مصر عاشقة النيل

وإن ســــألوك عـــن النيــــل 

فقــــل لهــــم إنــــه شـــريانى

و لـه فـرعـين كقلب عــاشقين 

كلاهما يـــدنوا مغازلا الثانى

فكيـــف نحيـــا بــــدونـــه 

وهو الحــــياة  والوجــدانِ

فهــو ماتبــقى لمصــــــر

 بعـــــد قـــــدوم الإخــوانِ

فلقــــد أهــــانوا الوطـــــن

 وكل غالى  أصبح مهــانِ

وإن ذهـــبت فى الطـرقـات 

أبحث عن وطنى بين الاوطانِ

ســـأرى وطـنى يــــدمع دمـــاً 

على مــن مــات مــن الشـجعانِ

و يريــــدون قطــــع الشـــــريانِ

فلقـــد شغلتمـــونا بدستــــوركم

وجلستــم إخـــوانى وغــريانى

ونسيــتم مـــن قـــــام بالثــــورة 

ومــن مــات من أجــل الانسـانِ

فيـــا نيــــــــــل لاتحــــــــــزن

ســـأقــف عـلى جـــــــانبيك

كالحــارث فـــــــوق الشطئـانِ

فــأنا القـــادم مــــن ثـــــــــــوره

سجنـــوها خـــلف القضبــــــانِ

 لقد قتــــــــــلونى باســـم الــديــــن

جعـلوا مـنى المــجنى عليـه والجــانى

سجنونى وسجين السابق أصبح سجانى

تمــــــــــــــــــــــــــــــــــــــــــــــــرد

فــليس بعـــد الــوطـــن شـــىء ثــانِ

فـــليبقــى الوطــــــــــــن والنيــــــــــل 

و يصبـح الجميــع هـــــو الفـــــــــانِ

fawzy elrashidy

ثورة ولد وبنت

ولـــــد وبـنــت 

كانــوا شعــب جــوه الميـــدان

عـــاشوا دولــه جـــــوه دوله

 كــان فيــه بينــــهم آمـــــان

كانوا  بين الرصاص غِزلان

مسلم يصلى يحرسه مسيحى

 عــم جــورج و مــينا كمـان

مسيحى يتعب يسعفه مسلم

 الشيخ عماد وفاطمه وجيكا

كله مصرى وبس والصفه انسان

جالنا ع الميدان قطيع خرفان

 جمــاعه إسمــها الإخــــوان

معــرفش يعــنى أيه إخـــوان

طيب دى ديــانه ولا جــــنسيه 

ولا مرشد وتبعيه وقلوب عميان

ولا غدر وخيانه ..مليشيات ولجان

ليــه بتبيــــعوا فـــى البــــــلد 

اللى مــــات عشـــانها الــولد

ليــه بتـــوزع فى الحـــــدود

 وعمال بتخطف فى الجنود

ليــــه بتبيــــــع القنـــــــــاه 

اللى مــــات فيــها الجـدود

ماهـو إنـت متعـبتش فيــها

 ولا كنت تحــلم كــده بيها

وحتى النيــل أهــو بيروح

ماهـو أنتم قلـتم طـــظ فيها

طب فاكر الشهدا والقصاص

فاكـــر الــدم يا مصــــــــاص

أتـاريـــك إنــت القنــــــاص 

وجــماعتك هى الرصــاص

 أنــا الثــورة ولــد وبـنت

وهاتمــرد عليــك وأخــلعك 

وأدفــعك دم جــيكا والجِـندى 

هاتمـرد عليك وعلى إخِوانك

فى الكنــايس والجـــــــوامع

فى المــدارس والمــصانــع

فى البيــــوت و الشــوارع

هاتمــرد ومعنـــديش مــــانع

اموت شهيد ماهو ماتلى كااااام شهيد

وهارجـــع ثـــورتى من جـــــديد

ماهــــو بعـــد صيــــام وصـــبر

لازم لابــد يــجى العيــــــــــــــد

كله بالحب ياهبه

هبه هاتبات عطشانه بسبب النهضه اللى وعدونا بيها ،وطلعت مناهضه ، قالك جاى بمشروع النهضه وراح نفذوا فى أثيوبيا ، يكنش دا الحول السياسى ياجودعان ، ولا يكنش البرادعى ولجنة الإنقاذ ، أصلهم أثيوبى ؟، أنا كنت شاكك من الأول دا إسمه حتى البوب ولما بحثت فى إسمه الحقيقى لقيته  مخمد كييدى  ، وصباحى إسمه الحقيقى ، خمدين بوجالى ، وعم جورج إسحق إسمه الحقيقى ، جورج وايا ، منهم لله خربوا البلد ، وشفتهم واخدين حزب الكفار بتاع الدستور ، وحزب المغول بتاع التيار الشعبى ، وشويه عيال من بتوع الجبنه النيستو المعفنين والولاد الوحشين بتوع تمرد ، هما اللى بيبنوا فى السد بتاع النهضه وشفتهم بيلعبوا فى الطينه ،  وهما السبب لما الريس راح ألمانيا قطعوا المعونه ، ولما راح روسيا قالوا ع الأهل والعشيره إرهابيين ، ولما راح السودان وعدهم بحلايب وشلاتين ، وعملوا فيلم خطف الجنود ، فعلا جبهة خراب اعوذ بالله .

