الإخوان 8 جيجا

الإخوان 8 جيجا ، إن الأخ بين يدى مرشده كالميت بين يدى مغسله ، لاحول له ولاقوه ، يفعل به مايشاء ، يعتقدون أنهم جماعة دعوية ولكنهم يدعون لأشياء غير الإسلام مثل الكدب والنفاق والتزوير ، حتى سرقة الشهداء كما سرقوا الثورة ، والإسلام هو الحل للوصول للكرسى ، يدخل الشاب الإخوانى الجماعة ، فلابد من فرمتة مخه من الحياه ، وإدخال ويندوز جديد، ويندوز المرشد ، يضع به مايشاء من أفكار توضع بعقل المتلقى منهم ، لايستقبلون أشياء خارج ايطار النسخه ، وله كود شفره تكون مع المرشد وأحيانا مع الشاطر أو بعض منهم ممن يستخدمون عقول هؤلاء الشباب لتحريكهم وتوجيههم، لايستطيعون تحديث أنفسهم إلا من خلال صاحب النسخه المشفرة ولا يستقبلون رسائل خارجيه بل يصدرون ماورد اليهم فقط ، كما أنهم مشتركين فى وصله واحده كلمه من المرشد تلاقى الكل استقبلها عن طريق البلوتوث ويتم ترديدها فقط ، برادعى عميل ،أيوه عميل ، صباحى خمنا ، أيوه خمنا ،  تآيد قرار ، كله بالرموت ، حتى أصبح الشباب الغير الإخوانى مضيع 90% من وقته عشان يفهم فيهم إن الاسلام مش كده والبرادعى ملهوش علاقة بضرب العراق وصباحى مناضل ، بس هتقول مين بيعتبروك فيروس هدمرهم وهما أساسا فى فيروس ، شوف حتى الواد بتاع جبنة نيستون يامعفنين ، فى دماغه ان البرادعى وصباحى عملاء والشباب باع نفسه ليهم عشان الجبنه ، دى عقولهم ، دا غير المسيحى اللى إتسحر ودخل صلى الفجر ومرسى فتى أحلام وناصع وشفاف ،دا حتى الرئيس متفرمت زى الليمبى ، فيه حاجه إسمها التصنيف الإنتمائى والاستزراع ، دا غير المزنوقه ، وطبعا لاننسى ويندوز أبو إسماعيل ، دا بئى ويندوز باستنساخ يعنى شوف البهاليل بتوعه كلهم نفس الشكل ونفس الفكر ، شوف مثلا جمال صابر بتاع حملة لازم حازم ، نفس طريقة الكلام والكدب ، حتى وهو بيهرش فى دماغه ، والدليل على انهم عباره عن ويندوز وسائل اتصال عبر البلوتوث ، لما شاحن أبو إسماعين ضاع ، تم قطع الإتصال بينهم ، وجرى ياماجدى ، وراح اتظبطوا فى إسكندريه ورجعوا ، ضربونا يابوحه ، ولو تلاحظ فى الناحيتين سواء إخوانى أو سلفى اللى بيفكر منهم ويستخدم نسخة عقلة ويطرد الفيروسات دى بره ، بيتركهم ، أمثال أستاذنا ثروت الخرباوى من الاخوان ، ودكتور محمد يسرى سلامة من السلفيين ، ولا يتبقى سوى عقول مستعملة ممكن يتم بيعها فى أى وقت لانها مجرد آداة للاستخدام المصلحى فقط
ونصيحتى ليكم ياشباب الاخوان والسلفيين ، إتروكوا سياسة التلقين والحفظ بدون فهم وإستخدموا كلام الله (إقــرأ)وحاولوا تقروا تاريخ الإخوان والجماعات دى إقروا التاريخ ليس من اجل أنه ماضى ولكن إقروه حتى تتعلموا وتعلموا حاضركم ومستقبلكم ، عُمر قيادتهم ماهيعرفوكم من هم ومافكرهم وما منهجهم سوى إستعطافكم وإستقطابكم بالدين ، مع العلم أننا كلنا مسلمون وكلنا سلفيون ولكن لسنا تجار دين ، أتخذوا من العلماء والشيوخ أمثال الشيخ الشعراوى والشيخ الغزالى قدوة للعلماء والعلم وإتركوا شيوخ الظلام حتى لا تكونوا كالخفافيش تظهر فى الظلام ،وشكرا. 

الثورة مكملة من غير فيروسات إخوانيه ولا سلفنجيه إلا من رحم ربى 

الله ....الوطن ....حق الشهداء......الثورة
fawzy elrashidy

قوم بينا نستقر

الوضع فى مصر بيفكرنى بالرقاصه اللى من الجامع للكابريه ومن الكابريه للجامع ، ولما تسألها أيه الرياضه المفضله عندك ، تقولك المشى البطال ، بالظبط المسؤلين عن البلد ، هما فى وادى والدنيا فى وادى تانى خالص ، هما فاكرين إن الشعب معاه فلوس  وبيسهر يتفرج على الرقص فوق جثث الشهداء ولكن الحقيقه ان المسؤلين بترقص ع السلم ، لا الشعب الفقير الغلبان شايفهم ، ولا المثقفين وأصحاب المبادىء عاوزينهم، لكن اللى شايفهم فرقتهم وبس من الاهل والعشيره اللى بتطبل  وتسقف وتكبر على كل هزه ارضيه للبد ، والكل عامل عبيط زى العبيط اللى إتجوز عبيطة خلفوا عيال مستهبله ، إستعبط الأب وعمل نفسه ميت ، إستهبلوا العيال وراحوا دفنوه ، أهى البلد ماشيه كده كله عامل عبيط لحد ماندفن الأب أو ندفن البلد تحت الانقاد الإخوانيه ، تقول لا للتأسيسه يقولك هو آه ، تقول لا للدستور يقولك هو آه ، تقول لا للنائب العام ، يقولك هو آه ، تقول لا للإعلان الدستورى يقولك هو آه ، تقول لا لآخونة الدولة يقولك هو آه ، وكأنك تخاطب روبى ، وكمان دستور بيفكرنى بالكتاب الأخضر لزعيم الزنقه معمر القذافى تحس ان الست ليها حقوق سواء ذكر او آنثى ، وان الكهربا لما بتقطع ، النور بيكون مطفى ، وأن الميه لو قطعت ممكن تخيطها ، هو دا دستور مصر ، لا فيه حقوق ولا تآمين صحى ولا حرية فكر ،ولا حق المعاقين ، ولا جبنة نيستون يامعفنيين ، وطالقين علينا شيوخ تكفرنا والإسلام قادم خلونا كسرنا الأصنام وانا كان عندى صنم من الجبنه النيستون عملته ساندوتش لما جوعت ، بس الحمد لله هاصفر العداد من جديد وأبدأ تانى ، بس مش عارف صلاتى اللى فاتت وزكاتى وحجى هتتحسب ولا أيه لانى هادخل الدين الجديد اللى قادم اللى هو أصلا له 1500 سنه بس لسه قادم بئى معلش مواصلات وكده ، لأنه قادم من طريق صلاح سالم ، زحمه طبعا ، بس اللى أنا متأكد منه جدا إن الإسلام موجود ولم يترك مصر بل ترك قلوب وعقول هؤلاء تجار الدين ومكث بمكانه الكراسى والمال والتطبيل والتهليل وحب الشهره حتى لو على حساب الإسلام ، والقادم فعلا ودا مؤكد هى الثوره ، ثورة عقول وثورة جياع ، وثورة ثقافه ، وثورة مصريه خاليه من حرامية الثورة ،وإستقروا قوى إستقروا يا ........؟ 

