغبغ أذهب بيتكم وشغل التلفزيون ، شغل التليفزيون وجد أخبار تقول اذا اردت معرفة سر بغبغ اشتري تذكرة سفر ، اشترى تذكره لقى مكتوب على التذكرة (اذا اردت معرفة سر بغبغ اذهب الى المطار وسافر ألان) لما راح المطار ركب الطيارة و لبس حزام ، عندما ركب الطياره وأقلعت الطياره ،  شاف لوحة مكتوب عليها اذا اردت معرفة سر بغبغ نط بالبحر ، وعندما نط وجد زجاجة فيها رسالة!!!!!:إذا أردت معرفة سر بغبغ أحذف الزجاجة وستسمع صوت!!؟؟ فعندما حذف البطل طلع صوت(بغبغبغبغبغ)!!!!عرفنا كدة سر كلمة حمدين واحد خمنا ، ماهى إلا عقول فارغة مرمية فى هيئة لجان على الكمبيوترات وعاوزة تملأ مكان تفريغ العقول بفقاعات هواء وكلمات تجعل من صوت الهواء بغبغ وحمدين واحد خمنا وهى بالطبع لا تؤثر فى العقول المليئة بالافكار والثورة لأنها فقاعات فى الهواء فلا ننساق وراءها ونترك معركة الدستور والإنتخابات القادمة ، حزب الكفار( الدستور ) وحزب التيار الشعبى ( حزب الخم العالمى ) أيد واحدة 
الله....الوطن....حق الشهداء ....الثورة 
fawzy elrashidy

مرسى وال 100 يوم

مرسى وال100 يوم ، احنا فى اليوم ال94 النهاردة ، ماذا تحقق منها غير تكفير الناس زيادة تشويه تبيرير ، تطبيل ، والرئيس صلى الجمعة والرئيس قال للحرس السلام عليكم مع إن حكيم قالها قبله ومبارك والعادلى كانوا بيصلوا بردو ويحجوا لكن انا ميهمنيش كل دا انا منتخبتش شيخ مسجد انا ممكن يحكم بلدى مسيحى مش هتفرق معايا المهم عندى العدل والحرية ودوول ملهمش دين والإسلام مش هو الاخوان ولا السلفيين ولم يذكر احدهما فى القرآن،لا أحد يكره الشرع ولا الشريعة لا مسلم ولا مسيحى بل الاختلاف على من هم المطبقون ، من كذب ونافق او من جلس مع الفلول فى عز مطالبتنا باقصائهم من الانتخابات ، من المطبق القاتل أم المتواطىء ، وبعد ان قالت الصناديق السوداء لمرسى نعم وبعد مامر من ال 100 يوم المقررة للخطة التى قالها هو بنفسه وهى حل مشاكل المرور ، الأمن ، النظافة ، الخبز ، الوقود، فزادت مشاكل المرور ، والأمن لا امان له وقد سمع الجميع بخالد سعيد الجديد فى اسيوط ، النظافة حدث ولا حرج ، الخبز اين هو فى ظل غلاء الاسعار وطبعا المانجا رخيصة ، ومشروع الفنكوش  وكمان المعتقلين زى ماهما وتقريبا الريس حاططهم كارت بلانش كل فترة يطلع اتنين علشان نقول تكبير ، أين حق الشهداء ، اللى هيقولى انهى حكم العسكر هاقوله اه قول خروج آمن للعسكر ، هتقولى هيتحاكموا ، هاقوله آه حكم مسرحى زى اللى فات علشان يسقط القواضى اللى مرفوعة فى محكمة لاهاى للجرائم الدوليه ، فهمت الصفقة اعم الحاج ولا لسه هنبرر، وايضا أخشى فى توريط مصر فى حرب عربية عربية بدخول جيش من ولاد مصر لسوريا ، ولكنها ستكون حرب امريكية اسرائلية على إيران وحزب الله تحت غطاء سوريا بولاد مصريين وفلوس خليجية (قطرية) وسلاح امريكى اسرائيلى ، كلنا يريد مساعدة سوريا ولكن لابد من دراسة شامله ، وأيضا ملف سيناء لابد من الجلوس مع قبائل سيناء وتمليكهم للاراضى وتعمير سينا وعدم تهجير اى مواطن تحت اى ظرف ، واللجنة التأسيسة للدستور لابد من حلها ووضع اناس تفهم وتعى الدستور وحق المواطنة لا الشخصنة ولا المصلحة ، وعمر ابن مرسى أحب اقوله ان لما تخاطب مصرى تقوله باسمه سيادة المواطن ياعمر يافاشل والحكومة والوزراء لابد ان تمسكوا نفسكم شوية اما الستات والمذيعات ، منتظر تبريرات وتكفيرنا يلا وفى الآخر على فكرة انا مش إخوانى ، وعلى فكرة قبل حد مايقول إنى مسيحى وعلمانى كافر وليبرالى زنديق ، أنا مسلم وابويا اسمه محمد ، لان احنا فى موضة التشويه والتكفير وسؤال أخير بكل حياديه ما الفرق بين مرسى وشفيق لو كان نجح شفيق رغم انى ضده انا بتكلم على الانجاز على ارض الواقع والتاثير على طلبات الثورة المعتقلين  وشكرا
الله .... الوطن .....حق الشهداء ....الثورة
fawzy elrashidy