والناصر حازم صلاح أبو سماعين طالع يقولك السد دا شغل الثورة المضاده !! ، هااار اسوح ، هو فيه ثورة مضاده غيركم انت وهما ولا انتوا اللى بتبنوه ؟ 
أحب أعرفك اعم الحاج راجع معلوماتك لأن دى مش بيبسى ، موضوع السد دا تم وضعه على الخريطه من سنة 1956 لــ سنة 1964 ودى الفترة اللى نزلت فيها أمريكا أثيوبيا عندما إشترت مصر سلاح من تشيكوسلوفاكيا وجابت روسيا تبنى السد العالى عندنا ، نزلت أمريكا لأثيوبيا وجابت مكتب استشارى أمريكى متخصص فى إستصلاح الأراضى وعمل السدود ،  وعملت خريطة السدود فى أثيوبيا ،وتوقف فتره ، والغرض من السدود توليد الكهرباء وشركة إسرائليه هى اللى واخده الشغل وهى اللى هتتحكم فى البوابات ، وكانت أثيوبيا شغاله في بحوث و اتصالات فى السر حتى جاءت صحيفه انجليزيه كشفته فى مارس 2012 واعلنوا عنه فى ابريل ومضوا العقد بالمفاوضه مش بالمناقصه بمبلغ 4,8 مليار دولار ، والبحيره اللى ورا السد هتتملى فى 7 سنوات وهما دول المشكله على مصر ، وهتخفض 30% من حصة مصر ، وطبعا لأننا فى عصر الحاج مرسى اللى مش حارم أى حد من حاجه واللى عاوز قناة السويس ياخد ، واللى عاوز حلايب وشلاتين ياخد، واللى عاوز سينا ياخد، واللى عاوز جنود ياخد ، واللى عاوز يعمل جيش حر يعمل ، يلا ماهى هيصه بئى ، وعلى فكرة دى من إنجازات الريس المتدين أبو دقن بتاع الإنجازات ، أنه لما يعطشنا علشان نشعر بالفقراء، و أما مالقوش غاز ولا سولار ، عشان محدش يولع فى نفسه ويموت كافر ، وكمان الحبيبه بيمارسوا الفحشاء ع الكورنيش ، بيع النيل لقطر ياريس وكبر مخك ، والنعمه ياريس أنا لو منك تمضى على إستمارة تمرد قبل مانتشرد كلنا ونلف ندور على خيمه ونخلتين إيجار فى أى دوله ، وكله بالحب هانشحت بالحب ونعطش بالحب مش هنلاقى نتف على بعضنا حتى ، الله يخربيت الحب اللى ولع فى البلد
الحل فى التمرد على كل ماهو إخوانى ضيع البلد والثوره وحلم الشباب ، إنتهى 
الله ...الوطن ...حق الشهداء....الثورة 