الله.....الوطن....حق الشهداء .....الثورة

fawzy elrashidy

 

                             الأغنية الممنوعه من العرض (ياقفا ) مادو ووائل عامر

رئيــس بالصـدفة

رئيس بالصدفة ، أيها الرجل ذات الطابع العشائرى ، لقد جأت صدفه ، لم ولن تحلم يوما ان تكون رئيس أكبر دولة عربيه ، ولا حتى رئيس مجلس مدينه فى أقل مدن الوطن ، 
أولاً / لم تكن جماعتك تريد ترشحك وجئت ثانياً بعد عدم قبول الشاطر للترشح لعدم إستكمال النصاب القانونى وتم ترشيحك كبديل بعدما أشهرت جماعتك عدم ترشح أى أحد من الجماعة لخوض الإنتخابات أصلاً.
ثانياً / الجماعات السلفيه لم تعطيك صوتها وأعطت أبو الفتوح فى الجوله الاولى.
ثالثاً / لم تكن مرشح الثورة وقد إختار الشعب مرشح آخر للثوره ولكن تفتت الاصوات آبى أن يفوز مرشحى الثورة وهم صباحى أوخالد على 
رابعاً / فى الإعاده تم فوزك بفارق ضئيل جدا عن المنافس الآخر وتم تمريرك لعدم إراقة الدماء ليس إلا بفضل عاصرى الليمون وبعض الحركات الثورية التى آبت أن تتخذ من شفيق رئيساً ، وأنا معهم ولكن الفرق هو أننى لم أوافق على قاتل أو متواطىء.
خامسا / لم يكن لديك مشروع رئاسى واضح سوى شعارات ومشروع فنكوش رسمه  الشاطر وطيرته الجماعه وكأن طائر نهضه مرسوم على ورق يستطيع الطيران فهل يعقل ذلك إلا عند المطبيلتيه وهاتفى الشعارات .
سادسا / شعارتكم عن الثوره ماهى إلا مشروع آخر للفنكوش ولكن  مع الفرق الثورة موجوده لكن لستم صانعيها ولكن انتم آكليها وهى حق الثوار والشهداء.
 سابعا / ودا الاهم حتى بعد وصولك الحكم صدفه لم تتخذ قرار واحد يشجعنا لكى تكون رئيس مصر ، بل أنت رئيس صدفه ورئيس أهلك وعشيرتك فقط والأصح أنك أيضاً لست رئيسهم لأن رئيس أهلك وعشيرتك معروف ، بل أنت فرد أو عضو منتدب منهم لخراب مصر، وفى النهايه لا لدولة المليشيات ، لا لدولة الإرهاب الفكرى ، لا لتكفير وترهيب الشعب ، لا لفتنة طائفيه ، لا للدستور العار ، لا لكل من يريد بمصر سوء،مصر مارحش شبابها علشان تنقل البلد من مكتب السياسات لمكتب الإرشاد ، الثورة مكمله ومستمره.
الله....الوطن ....حق الشهداء......الثورة 
fawzy elrashidy