إتمرد يا إبن بلدى

كان يا ماكان شباب جدعان
نزلوا وهتفوا فى الميدان

قالوا حــــريه قالوا آمان
جالهم غول إسمه الإخوان

مليشيات فى كل مكان

 مرسى بديع شاطرعريان

باعوا الدين و نسوا الديان
 قلبوها مزرعة للخرفان

حبسوا الثوار الجدعان

قنلوا جيكا والجِندى كمان

عملوا فيلم خطف جنود

وجاى بيفرط فى الحدود

و لو سكتنا ع الاخوان

هتقوم مرة مش هتلاقيها
دى صاحبك استشهد فيها

يبئى إتمرد منك ليها

قبل مايجى الدور عليك

خد حقك يلا بأديك

خد حق أختك وأخوك

دوول قتلوه وهيقتلوك

إتمرد فى كل مكان
على مرسى والاخوان

قبل ماتروح فى خبر كان

خلص مصر من الطوفان
من خان يخون إخوان

عيش حياتك بئى إنسان

تمرد قبل ماتتشرد

تمرد على مرسى والإخوان

على الخـــيانه والـــعدوان

عــلى دستور الخرفان

على الكتاتنى والعريان

والشاطر وبديع كمان 

عـلى الشورى واللجان 

تمرد فى كل مكان

 قبل مايبيعوا المكان 

 ماعدتش فيها كلام

دوول ناس بتوع أفلام

تمرد عـلى الصكوك 

 قبــــل مايســـكوك

تمرد ياعم خلى عندك دم

عـلى اللى خــان وبـاع الدم

عـلى اللى سرق ثورتك

عـلى اللى فــتت دولتــك

تمرد على اللى  سرق حدودك

عـلى  اللى خـــطـف جنـــودك 

 على اللى قتــل الـحسينى

وكريستى و جيكا و الجِندى 

و اللى عمل فيلم الجُندى

تمرد على الكدب والنفاق

عـلى اللى سايب الإنفاق

تمرد على اللى سرق حلمك 

عـلى اللى قــتل ولِدك

تمرد عــ اللى أهانك 

عــ اللى حبس ثوارك

تمرد ياعم وخلصونا 

من اللى قتلوا حلمنا وسرقونا

تمرد قبل ماتتشرد 

يلا انقذونا مصر وانقذونا

قبل مايبيعوا مصر ويبيعونا

ميعادنا يوم تلاتين يامتمردييييين

على الاتحاديه رايحين

يقولوا علينا متمردين

جبنه نيستو معفنين

احنا بردوا متمرديين مكمليين 

إخطفنى شكرا

الحمد لله يارب رجع جنودنا من رحلة الخطف على نفقة الدوله وبعد عناء الشعب المصرى والقلق على الخاطفين والمخطوفين ، وفى لحظة تراجع مع النفس وحين قطع الكهرباء عن كل مصر ، قام الخاطفيين بالنظر لوجوه الجنود الغلابه فصعبوا عليهم وحينها قام الخاطفيين الشرفاء الحلوين بالقيام بصلاة إستخاره وإتفقوا على تسليم الجنود من غير الهجوم على الشرطه وحفاظاً على أرواح الجيش قاموا باسوا الجنود فى بقهم وطبطبوا عليهم وقالولهم متخافوش يا قطاقيط هنتصل بــ بابا مرسى يجيى ياخدكم وجابلهم شيبسى ولبان وكانز ، وقلولهم هتوحشونا ياولاد وقاموا حضنوا بعض .

والحمد لله الرئاسه قابلت الولاد الجنود الغلابه ودقنهم محلوقه تمام ولابسين اللى ع الحبل والريس قال خطاب والجنود فى وسط الكلام كانوا بيقولوا لبعض دا مصدق نفسه ياعم إخلص ولا رجعونا للخاطفين تانى ، والريس بيقول العمليه سيناء أطلقت فى العام الماضى ومازالت شغاله ، الله طيب لما هى من سنة وشغاله ، أيه بئى كانت عطلانه يعنى لما الولاد دى إتخطفت ولا أيه ؟!! .

طيب سيبك من الناس ياريس الحقوده دى واللى بتسأل عن صحة الخاطفيين وهما فين وكده إحنا بس عاوزيين نطمن عليهم وهياخدوا قلادات نيل إمتى وطبعا لاننسى دورهم فى حرب أكتوبر المجيده ، وهيعملوا مؤتمر صحفى ولا لأ علشان يوضحوا بس إزاى تمت عمليه الخطف بنجاح والتسليم أيضاً بنجاح لأنه إنجاز يحسب للساده الخاطفين بارك الله فيهم ، وسيبك ياريس من الناس اللى بتقول أفلام ومسرحيات وكلام من دا ، دى ناس جاحده وفلول ، يعنى أيام مبارك كانوا يقدروا يقولوا كدهون ، دى ناس معفنه بتاكل جبنه نسيتو ومتمردين .

أنا بحبك ياريس وبدافع عنك وعلى فكرة انا مش إخوانى بس بحاول أحترمهم ، لكن ليا سؤال بعيد عن الناس الحقوده دى ، بالنسبه للــ 16 جندى اللى ماتوا وهما بيفطروا فى رمضان أيه ، ولا اللى يموت مش تبعنا  ؟؟! وبالنسبه للــ 3 ضباط وأمين الشرطة اللى ليهم سنتين أيه نظامهم ولا اللى مخطوف بجد ميحسبش ؟؟!! 
عموما ياريس ربنا يوفقك والسبكى ولا العادلى جروب يتعاقدوا معاك فى الفيلم الجديد القادم لما تحب تعمل فيلم شوف العصفورة ، بس ياريت تفهم اننا عندنا مخ شغال ومش بناخد حبوب منع العقل زى الجماعه ، ياريت تفهم الشباب المصرى بئى ، منكم لله مليتوا البلد.

 

الوطن الاخوانى

الوطن الإخوانى مليش مكان جواه

أنا وطنى مصر وبس دينى كمان لله

و اللى أهانك يا مصر ألا تبت يداه

فاكر الثورة واللى خانها

واللى سرقها وقتل  ثوارها

 فاكر الحسينى والجِندى

ولا جيكا وخطف الجُندى 

 فاكر طنطاوى وقلادات النيل

وخطابك  الوفى لاسرائيل

 فاكر وعودك وكلامك 

والنهضه  وطائر احلامك

هتقولى أيام مبارك

احنا عملنا ثورة جنابك

وراح شهدا سعادتك

طيب هو ليه الشعب اختارك؟

اللى عصر ليمون وجابك

وأهو الخروف بئى ملك

بس على الخرفان 

مادد أيده فى كل مكان 

يجيب ويدى للاخوان

الحقيقه اللى اعرفها 

شهدا جنبى الموت خطفها

هاتمرد عليك يا بتاع

 بلدى معااك بئت تتباع 

شغل اخوان خيانه وخداع 

ميعادنا فى يونيو يوم تلاتين

ع الاتحاديه كلنا رايحين

وقولوا علينا معفنين متمردين

احنا بردو مكملين

 فاهمين ولا مش ......