يا واد يا مـستقــر

يامستقرين ... مامعنى الإستقرار ؟هل الإستقرار أن تزوَر إرادتى وتكفرنى وتستخدم كلمة ديمقراطية مزيفه لإستقرار مزيف ؟ ، هل الإستقرار أن تسحق حريتى وتفعل أنت ماتشاء وتريدنى أشكرك على إستقرارك أنت ؟الإستقرار ليس سرقة شهيد ولا تزوير صوت ولا غلق حريات ولا دولة مليشيات ولا حرب اهليه ولا فروقات مواطنه ولا شيوخ تخرج ليلاً نهاراً تشوهه فى الإسلام وتكفر الناس ونسوا قول الله تعالى(يَا أَيُّهَا الَّذِينَ آَمَنُوا إِذَا ضَرَبْتُمْ فِي سَبِيلِ اللَّهِ فَتَبَيَّنُوا وَلَا تَقُولُوا لِمَنْ أَلْقَى إِلَيْكُمُ السَّلَامَ لَسْتَ مُؤْمِنًا تَبْتَغُونَ عَرَضَ الْحَيَاةِ الدُّنْيَا فَعِنْدَ اللَّهِ مَغَانِمُ كَثِيرَةٌ كَذَلِكَ كُنْتُمْ مِنْ قَبْلُ فَمَنَّ اللَّهُ عَلَيْكُمْ فَتَبَيَّنُوا إِنَّ اللَّهَ كَانَ بِمَا تَعْمَلُونَ خَبِيرًا)) الإستقرار هو العدل والمساواه والتعليم والصحة وحق  المواطنه وآدميه الإنسان التى كرمها الله وآهانها شيوخ الظلام ، الإستقرار هو الصدق حتى يستقر الآمان ، هو الضمير حتى يستقر العمل للدنيا والآخره ، هو أمن وآمان مصر لا بلطجة وتجارة دين ؟هل حينما آرث أنا و إخوتى مزرعة كبيرة فيمتد أحد الإخوه ليجعل فى ملكه وتحت حيازته 75% من أرض المزرعه بحجة أنه الأقوى وأنه لديه أولاد كٌثر ، وضع باقى الورثه كلهم فى الربع الآخر ، وضيق عليهم الأرض بما رحبت وكفرهم وقسم لهم حتى آخرتهم بأن إن لم توافق على ذلك الإستقرار فمصيرك جهنم وبئس المصير ، فإن لم يعترض الورثه وإستقر الحال لآجيال طويله ، فهل واجبهم بعد ذلك الشكر على نعمة الإستقرار؟؟ هل تريدونا نوافق على  تسلقكم  لتجلسوا على ظهورنا  وتستقروا مدلدلين رجولكم  سنين عددا ونشكركم وإن لم نوافق نصبح كفارا آثمين ، الثوار والشعب المصرى الذى غير التاريخ وهزم كل معتد على حريته وكرامته وهزم كل من أراد تغير هويته وتغير دفة وطنه لجهه واحده يريدها صاحب الجهه المستغله فقر وجهل وطيبة الشعب واللعب على العواطف وتكسير المشاعر بإسم الدين ، لا يمكن أن يقبل أن يحنى بظِهره ليركب من أراد أن يستقر على ظهره من أراد الاستقرار فليستقر على الحق والعدل والخير والمساواة ولا يستقر على الاستثناءات و الجور و الاستغلال ؟.  تأمل كيف أن الله سبحانه وتعالى قد فصل الأمر فجعل الاستقرار حيناً من أعظم النعم وجعله أحياناً من أسوأ النقم. فوصف الجنة سبحانه فقال (( خالدين فيها حسنت مستقراً ومقاما)) وقال عن جهنم (( أنها ساءت مستقراً ومقاما)) فهل بعد قوله تعالى يصرون على أن الاستقرار هو نعمة فقط؟. أن البحث عن العدل أولى و أثوب عند الله من ثواب الشكر على نعمة الاستقرار ، الإستقرار من الأمن والآمان ولا أمن ولأ آمان فى زمن الإرهاب الفكرى والبدنى ، لا يمكن بناء عشة فراخ ومن فوقها عمارة ، لا يمكن بناء الهرم من أعلى المثلث ، مصر قاهرة من أراد بها سوء ، ونهاية كل من بدأ خيانتها وغدرها ، لا للدستور ولا لكل من اراد بمصر سوء ، إخدعنى مرة عارٌ عليك ، إخدعنى مرتين عارُ عليَا.

كتاب سر المعبد للأستاذ ثروت الخرباوى الاخوانى الذى تاب الله عليه بعد فترة قضاها فى وسط الاخوان ....كتاب قمة الروعه 
http://www.mediafire.com/?s97x92p052onoue

الله ........الوطن .........حق الشهداء .......الثورة

fawzy elrashid

y

وطن مسروق ودستور مسلوق

سرقوا الوطن ، سلقوا الدستور ، 
في الحقيقة المُره طعم الأذى يحتم على المرء البوح بأشياء ربما صعبت عليه ذات مرة الحديث عنها وهو خالي الذهن !
ذنوبنا في الحياة هي أننا رسمنا على حائط بيوتنا بعضاً من الأمانٍ وعُلقت في وتد واحد جميع أمانٍينا , وفي كل يوم يلد فيه أحد نعزف أغانٍ في طياتها ثوار أحبة كانوا لنا حضن دافئ , كانوا كطيور تلك التي بسماء مهاجرة باحثه عن وطن , كانوا كالليالي الشتاء البارده التي تهدينا مرارة الغُربة , كانوا كذلك المطر الذي يبارك في الأرض الجدباء وعندما تشتهيه في كل مرةَ ينقضي ولا تأتي بجديد . لا تدعوا تنفطر قلوبنا, برأفة لملموا سهول أحاسيسنا , تضاريس وجوهنا إنمحت بفعل ريح مُعتمه من حرقة شوق الحريه والكرامة ، إنهم يغتالون ثورتنا بأصوات مزوره فى صناديق سوداء بها من الآسرار الكثير فإن تكلمت قالت مالا عين رأت ، ولا آذن سمعت ، ولا خطر بعقل بشر ، فكم جريمة ترتكب بإسم الديمقراطيه ، لم تبقي سنابل أحلامنا إلا كــ حبات متبعثره تحت أقدام آناس لاتريد الخير لمصر بل تريد كل شىء لجماعة طز فى مصر ، مصر التى ضحى من أجلها خير شباب الوطن ، عيوننا كاميرات شاهده على موتهم إن أفسدوا هم كاميراتهم المصطنعه ، ملابسنا مازالت غارقه بالدماء والدموع ، كنا نتمنى وطن حر، به كبرياء الثوره وشرف الكرامه ، لكن وبكل أسف ضاع الحلم على أيدى مغتالى الأحلام وقاتلى الطموحات بدأت باستفتاء 19 مارس مرورا بانتخاب رئيس للأهل والعشيره ، مروراً بدستور العار وكأننا نزرع الاحلام فى بلد بوور ، ولكن لابد من تقليب الأرض ووضع الثورة التى كالسماد للارض فالثورة سماد الروح ،ويجب نزع كل تالف لزراعه الاحلام والحريه ، فلكم دستوركم ولنا ثورتنا وآحلامنا ،لا للدستور ، لا لدولة المليشيات ، لا لقاتلى أحلامنا ، لا لطعنات فى قلب الوطن  لا وألف لا لكل من يريد بمصر سوء ، إسرق شهداء ، زوَر،بلطج ، قولوا علينا عملاء ، قولوا مأجورين، قولوا جبنه نيستون معفنين ، إحنا بردوا مكملين
الوطن أو الموت 
الله......الوطن.....حق الشهداء .....الثوره
fawzy elrashidy

حــوار محمــدين

حوار بين زميلين محمد 1 ومحمد 2 فى وظيفه واحده وتقابلا فى زنزانة واحده بعد ما سال الدم فى عهد كلاهما ودار الحوار كالتالى .
محمد1*..هاى إزيك إنت ليه جيت هنا إنت كمان مع إنك جيت بعد ثورة وجيت بالصندوق وكانوا فرحانين بيك أوى وقالوا إنت هتعدل المايله ، وإنت المنتخب القومى.
محمد2*..أهلا أنا جيت لأنى بدأت من حيث إنتهيت إنت ، إنت أهل بيتك مراتك وإبنك وحماده هِز ودوك فى داهيه ودمروا تاريخك ، وأنا أهلى وعشيرتى واللى أشطر من حماده هِز دمرونى ودمروا مستقبلى وحاضرى .
محمد1*..طيب أنا كنت ممشى البلد بأمن الدوله وعمل فتنة طائفيه مصطنعه على كام حزب كرتونى كده تشكيله معارضه حاطيطها فى التلاجه لوقت اللزوم فقط لكن كان فيه ومكنتش بخلى حد يفكر غير فى أكل عيشه ، وكان فيه حد بيعارضنى وهو بره ولما رجع بردو عارضنى ومعاه واحد سمعت انه خمكم كان بردو بيخمنا  
محمد2*..ماهو أنا بردو عملت كده بس كان عندى آمن دعوه  وعندى برود معارضة مصتنعة من رجالتنا القدامى عملوا احزاب على اساس بتعارضنا لكنهم معانا ، ومخلتش حد يفكر بل خلتهم يكفروا خليت شيوخنا يكفروهم  ، وعملت فتنه وإنقسام بس بين المسلمين وبعض لدرجة إن الانقسام بئى مصرى مسلم ومسيحى ضد إخوانى وسلفى ونفس اللى كان بيعارضك بجد عارضنى وهو سبب اللى انا فيه هو اللى خمنا وشبابهم اللى بيفكر مش زى بتاعنا شمال شمال يمين يمين
محمد1*...الله هو السلفى معاك بردو 
محمد2*..أيوه معايا دوول مع اللى راكب وهما كانوا معاك مع آمن الدوله دلوقت هما أمن الدوله بتاعى عذاب وسحل دليفرى لكل معارض ليا 
محمد1*...طيب أنا كان معايا الإعلام الحكومى كله وبشكله براحتى وكان عندى صفوت شاويش مسرح للرئاسه على كيفك 
محمد2*.. ماهو الإعلام بردوا معايا الحكومى وعندى أنا كمان صفوت دى طلعت شغله وكنت فاكرها إسم  وبالنسبه للاعلام الخاص عندى صديقنا الوفى أبو العلميين حموده بإشاره بيحاصرهم ويرهبهم ويسرق عجولهم ويبنى مراحيض فى أرضهم وعاملهم رعب ومعاه شويه غلمان على كيفك متبرمجين وآخر حلاوه .
محمد1*..طيب أنا كان معايا الحزب الوطنى والشرطة وكل حاجة وكنت مستوطن البلد وعندى مصادرى فى كل مكان وأبجنى تجدنى 
محمد2*..ماهو أنا معايا بردو حزب وطنى الجزء التانى والشرطة دا غير الجناح العسكرى الخاص بدولتنا اللى جوه الدوله ،وأحتلينا كل مؤسسات البلد دا غير الخلايا النايمه وماشابه .
محمد1*..والله يازميل الواحد كان ممشى البلد بالقروض اللى كنتم بتحرموها والمشى فى ديل أمريكا ورضى إسرائيل وهى كانت بترزق 
محمد2*..ماهو أنا يا أخى فى الله بردو جبت قرض ورفعت الضرايب بس قرض مش حرام لأن معاه محِرم وبئينا ديل أمريكا ولإسرائيل أعزائى وأحبائى فى الله 
محمد1*..طيب أنا كنت مصهين على أنفاق اللى بينا وبين غزه بس كان قلبى مع أهلنا  هناك بس كنت بحمى سينا أنت عملت أيه ؟
محمد2*..لا أنا هديت الأنفاق لأنى كنت عاوز أنقل غزه هنا ونكون أهل وعشيره مع بعضينا وبالنسبه لسينا سينا رجعت كامله ليهم ولو كنت طولت شويه كان فيه ناس مكلمنى على قناة السويس وأهى كانت هترزق 
محمد1*.. الله طيب أنا جيت هنا لأن مات فى عهدى خالد سعيد وفى ال18 يوم أحمد بسيونى ومصطفى الصاوى وغيرهم من الشباب عشان كده أنا هنا وقالولى انت اللى هتحاكمنى وتجيب حقهم منى 
محمد2*..وأنا جيت هنا لأنى وعدت فأخلفت وحدثت فكذبت وخاصمت معارضيا ففجرت وعملت لجان ألكترونيه تشوههم ومات فى عهدى جيكا والحسينى أبو ضيف وغيرهم ولم أستطع حمايتهم بل قتلهم أهلى وعشيرتى سبب مصيبتى .
محمد1*...يعنى إنت هنا لنفس السبب ولم يتم محاكمتنا عن الفساد السياسى بل فقط عن الدماء ولم نحاكم إلا بمحاكمات ثورية ودا خليها فى سرك
محمد2* إيوه يازميل لنفس السبب بس المفروض يبئى معانا ناس تانيه اللى سالت دماء فى وجودهم مابينى ومابينك وضحكوا عليا وطلعتهم خروج آمن وهما اللى كسبوها لكن زى إنت ماقلت يازميل محدش هيتحاكم غير لو الشباب فاق تانى وعمل محاكمات ثورية للجميع وأنا خايف يعملوها لأنهم شعب جبار قدروا عليا وعليك وعلى اللى جاى كمان 
محمد1*..قوم بينا ننام ونطلب من ربنا الرحمه والغفران والعفو من الله والشهداء لأن دمهم لعنه علينا 
محمد2*..أيوه فعلا يلا ننام لأنى تعبان من التفكير لأنى مكنتش بفكر وأنا بره كان التفكير بيجينى جاهز وأنا أنفذ آتارى التفكير دا متعب ، منكم لله ياشباب مصر محدش يقدر عليكم لا أنا ولاهو ولا ديكهما 
وفى نفس واحد الاتنين احنا مكناش طالبين سلطة ولا جاه 
وينادى الحارس أمال كنتم طالبين القرب من أمى ، بطل كلام يامسجون منك له عندكم تفتيش بكره ، وطفى النور ونامى محمد1* ، ومحمد2*، فى إنتظار صباح جديد ومصر جديده  مفهاش لا محمد1* ، ولا محمد2* لكن فيها أمة محمد صلى الله عليه وسلم ومسيحو الوطن تحت شعار كلنا مصر .
الله .....الوطن ...حق الشهيد ...الثورة 
fawzy elrashidy

 