المتمرد fawzy elrashidy

تمرد بنت الثورة

تمرد الشعب فلم شمل الثورة ، وتجمع الشعب على أمل جديد ، وأصبحت إستمارات التمرد فى كل مكان وتخطت بوسترات الناصر حازم صلاح أبو إسماعيل ، فى كل شارع وكل بيت ، تحت الكوبرى وفوق الكوبرى ، طيب ليه تمرد الشعب على الحاج مرسى ؟ ، لأن الشعب عصر ليمونه قال هاتولى مرسى وجالهم مرسى بمشروع الدكتور ، والإسم الحركى مشروع الفنكوش ، وقالوله خد ياعم البلد أهى بقناة سويسها بسلطاتها ببابا غنوجها ، لكن عم مرسى عمل أيه ؟ ، زى الراجل اللى قاس رجله بمسطره وكتبها فى ورقه علشان يشترى جزمه جديده فخرج مسرعاً ومعاه ناس تطبل وبنحبك اريس وصل عند المحل ملقاش الورقه اللى فيها المقاس ، رجع تانى يجيب الورقه ووراه الجماعه إياهم ، الله ياكبير نسيت المقاس دا إنجاز لأنك مشغول بالناس العريانه والجعانه تكبيييير ، جاب عم مرسى الورقه ورجع ووراه الجماعه إياهم بتوع تكبير ع القدس رايحين نجيب يهود وراجعيين ، المهم لما وصل المحل لقاه قِفل ، جه واحد من المعارضه الكفره اللى بياكلوا جبنه نيستو المعفنييييييييين المتمرديييييين وقاله هو انت اعم هتشترى الجزمه لحد تانى ؟ ، رد الحاج مرسى وقاله لا ليا أنا طبعا ، و أيام مبارك كنت تقدر تسأل السؤال ده ؟ ، فرد المعارض الكافر وقاله الله ! طيب ليه كاتب المقاس مش رجلك موجوده ؟! رد العم مرسى وقاله الورقه جايانى كده من مكتب الإرشاد فهلل المكبرون وتعالت صدى الأصوات تكبييير ، ففهم المعارض المتمرد أن العم مرسى ماهو إلا إدبح ياذكى ياقدره ، يدبح ذكى قدره ، بيع قناة السويس يا ذكى ياقدره يبيع ذكى قدره ، إعمل  إعلان دستورى ياذكى ياقدره يعمل ذكى قدره وهاهو قد فعلها ، وفهم شباب الثورة أن مصر إنتقلت من مكتب السياسات لمكتب الإرشاد ، حتى القصاص بيملوه ، والمجنى عليه حبسوه والجانى أخلوا سبيله ، وبلدنا ماشيه بضهرها واللى حاكمها خان ، فالح يقول صباع ، صبع وعبيله وثورتنا لما تقوم هتعقر الخرفان ، عشان كده تمرد الشباب وفتح نور جديد لإستكمال الثوره ، واللى يقولك أيام مبارك كنت تقدر تعمل كده قوله أولا آه وعملها د/ البرادعى وبالتحديد أول توكيل من صفوان محمد يوم 27 ديسمبر 2009 ومن وراءه جاءت أدوار الشباب وكان الاخوان بتقول لدكتور البرادعى شد حيلك وإلحق نفسك واتحرك ، وابحثوا عن فيديو عصام العريان وهو بيطلب من البرادعى انه يخلصهم و هتعرفوا وكمان احنا عملنا ثورة عشان منكنش زى أيام مبارك فأصبحنا أسوأ وبدل ماكانت مصر بيدخلوها آمنين بقت بوابه مفتوحه لشيوخ الظلام والمكفرتيه وإرهابى البدن والعقل .

وأخيرا تمردوا على الظلم والظالم ، تمردوا فى كل مكان قبل أن يباع المكان ، ومهما قال عنكم الارهابى المتقاعد يا ليبراليين ياعلمانيين يامسلميين يامسيحييييين ، إحنا بردوا متمردييييييييين ومكملييييييييييييين