وجنت على نفسها براقش

كان يا ماكان فى  سالف العصر والآوان كانت هناك قريه فى حدوته أبطالها آفعى تدعى براقش  وكلب يدعى الحارس. وكان يعيش فى نفس القريه أسد ولكنه لايريد أن يكون ملكاً لانه ليس فى غابه وكان يريد أن يكون الكل ملوك ، وكان هناك نسراً دائم التحليق فى السماء ويشعر بكل طائر جريح وكل من قٌطِفت وردته من ورد جناين القريه ، كما كان يوجد بالقريه غزلان وحمل وديع وأرانب تريد السير بجانب الحيط، فكان الأسد والنسر دائمى الاجتماع بالغزلان والحمل الوديع وحمام السلام وبلابل القريه.
و كان الكلب مسعورا جداَ ويمشى فى القريه نباحا وفسادا ولا يريح أحد ويأكل خيرات البلد ،ويلوث الهواء ويعض كل من يعارضه ، وكانت  الآفعى تعيش فى جحر من جحور القرية فى السر لا يعلم عنها أحد سوى التعابين التى تجاورها ، وكانت تحمى الكلب من أى أحد بنشر سمومها فى القريه، إجتمع أهل القريه فى يوم وقرروا التخلص من الكلب المسعور ولكن نسوا أن يتخلصوا من الآفعى التى أفتكر بعضهم أن فى سمها دواء ولكن نسوا إنه الدواء القاتل ، وبفضل الله وقوة إرادة أهل القريه تخلصوا من الكلب لكن تركوه فى جانب القريه فى مكان ما ولم يتم القصاص منه لما فعله بالقريه ، وخرجت الآفعى وتعابينها من الجحور وكانت على هيئة حبل طيب اللون والمنظر ، حتى تأخذ وضع القرصة المميته للقريه الجميله ، وكان بينهم بعض التعالب وبينهم أيضا بعض الخراتيت التى تصاحبت على الآفعى لاستكمال السيطرة بنشر السم والنطح والرفس فى الكل، وبدأت الآفعى تعقد صفقاتها مع التعلب والديب حتى تتمكن من القريه وبعدها تلدغ الجميع وتعيش هى وعشيرتها من قوم الآفاعى والخراتيت البهلوانيه وحدهم ،وبعدها ستتخلص أيضاً من الخراتيت لانهم مرحلة فقط لتحقيق هدف ، وبعد وقت قصير جدا ظهرت الآفعى على حقيقتها وأنها ليست حبلا طيب المنظر ، وبعد أن إكتشف أهل القريه أنها أكثر ضرراَ على البلد من الكلب فقرووا الخلاص منها لما لاقوه منها بعد موت أبناء القريه على يدها ، فهربت الآفعى ، وجرت ناحية الكلب التى مازالت على علاقه به فى السر وقالت له خبأنى من أهل القريه فخبئها داخل بطنه ولأنها تعودت على الغدر والخيانه كلما أكل الكلب أكله كانت تاكله كله ولا تترك له شيئا وهى فى بطنه ، فقال لها أتركى لى بعض الأكل حتى أستطيع الحياه ، ولكنها طمعت كعادتها ، حتى توفى الكلب جوعا وهى مازالت ببطنه ولم تسطيع الخروج ولا العيش بعد ممات الكلب فنهت حياتها بنفسها وبطمعها وغدرها ، وجنت على نفسها براقش ، وعادت البلابل تغرد من جديد وعاد حمام السلام للقريه وتغنوا فرحاً وبنوا قريتهم من جديد بدون نباح كلاب ولا سم الآفاعى ولا خراتيت تدهس فى أهل القريه .وتوته توته خلصت الحدوته ، حدوته مصريه ، حدوته ثوريه.
الله .......الوطن ........حق الشهداء .....الثورة.
fawzy elrashidy
                       الخال الآبنودى ورسالة لكهنة الإخوان المتآسلمون

حكاية رئيس مخطوف

البوب وصباحى عصابه أيوه عصابه ، يا أم نيازى ، إحيات النبى تصحى نيازى وتقوليلوا البوب وصباحى عصابه وهيخطفوا الريس ، الحكاية بالظبط كما جاءت من مخابرات آمن الدعوه ، بعد تكفير البوب وإتهامه بالخيانه والعَماله ، جاء اليوم حتى يكتشف رجال آمن الدعوه أن البوب وصباحى عصابة اللهو الخفى، ،  وكشف مصدر رفيع المستوى ، هو مش رفيع أوى يعنى وسط كده ، إن البوب وصباحى هيخطفوا مرسى الريس ، كما كشف نفسس المصدر أنه هتقوم عملية الخطف كالتالى ، مرسى وهو راجع من الرياسة وراكب باص الرياسه هيكون وراه البوب وصباحى وعمرو موسى فى عربية نص نقل ومغطيين وشهم ، ويكونوا على تليفون مع شفيق فى دبى لان هيتم نقل الرهينه بعد الخطف إلى دبى ومنها لقطر ، المهم أول باص الرئاسه مايقف هينزل البوب مسرعا هو وصباحى يخطفوا الريس ويحطوا لزقه على بوءه عشان ميصرخش ويفضح الدنيا ، وهيرموه فى صندوق العربيه يكون عمرو موسى على الدركسيون يطلع طلعه أمريكانى بالعربيه بسرعه ، يجى الحراس من جوه جرى يقفوا يصوتوا ، ويقولوا إلحقونا الريس مرسى إتخطف ، طبعا فى الوقت دا هيكون كل المعابر والمطارات أغلقت ، هيطلع عصابة اللهو الخفى عبر الأنفاق على غزه من عند الاهل والعشيره وهيتنكروا فى لبس سبونج بوب ، وطبعا صباحى برنس فى الخم ، ومن هناك هيطلعوا على دبى عند شفيق ، وطبعا هيكون مجهز ملابس وأكل للعصابه ، هياكلوا ويسكروا ويعذبوا مرسى شويه وكل مايقولهم عطشان ، يكبوا الميه قدامه ويطلعوا لسانهم ، بعدها هيتصلوا بالمرشد ، ألو إنت المرشد ، يرد آه أنا المرشد ، يرد البوب طيب مرشد فى إنهى منطقه نيها نيها نيها ، ضحكات شريرة متقطعة ، ويسكت البوب فجاة ويقول إحنا عصابة اللهو الخفى يامرشد ، إحنا اللى خطفنا الطفل الريس مرسى العياط وعمال يعيط أهو ، ولو بلغت البوليس هنعملك عليه شُربه باللحم الضانى ، نياها نياها نياها ، ضحكات شريرة متقطعة ،يرد المرشد طيب سمعنا صوت إبننا الأول ، يرد البوب ، ياصباحى ، هات الطفل مرسى العياط من التلاجه ، خد يا مرسى كلم بابا ، مرسى آلو آلو بيضربونى يامرشد وبيعملوا حاجات وحشه ، ياخد البوب السماعة من مرسى ، ويقول للمرشد ، إسمع لو عاوز مرسى يرجعلك تدفع طائر النهضة فديه والتسليم هيتم فى بيت البهاليل عند أبو إسماعين نفخو ، يرد المرشد مستغرب ، أبو إسماعين !!! هو معاكم ؟؟ يرد البوب وهو يضحك نفس الضحكه ، أيون أبو إسماعين مع اللى راكب وإحنا هنركب نياها نياها نياها ، يرد المرشد ، الله يخربيت يا أبوإسماعين بوظت الواد . وفى النهايه يصحى مرسى من النوم ويكتشف إنه كان فى فاصل إعلانى بين حلمين أو كابوسين ، البوب وصباحى وبكده إفضل صاحى يامرسى وإتفرج على دم ولاد مصر ودستور العار اللى هيخليك صاحى، واللى هيخطفك ثوار مصر مش البوب ولا صباحى ، إنتهى 
الله ....الوطن .....حق الشهداء ....الثورة 
fawzy elrashidy