الله .....الوطن ...حق الشهداء .....الثوره

عندنا تمرد

المفروض أبدأ المقال بضحكات متقطعه عشان أنا معنديش شبكه ، أه والنعمه إشمعنى هما كل حاجه معندهمش ، معندهمش قناصه ، معندهمش رصاص ، معندهمش خرطوش ، معندهمش فرقه إسمها 95 إخوان ، معندهمش مليشيات ، معندهمش حد بيشتم ، معندهمش حد فلول ، وأخيراً وليس مؤخراً معندهمش إسم مرسى فى أسماء الهاربين من سجن وادى النطرون ، طيب والنعمه الراجل طلع من السجن بعد حماس والأهل والعشيره ماهربوه إتصل بقناة الأهل والعشيره الجزيره أخبار مش الجزيره الرياضيه ، وقالهم أنا أهو هربان والاهالى هربونا وطبعا يقصد أهله وعشيرته بس مكنش لسه حصلنا الشرف وإتعرفنا عليهم ، وكمان الراجل كان طيب وحبوب وقالهم عن الأسماء اللى كانت معاه من غير مايطلبوا والله ، الراجل عشان بيهرب وعاوز يرضى ضميره قال للمذيع تحب اقولك على كل الأسماء وبلغ عنهم هههههههههه ، وربنا راجل زى العثثثثل وقال للمذيع تحب تعرف الأسماء ، معانا 7 من مكتب الارشاد ، محمد مرسى وعصام العريان وسعد الكتاتنى ومحى حامد ومحمود أبو زيد و مصطفى الغنيمى وسعد الحسينى ، وباقى الإخوان هم حسن أبو شعييع مسؤول الإخوان فى كفر الشيخ وماجد الزمر وسيد نزيلى مسؤول الإخوان فى الجيزه ومصطفى الغنيمى وعلى عز مسؤول الاخوان فى اسيوط وأحمد عبد الرحمن مسؤول الاخوان فى الفيوم ، وبعد عم الحاج مرسى مابلغ عن الأسماء قاله بص بئى هاقولك على مكان السجن كمان ،فى طريق مصر إسكندريه الصحرواى فى الكيلو 97 أسوار السجن تقع على الطريق الصحراوى سجن 2 عنبر 3 ، سجن وادى النطرون شمال غرب القاهره بحوالى 100 كيلو ، والنعمه يامصريين دا كلام الريس وشهادته بنفسه  ، طيب إزاى بئى مكنش محبوس وملهوش إسم فى السجن ، الله طيب كنا بنحلم والمكالمه دى فوتوشوب والثورة فوتوشوب ومبارك مش محبوس والاخوان لسه محظوره ؟ّ! وقانون شرق التفريعه مش صحيح؟! ، والبركه موعدش الزوول السودانى بحلايب وشلاتين  وكأنه بيوزع من أرض الجماعه والزوول طبعا ماصدق ، ومصر مش بتتباع؟! ، ومفيش قانون صكوك ع القفا؟! ، ومفيش حد مات ولا أتصاب ولا إتخطف ؟! ، ومفيش العمليه نسر بتاعة ال 17 جندى اللى اتقتلوا فى رفح ؟! ومفيش أصلا رفح ؟!  ، بس لو كله دا فوتوشوب أحب أعرفكم إننا عندنا عقل وضمير حى لم يمت مثل ضمائركم ، إحنا فعلا معندناش نهضه وطلعت فنكوش لكن الاكيد عندنا شهداء دمهم مازال على هدومنا ، عندنا الشيخ عماد ومينا وجيكا وأبو ضيف وكريستى والجندى وغيرهم، ولو تجننونا وتوهمونا إنها  كلها خيالات زى الإنجازات ، ولو حاولتم تقنعونا إن الجندى مات بحادثه عربيه ، أحب أقولكم إن حسن البنا مش شهيد ومات فى حادثه عربيه بردو ، لأن كان تار بعد ماقتلتم النقراشى باشا ، وزوجه النقراشى أخدت تارها ، هاتقولى إزاى هاقولك زى الجندى وكمان الجندى مكنش تار دا كان بيدافع عن مصر وثورتها اللى اتسرقت، إحنا مش هنود ولا رابطين الفيل بره الشقه ، إحنا شباب مصر لو متعرفوناش إسألوا التاريخ اللى بتشوهوه وتزوروه ، بس الأكيد معندناش رئيس ، ومعندوكوش دم ولا ضمير .

وفى النهايه ياشباب مصر تمرد على كل ظلم وظالم ، فأجدادك المصريين جمعوا توقيعات  سنه 1917 لتفويض سعد زغلول لحضور مؤتمر الصلح والمطالبه بإستقلال مصر عن بريطانيا  ووقع علي التوكيلات 54% من المصريين وبعد أن رفض المعتمد البريطانى والملك فؤاد الأول تلك التوكيلات ونفوا سعد زغلول إلى جزيرة مالطا 1918 ، على آثرها إندلعت ثورة 1919 ، وكان الهتاف الإستقلال التام أو الموت الزؤام ، وحاليا فى 2013 يجمع الشعب المصرى توقيعات لتفويض الشعب بإزاحة الإحتلال الإخوانى ، وإختيار رئيس لكل المصريين وليس للأهل والعشيره ، ونفس الهتاف اللإستقلال التام أو الموت الزؤام ،  وفق الله شباب مصر المتمرد الثائر.
الله ...الوطن ....حق الشهداء......الثورة

كباريه الأخلاق الحميده

تبدأ قصة كباريه الأخلاق الحميده ببنت إسمها سنيه ، جات من الفلاحيين ومن قريه بسيطه و نزلت إلى القاهرة ، وهى لا تعلم عنها شىء سوى أنها مصر المدينة الكبيرة ، وهى تسير فى شوارعها ليلا ، تقابلت مع شخص عليه علامات الورع وذبيبه بديعه فى وجهه عباره عن فطريات ، وبعد أن حكت سنيه حكايتها له ، قال لها هذا الشخص البديع الكلام ، حظك حلو ياسنيه ، لأن أنا عندى مكان بيجتمع فيه الأغنياء وأصحاب المشاريع والمصالح ، وكان عندى سيده شاطره ، ولكن لظروف كده مش هتنفع تكمل فى المحل دا ،هو عباره عن ترابيزات ، فيه ترابيزه عليها ناس هتهللك وتسقفلك ، وترابيزه عليها بلطجيه يحموكى ، وترابيزه عليها حبايبنا من الخليج ، وترابيزه عليها ناس بتكفر و تفكر بنصها التحتانى وبس ، وترابيزه عليها حبايبنا من الامريكان واليهود ، ردت سنيه وقالت كباريه ياعنى ياحاج؟ ، رد الحاج وقالها لا حاشى وماشى دا كازينو للأخلاق الحميده ردت سنيه وقالت يعنى هاشتغل رئاسه ياحاج ، رد الحاج لا ياسنيه إسمها رقاصه ، لأن الرئاسه دى شغله سياسيه لكن رقاصه بتاخدى كل حاجه بالسياسه ، ومتعمليش زى الفلاح اللى أول ما إتمدن دهن دوافر الجاموسه مونكير وربط الأرافته وحط الأُله فى البلاؤونه ، قالت له حاضر ياحاج المهم أعيش وتكون راضى عنى ، خدها الحاج لعماره كبيره وأجرلها شقه وقالها متخليش حد من السكان يعرف إنتى إشتغلى أيه وإلبسى عبايه كباسين وإنتى رايحه الشغل وتحتها الميكرو والمينى ، وإنتى راجعه متآخر من الشغل قوللهم إنك شغاله ممرضه وهتعالجى كل الأوضاع فى المستشفى ، وهما لما هيشوفيكى بتصلى على كلمتين فى الدين هيصدقوكى ، وفعلا قدرت تخدعهم لأن سكان العماره طيبيبن أوى ياخال ، وفى يوم عمل سكان العماره إجتماع علشان ينتخبوا حد من السكان يكون مسؤول عن العماره من سباكه وكهربا ونظافه ، يعنى كبير العماره ، وقالك علشان الديمقراطيه نعمل قُرعه ، وعلشان سنيه خدعتهم بالمنظر والكلام ، وقالتلهم إنها عالِمه بكسر اللام وأتاريها عالَمه بفتح اللام ، وعصر البعض ليمون وقالك دى كويسه ، لحد مارقبوها وعرفوا هى بتشتغل أيه وعند مين ، وإنها ضحكت عليهم وخدعتهم وعاوزه تاخد كل العماره لأهلها وجماعتها وعشيرتها واللى بيطبلولها، وبعد مافرقت بين الجيران وعملت فتنه ، وجابت كام واحد من قرايبها يساعدوها اللى يتحكم فى توزيع العيش ع العماره واللى يتحكم فى الدش المركزى لاعلام العماره ، حتى اللى  عنده دش خاص  جبتله واحد بتاع استثمار يتحكم فيه كمان عن طريق ضرايب على الطبق  وحجمه وكدهون ، وجابت شويه عيال شغالين صدى صوت يشوهوا فيهم وفى أى حد ضد سنيه وجماعتها ، وواحد تانى كان ساعدها انها توصل للعماره جبته عشان اى خلاف قانونى يبئى يفصل قانون كده ع الماشى يمشى مساءل الحاجه سنيه واهلها وياكلوا جاتو مع بعضيهم ، على كام واحد كده يظبطولها المسائل ، والمصيبه إن الحاجه سنيه وجماعتها عاوز تبيع العماره شقه شقه واللى مش تتباع تتأجر رغم إن فيه ناس ضحوا بدمهم وعرقهم عشان يبنوا العماره دى ، وكانت سنيه وعدت بالقصاص للناس اللى ماتت وهى بتدافع عن العماره لكن إزاى رقاصه هتقرأ القرآن وهى لابسه بدلة رقص الجماعه ، المهم حاليا فيه شباب من العماره عمل حركه وأسماها حركة تمرد على سنيه وجماعتها ولازم كل العماره الشريفه تساعد شبابها فى لم أكبر توقيع لرحيل سنيه ، والعماره عاوزه بس شرفاءها يرجعوا ايام ماكانوا بيبنوها من سنتين ونص ، وبرجعوا لنفس الروح ويرجعوا حق الشهيد وحق الحى وحق المسجون جوه سجن او جو شقته ، والاهم إن أصحاب العماره مكملين عشان ياخدوا حقهم من سنيه ، وفتواتها ويرجع الأمن والآمان للعماره