وقالت الصناديق للخوازيق إيوه

وقالت الصناديق للخوازيق إيوه ، صناديق مطيعة وطيبه دايما تقول نعم ، صناديق مؤدبه جدا جدا ، معروفه أباً عن جداً ، دايما مع اللى معاه المفتاح ، وبما إنها عرس ديمقراطى ، ودا العرس التالت ، يعنى بعد كده لازم محلل ، العرس الأول كان 19 مارس وطبعا العريس موجود والاهل والعشيرة وكان بيتم توزيع الجنة والنار كهدايا عرس من أصحاب الحفله على جثث الشهداء، و كان هناك شهداء محمد محمود عرسان الثورة والحريه مش عرسان النفاق وتجارة الدين ، والعرس التانى إنتخابات الرئاسه اللى كانت عرس غير مرغوب فيه لأن العروسه أم الدنيا وجالها إتنين عرسان واحد قتل ولادها وواحد تواطىء عليه ، ونزل الأهل والعشيرة ومعهم معازيم الليمون وأختاروا المتواطىء ، رغم إنه جاى بولاده وأهله وعشيرته ، لكن ولاد أم الدنيا غلابه وقالوا هنعيش مع بعض فى بيت واحد ، لكن صعب زوج الأم يكون حنين على الولاد اللى جاى على جثث من اخواتهم ، والعرس التالت والتالته تابته ، عرس الاستفتاء على الدستور القندهارى ، وطبعا العريس معروف والمعازيم من الاهل والعشيره بردو ، وبردو دستور جاى على جثث الشهداء جيكا واسلام والحسينى أبو ضيف وغيرهم من عرسان الليله الدستوريه ، وكل مره كالعاده تلاقى عريس فى الكوشه غير الأصلى دايما عريس مضروب فالصو ، وبما إن الإخوان إشتروا من العسكر الصندوق ومفتاحه ، وبئوا زباين صناديق ، والزبون دايما على حق ، ومش مهم 4000 محضر ، ومش مهم عدم إشراف قضائى ، ومش مهم مدرس إبتدائى يعمل نفسه قاضى ، ومش مهم يكون فيه الولد الدوار إبن الشعب ويدخل يشوفك وإنت بتعلم على نعم عشان تطلع تاخد التموين ، ومش مهم تسويد بطاقات جماعى وكأنها رحله ، ومش مهم غلق لجان قبل موعدها القانونى ، ومش مهم تأجر 20 واحد يقفوا فى الطابور ميتحركوش ويمنعوا التصويت ، مش مهم رئيس يصوت فى دايرة غير دايرته وغير محل إقامته ، مش مهم خيرت الشاطر يحط صوته وهو ممنوع من التصويت قانونا لمدة 5 سنوات ، كل دا مش مهم ، المهم الإخوان تعيش وتزوَر وتاخد كراسى وتعمل دستور ليهم ولعشيرتهم ، المهم الشيوخ تكفرنا وولاد أبو إسماعيل تحرق وترهب وتولع ويطلع يقولك والنعمه مانا دا أختشى مونا ، المهم يشوهوا إسلامنا ويقسمونا مسلم ومسيحى ، لكن الصح إنهم قسمونا مصريين وإخوان و سلفيين ، والإسلام برىء مما يفعلون ، وأخيراً لا للدستور بأى نتيجه سواء نعم أو لا ، لا لدولة المليشيات ، لا لدولة الإرهاب الفكرى ، مفيش حاجة إسمها شرع فى الصندوق دا عبارة عن رأى مش عقيده ولا ديانه ، وإلا اليهودى اللى بيحط صوته بنعم يبئى عاوز الشريعه فى بلاده ، هتقولوا علينا بلطجيه عملا خاينين كفار ليبراليين علمانيين ، جبنة نيستون معفنين ، إحنا بردوا مكملين .