الله....الوطن .....حق الشهداء....الثورة

سوريا فوق الدماء والعرب ماااااااء ماااااااء

يا اهل الدين والسياسه والإنسانيه وكل ماتريدون من نداءات ليس لكم علاقه بها ، سوريا تضرب فهل تعقلون ؟؟ ، أم إنكم متفقون ومنتفعون ؟! ، أين من ينادوا بنسف إسرائيل وإسرائيل تنسف كل ماتبقى من رجوله وأوطان عربيه سيوفها خشب وكلامها جعجعات نحويه ، ياساده يامن تبقى لكم من بقايا عقول وتفكير ، إسرائيل وحلفاؤها الأمريكان والقطريين وأغبياء السياسه الجدد يقومون برسم ملامح شرق أوسط جديد بتخطيط أمريكى إسرائيلى وتنفيذ قطرى إخوانى ،هل تعلمون أن لو سقط الجيش السورى سيسقط بالتبعيه الجيش المصرى ، هل تعلمون أن إسرائيل لا تهاب سوى ثلاث جيوش عربيه وهى العراق وسوريا ومصر ، سقط الجيش العراقى وستسقط سوريا وستتحول الدفه للجيش المصرى ، ولاأريد أحداً ان يكلمنى كلام كوبى وبيست بأن مصر مش سوريا ، سوريا تعتبر لمصر مثل سيناء فهى مفتاح لمصر ، لابد أن تعلم إسرائيل وغيرها أننا لا نريد عدواناً على أحد ولكن أيضاً لا نضع رؤوسنا فى الرمال ، ولابد ممن جعلهم الله قدرنا أن يكونوا فى مقدمه إتخاذ القرار المصرى أن يكونوا واضحين ولا نريد صدى صوت باننا نُدين ونشجب وكلام منتهى الصلاحيه ، فكيف أن تكون مع إسرائيل وصديقكم الوفى ، ونفس الوقت مع حماس المواليه لإيران وإيران مواليه لبشار الأسد الغير راضى عنها الاداره المصريه التى ذهبت لروسيا تطلب أعانته ومعونته وهى مع بشار ، لقد جن جنوننا من الإداره المصريه الغير واضحه المعالم والغير مرسومه الطريق الواضح ، أين إتفاقيه الدفاع المشترك مع سوريا ؟! ، هل تعلمون ان نظام بشار الأسد غير مهدد لإسرائيل وفى خلال التلاتين عام الماضيه لم تطلق رصاصه واحده من سوريا على إسرائيل ، ولماذا إسرائيل تضرب فى سوريا ، ولما هذا السكوت العربى ؟!! ، هل هناك من شىء ما يدار تحت التربيزه غير سرقة الثورات وشرق اوسط جديد خالى من الرجال ، ولا يوجد به غير أشباه الرجال ؟!! ، هل تعلم أنه فى غارتين إسرائيليتين على سوريا توفى 300 انسان وليس من بينهم فرد من عائلة بشار ، مهما أختلفنا مع بشار ونريد محاكمته فلا تجعل كرهك لبشار يعميك عن الواقع وهى تقسيم سوريا وكسر جيش عربى قوى ودى بداية طريق وتحقيق أمل للعدو بمساعدة سمسار الفتن والدماء مايسمى بأمير قطر ، ومساعده أغبياء السياسه الجدد الإخوان المتآسلمون ، ودماء السوريون ستذهب هباءاً كباقى الدماء العربيه ، أين من قتلوا ال 17 جندى فى رفح وما هى أخبار العمليه نسر ، ولتعلم الاداره المصريه أن سوريا أمن قومى لمصر وان سقط الجيش السورى فانتظروا المزيد لمصر ومن وراءها الأردن وستتوالى السقطات العربيه ، وليعلم الجميع انها كانت ثورة شعب ويتم سرقتها مثلما سرقت الثورة المصريه بطرق وخطى ممنهجه ، نحن مع الشعب السورى فقط لا مع بشار كشخص ولا مع الجيش الحر الذى بدأت اتشكك به لما فيه من خوارج كتر ومرتزقه ، ولابد من إتخاذ كل الحذر لأن بيتم حاليا تجهيز مايسمى بالجيش الحر فى مصر وبيتم تدريبهم فى غزه وفى صحراء ليبيا ونفس السيناريو هيتكرر فى مصر فى حالة وقوع العمود الثانى للقوى العربيه وهو الجيش السورى ، وإن كان ولا بد من تدخل لابد من دبلوماسيه عربيه بحته مثلما حدث  فى اليمن دون المساس لا بالجيش ولا الدماء السوريه فالشعب السورى تسرق ثورته وأرواحه ، ولا يهمنا سوى الدماء السوريه وعدم تفكك سوريا والحفاظ على كل نقطة دم سوريه  ، ولا أتعجب لمن هللوا وباركوا ضرب سوريا لان هم نفسهم من قالوا على ست البنات لابسه عبايه كباسين وأيه وداها هناك ، فهم نفس العقول العفنه وصدى الاصوات المرتعشه التى تشبه أنكر الاصوات ، وكحاملى الأسفار لايفقهون سوى اللهم (شى - هِس) فقط ، وفى النهايه مهما كنا ضد بشار لا يمكن نسمح بقتل اخواتنا وأهالينا على يد الصهاينه ولا على يد غيرهم  ولابد من تدخل عربى بحت لتقارب وجهات النظر بين النظام والمعارضه واستكمال الثورة السوريه ، لابد أن يرفع الجميع رأسه من الرمال ونبطل نغمة أيام مبارك لأننا عملنا ثورة من أجل أن لا نتسول كرامه لأن لو فضلنا كده هنمشى نقول وطن لله ومش هنلاقى ، وخلينا فى نغمة أيام النهضه اللى طلعت فنكوش واغتالت احلام الثورة المصريه  (لكِ الله ياسوريا) .