الله .......الوطن .....حق الشهداء ....الثورة 

4

fawzy elrashidy

دستور مين والناس نايمين

هى البلد دى ملهاش أصحاب ؟ كل اللى عاوز يعمل حاجه بيعملها كده عادى ، رئيس بدائى يقولك عارف الناس اللى بتخطط 56743 معرفش دى رقم عربيه ولا عدد اللى بيخططوا ، و كمان ساعات بيجتمعوا فى حاره مزنوقه ، وكأن القذافى بعث من جديد ، ودستور كله عوار ولا يمثل إلا الأهل والعشيره فى غزه وأفغانستان وبواقى مصر ، ولما اعترضنا قالك حوار ، راح حضره المعارضين للمعارضه ، يعنى رقاصه وبترقص ، والناحيه التانيه يقولك البرادعى بيستقوى بأمريكا وراجل هولوكوست ، وتبص تلاقى العريان فى أمريكا بيقولك إجتماع البرلمان العربى ، يعنى برلمان محلول ومش موجود وكمان برلمان عربى فى أمريكا يعنى الاتنين ، وكمان بيعترف  بالهولوكوست ، ماعلينا ، نرجع على مصر عند مدينة الإنتاج الإعلامى تبص تلاقى ناس نازلين من كوكب آخر نفس الأحجام ، نفس الدهون ، نفس العقل والفكر ، ومحتلين أرض تابعه لأملاك الدوله بيدبحوا فيها بقر وجِمال وكأنها جزاره ولاد أبو اسماعيين ، أه إسماعين بالنون ، وبنوا حمامات كمان والله أعلم الصرف بيروح فين يعععععععععع ، لا وتعدى بالليل من هناك تسمع شخير وكأنها حرب شغاله تحس إنك فى سوريا وقنابل غاز عاميه المنطقه ، لا وبيعملوا تمارين الصباح ، نطه كمان ، ولبيك اللهم لبيك ، خايف يكون أبو إسماعين مفهمهم إنهم فى مكه ، ويصلوا ويطلبوا رقبه الثوار أو الكفارعلى حسب فهمهم ، نخلص من دوول تطلع على اللى عند المحكمة الدستوريه ، تلاقى نفس الأشكال بنفس الدهون والعقول وكأنهم مطلعين عليهم فى الاستوديو ، والمشكله إن مفيش أى حد من الطرف التالت بيطلع عند دوول ولا دوول ، ويروحوا يهجموا على شباب الحريه فى الإتحاديه ، ويقولك جبنه نيستون يامعفنين ، جبنه نيستون يابرادعى ، ياحمدين ، هى الجبنه رجس من عمل الشيطان ؟ الحمد لله إنهم ملقوش لانشون كانوا هيطلبوا تدخل الناتو ،سؤالى بئى هى الناس دى اللى مستعده تضحى كده كانوا فين قبل الثوره ؟ ، وليه معملوش هما ثوره وطالبوا بتطبيق الشريعه ، وليه ظهروا فجأه كده وخرجوا علينا من الحيطان والكهوف ، الاسلام قادم قادم فى أرض الفرنجه ، وعشان بس هلاقى المبرراتيه يقولك كانوا فى السجن ، ردى عليه يا سى الأمور ياروح أمك على رأى الشيخ عبدالله بدر ، دوول كانوا فى السجون قضايا إرهاب ومليشيات أزهر وغسيل أموال ولم يحبس أحد فى أى قضايا وطنيه ، وأسألوهم وفكروا لو عندكم عقل شغلوه قبل مايصدى من قلة الإستعمال ، وفى النهايه أحب أعرفكم إن مبارك بيحاكم لانه لم يحمى الثوار فى 18 يوم الثوره، لابد من محاكمه كل من تورط فى إسالة نقطة دم مصريه فالدم امصرى كله حرام ،وأختم بقول الله عز وجل،   يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلا يَجْرِمَنَّكُمْ شَنَآنُ قَوْمٍ عَلَى أَلَّا تَعْدِلُوااعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ ، صدق الله العظيم.

((لا للاستفتاء))((لا للدستور)).

الله ....الوطن...حق الشهداء......الثوره

fawzy elrashidy

                                 تعرف على كذب ونفاق الإخوان

                                                             أغنية لا للدستور

                                   زكي بدر يذيع تسجيل لصلاح أبو اسماعيل تاجر العمله

البــاشا حمــار

أبو أحمد له 4 أولاد وبنت وكل مايمتلكه كوخ صغير و حمار ولكن شقى وقطعة أرض يأكل من خيراتها ، ولكنه كان يريد أن يبيع هذا الحمار الشقى لانه  كان بيرفس الأولاد ويأكل ما فى الأرض من زراعه... فنصحه العقلاء بتغير الحمار ...فذهب ليبيعه ويشترى آخر وهو فى طريقه قابل أحد الشيوخ الذى تظهر على وجهه علامات الاستقامه وكلامه كله عن الأخلاق والدين فنصح أبو أحمد أن يشترى حمار من عنده ومعه مجموعة من الخراف وقال له هذا الحمار طيب وايضا تلك الخراف تساعدك على أحوال المعيشه تستغل لحمها فى الأكل وعمل الجبن القريش وتلبس الفرو فى الشتاء وتستخدمه كمفارش للارض فوافق أبو أحمد على الفور وما إن رجع كوخه ودخل من الباب حتى سمع...هاى ، هالو ، هالو ، تعجب أبو أحمد لسماع صوت سيدة أجنبية تنادي من وراء قطعة القماش التي تقوم بدور الباب! لم يصدق أذنه وظن أنه يهذي بسبب الحر.- هاي،هالو؟ خرج أبو أحمد مسرعاً فرأى سيدة أجنبية جميلة وأنيقة ومعها مترجم ويرافقها صحفي يصور كل شيء حواليه خاطبه المترجم ، أنت أبو أحمد؟ ، نعم أنا أي خدمة يا بيه ؟ هذه السيدة هي مدام جاكلين وهي تمثل منظمة إنسانية ذات أهداف نبيله ، أهلاً وسهلاً مرحباً بكم ، أخذ عقل أبو أحمد يعمل بسرعة يا الله يا أبو أحمد والله يبدو أن الفرج قد بان وها قد وصلت يد المنظمات الإنسانية إليك لتنتشلك من البؤس الذي أنت فيه يا ما أنت كريم يارب! قاطع المترجم أفكاره وقال ، منذ مدة ونحن ندرس بدقة أوضاع المنطقة التي تسكن فيها كي نعرف من يحتاج أن نمد له يد العون والمساعدة ، بارك الله فيكم ربنا يعمر بيوتكم ربنا يخلي عيالكم ربنا يفرح قلوبكم ، وبعد دراسات طويلة ومعمقة للحالات المقدمة وقع إختيارنا عليك ، أشكرك يا رب ألف شكر وحمد ليك ، وقررت الجمعية أنها توفر لك مأوى ، قاطعه أبو أحمد وأخذه بالاحضان وأخذ يقبله والمترجم يحاول التخلص منه ، والله انتو جدعان والله انتو أحسن ناس بجد ما يجيبها إلا خواجاتها الناس بتوعنا ولا حد سائل في فقير ولا مسكين هم ساكنين في فلل وأبراج واحنا ساكنين في العشش والخرابات والصفيح ولما يحبوا  يعملو عمل خير يروحو يدو فلوسهم لبتوع اعصار كاترينا في امريكا وكان احنا ماعندناش حد محتاج بس الحمد لله الفرج جيه على ايدكم أنتم يا خواجات يا أمرا ، سيبني اكمل يا عم أبو أحمد احنا ، قاطعه أبو أحمد مجدداً ، بس إن شاء الله يكون بيت ومش شقة علشان أنا ما أقدرش أسيب الحمار بتاعي ده برضه عشرة عمر وكنا سوا في الحلوة والمرة السنين دي كله ، ده هو بيت القصيد ، يعني إيه؟ تعجب أبو أحمد ، يعني أن المنظمة الإنسانية اللي المدام بتمثلها تعني بحقوق الحيوان ، برضه ما فهمتش!! ، احنا شفنا انك بتربط الحمار بتاعك في الشمس من غير ما يكون فيه حاجة تحميه من الشمس ، وبعدين؟ علشان كده همه قرروا أنهم يبنو مأوى للحمار من الشمس والبرد ، طب وأنا؟  إنت إيه؟  أنا أروح فين؟ مش شايفين الخرابة اللي أنا ساكن فيها؟ لا فيها باب ولا شباك ولا سقف حتى!! والله دي مش مشكلتنا ولا اختصاصنا احنا بنعتني بحقوق الحيوانات وبس مالناش دعوة بالبني آدمين!! أصيب أبو أحمد بالذهول والصدمة وقال بقى انتو شايلين هم الحمار وجايين وفد وصحافة ومترجم ومش شايلين همي أنا البني آدم صاحب الحمار؟!! يعني احنا في عيشتنا ما حصلناش حتى الحمير؟
إلتفت أبو احمد فوجد السيدة الأجنبية تأخذ صورة تذكارية مع الحمار ثم ركبوا السيارة وذهبوا ، وما إن  وجد الحمار  تلك كل الاهتمام حتى تمرد وآخذ يعض ويرفس والخرفان تنطح فى أولاد أبو أحمد حتى توفى أتنين من الأولاد وباقى له إتنين مصابين من النطح الخرفانى ..فهل سيتخلص الاولاد من الحمار والخرفان ولا هيوافقوا ويعيشوا كده لان الحمار طلع باشا أو الباشا طلع حمار ، حتى تلك اللحظه مازال أبو أحمد يجر أذيال الخيبة وذهب ولبس الجلابية وخرج وفك حماره وقال شي يا حمار وإلا أقولك تفضل يا باشا ! احسن انا ما بقيتش عارف مين فينا اللي حمار؟!!!!
وفى النهايه تلك القصه أبطالها شخص واحد الحمار والخرفان والباشا والأولاد ، لأن حتى تلك اللحظه لم يظهر البطل الحقيقى الذى يتخلص من الحمير الرافسه والرافضه للديمقراطيه والحريه  والخرفان المتمرده التى تتبع وتنساق وراء الحمار دون النظر للطريق... ولكن البطل االحقيقى قادم وهو الثائر 
الله .....الوطن .....حق الشهداء ...الثوره
fawzy elrashidy

fawzy elrashidy

البرادعى شارل سامحون

العميل العلنى ، والاسم الحركى البوب ، والاسم الحقيقى محمد البرادعى شارل سامحون ، ولأول مرة فى تاريخ العملاء والجواسيس يكون العميل معروف وعادى يعنى ، بس بجد الراجل داعميل بدايتة بئى كانت من وهو طفل ، تعرف ليه ؟ الراجل دا إتولد 17 يونيو يعنى الشهر بتاع نكسة يونيو ،آه نعم مش نفس العام لكن دا للتمويه  ودا كان حركة منه ووالده كمان من مواليد كفر الزيات ، خدبالك من كفر دى يعنى علمانى ، لا وأيه كمان زوجته إسمها عايده الكاشف يعنى اللعب ع المكشوف ، الراجل دا بيروح يقعد على القهوه يشوف  الناس اللى بتتكلم ومعاه جهاز كده صغنن بيسجل ويرسل على طول بكامرتين كمان ، الراجل دا هو اللى خرب مصر شوفتوه عمل أيه نزل من السفر ومعاه أجندات خارجيه أجنده 2011 و2012 و قعد يجمع فى الشباب ويقولهم نعمل ثورة ويغسلهم دماغهم برابسو وفضل يوزع عليهم دبابات وصواريخ وقنابل حتى أنا اتخدعت فيه وأخدت دبابه بس مش عارف مش بتشغل ليه رغم انى ودتها التوكيل عند شباب الأولتراس لكن فيها حاجه ، ماعلينا المهم سيبكم من 18 شهادة ودكتوراه اللى بيقول انه واخدهم من جميع انحاء العالم كلهم مضروبين هو اصلا معاه دبلون زراعه قسم عماله وفول حراتى ، لا وأيه عمال يسخن فى الشباب واعتصموا فى التحرير وعشان مايسبهمش راح اعتصم معاهم رغم انه حياته مهدده بس الفلوس عنده أهم لانه بيقبض باليورو مش زى واحد بيقولوا عليه أسد قال الناس اعتصموا بردوا فى شهر نوفمبر بس السنه اللى فات وقالهم رجلى فيها واوا وسابهم مات 44 شهيد واتصاب 500 وكمان امه امريكيه بس الحقيقه بئى ان البوب أمه أمريكيه والحجاب دا باروكه ، وكمان عميل لاسرايل انا قرأت له مقال فى جريده ،

 ElBaradei: If Israel Attacks Gaza, Egypt Will Strike Back - Business Insider 

تعرفوا دى يعنى ايه علشان فيه ناس بترجم حلو قوى وممكن تترجمها انه بيقول يجب تدخل أمريكا وكدهون ،دى ترجمتها ان لو هاجمت اسرائيل غزه وانا رئيس سافتح الحدود وأعلن الحرب ، طبعا راجل عميل سيبكم منه لكن الراجل بتاعنا اللى ماسكنا دا الله يباركله من غير حرب فاتح الحدود ماشاء الله عليه ، ا وايه عمال يقولك هولوكوست وبيفكر الناس بالكوارث ومحرقة هتلر لليهود وان كلمة هولوكوست تطلق على الكوارث اصلا كلمة هولوكوست حرام . وكمان قال العراق مفهاش سلاح  عشان كده امريكا وقفت ضد ترشحه مره آخرى لمنصب رئيس الوكاله ، آه وكالة البلح ، لانه قال ان العراق فيها نوى البلح زى حضراتكم ماترجمتوه ، وكمان عاملى حزب الكفار لامم فيه كل الكفره والخونه والعملاء اللى بيموتوا من الغيظ

وأخيراً أتمنى أن نكون كلنا عملاء لو العماله كده عملاء فى حب مصر وعملاء ضمير واخلاق فإن كنت انت العميل سيدى دكتور البرادعى فانا عميل وأفتخر وشكرا لحسن تعاونكم معنا واللى لقاء فى عمليات أخرى قادمه

الله ...........الوطن ..........حق الشهداء......... الثورة

fawzy elrashidy