إهانة طويل العُمر

كان فيه جماعه ورثت شركه ميراث غير شرعى ،  لكن أهو اللى حصل وخلاص ، ورثوها بعمالها بخيرها بكل مافيها وكانوا بيحلموا بيها من زمان ، لكن مفكروش إزاى يديروها ، وحبوا يجيبوا رئيس ليهم وكانوا جايبينه عشان يختم الورق والختم فى الدرج ، أه والنعمه الختم فى الدرج ، ويمضى و بس ، ويطلع ع الشركات اللى جنبه يستلف شويه ورق على شويه حاجات ويرجع مره مجبور الخاطر ومره على الله ، وياريت اللى هيجيبه  هيدخل للشركه ، لكن ياحرام دا رايح عند الجماعه اللى جبوه رئيس ، وكان كل مايشرب سيجاره بنى يطلع يقول أنا جدع وطبعا فيه ناس بتصدق انه جدع لأن دى شغلتهم ، شغالين صدى صوت ، ولو دقنه طلعت شويه يقولوا ياسلام ع الإنجاز وكأن باقى الناس دقنهم بتطلع لجوه وهو الوحيد اللى دقنه بتطلع لبره ، ولو ابنه جاب أقل من 90% يقولوا ياسلام على القناعه والإنجاز ، وكأن اللى جايب فوق ال 90% جايبهم قرض بفوائد ، نسيب الانجازات شويه ونشوف الشركه و لأن الشركه فيها لعب كتير، وكان مشغل شويه عيال زى البصاصين يشوهوا كل شريف فى الشركه وينقلوا أخبار مفتكسه وإنجازات من الخيال العلمى ، ومبرراتيه ،وشوية بهاليل تانيين بودى جاردات للى يعارض الباشا طويل العمر يجروا يحاصروه وممكن يولعوا فيه عادى يعنى دا شرع عندهم ، وشوية شيوخ دجل لزوم الشعوذه واللعب بعواطف البسطاء بإسم الدين ، وشويه أونطجيه فى الشركه سماهم مجلس شورى الشركه عشان يمرر أى مصيبه بيعملها ريس الشركه وحاشيته ، وشغالين بيع فى الشركه حته حته ،ومش واخدين بالهم من إن فيه عمال للشركه بيحبوها بجد من قلوبهم وواقفين لهم بالمرصاد مهما عملوا، ومش واخدين بالهم إن العمال دى شافوا زمايلهم بيموتوا عشان الشركه تكبر والكل يعيش من خيرها ، لكن تقول أيه للى قرده مات وأشتغل قرداتى ، لازم يعمل هو عجينة الفلاحه ويتنطط وطول ماالقرد بيلاقى اللى بيسقف له لازم يتنطط أكتر ، لما حد من العمال يقوله إنت بتنطط كده ليه زى القرد يقوله انت بتهنى ياولد ،وينادى على بهلول الحارس الخاص يابهلول خدو ع الحبس ، ولا لما يشوفوه شارب السيجاره البنى ويقول أنا جدع ، وبتوع صدى الصوت يقولوا أه والنعمه جدع ويصدقوا بعض ، تلاقى العمال الأحرار يقولوا لا مش جدع والشركه تستحق واحد أفضل منك ، يقولهم أنا مش جدع ؟ دى اهانه وينادى على البهلول الخاص ، يا حاج بهلول خدهم على السجون بتهمة إهانه رئيس الشركه وكأن رئيس الشركه ضد الميه ضد النار ضد الاهانه اللى عملها لنفسه وأهان قيمة الرئاسه وأهان كل العمال لأنه واجهه للشركه وما أسوأها واجهه ، ولأنهم متمرسين غسيل أموال وتزوير وخيانه ، ولأنهم كانوا مسجونين وكل قدوتهم هو السجان ، فقرروا يطبقوا سجنهم الصغير ليكون سجن كبير على كل الشركه والعمال ، لكنهم نسيوا إن اللى بيكسر صوت الرصاص بصوته قادر يكسر سور السجن ، واللى قدر يكسر الرصاص بعينيه ، قادر يكسر القناص ، و قرر العمال إنهم يحرروا شركتهم ممن ورثوها وبيخربوها وأقسموا إنهم مكملين لأن الشركه تستاهل حد أفضل من اللى فات ومن الموجود ومن أى حد بيفكر فى الكرسى وبس ومصلحته ومصلحة حاشيته ، ومكملين لأن اليأس خيانه والخيانه عار لا يعرفها سوى أهل العار اللى سرقوا شركتهم بورق مزور وصفقات على دماء زمايلهم ، وميراث غير شرعى ، إنتهى.

ياعزيزى كلنا فلول

ياعزيزى كلنا فلول ، والكل أصبح  يتمسح فى الثورة وكأنها بنت حرام ، والكل لابس توب الثائر ، والثائر الحق أستشهد وأصيب و اعتقل أو مازال ينبض جسده بقايا ثورة ، مبارك أول من دعى للثورة كما قال محاميه ، والمجلس العسكرى عمى الثورة وقال حماها ، ومرسى بيستكمل طريق عبد الناصر ، فاضل بس صباحى يكمل طريق حسن البنا ، و من منا ليس نظام قديم ، كلنا عشنا فى زمن نظام مبارك ، ونعيش و نموت فى زمن نظام مرسى والنهضه، فلول بس بدقن ، وماذا تعنى كلمة فلول ؟؟ الفلول هم بقايا الجيش المهزوم المنكسر ، وكانت هذه الكلمة متواجده منذ زمن بعيد فى أوساط العرب والبدو وكانوا يطلقونها على أى شخص يهزم فى حرب أو معركه ، أو حتى خلاف عادى بين القبائل ، ومن معنى الكلمه التى يرددها البعض دون فهمها ، يتضح لنا أننا كلنا فلول لأن كلنا خاسرون ، فلقد خسرنا سياسيا وأدبياً عندما سكتنا على فساد 30 عام ، وخسرنا أيضاً عندما سلمنا البلاد بعدما هزمنا الفساد إلى فساد أكثر ،لأننا لم نحافظ على نجاح ثورتنا وتمت هزيمة الثورة من جديد ، بصفقات من فلول قدامى وفلول جدد وتم خداع الثوار ، وبعدما كنا نحاول نثبت أننا بنى آدمين لنا حقوق فى الوطن ، أصبحا نسعى حتى نثبت أننا مسلمون ، وأننا مواطنون فى وطن مسروق ، وبه دستور مسلوق ، وأصبحا من زمن التفكير فى المستقبل إلى زمن التكفير وصكوك الجنه والنار ، وأستخدمت كلمة فلول كفزاعة فقط للتخويف والتخوين ورددها الكثيرون دون فهمها ، وستأتى كلمات أخرى من بعدها كفزاعات ، مثل جبهة الخراب أو ليبرالى أو علمانى ، وكأنها الليبراليه أو العلمانيه أصبحت ديانه عند بعض الببغاءات المردده للكلمات دون فهمها ، و نحن لا نتسامح مع أى من أفسد الحياه السياسيه ، أو مع من يده ملوثه بدماء المصريين ، فهنا يسمى قاتل أو خائن أو باع ضميره من اجل كرسى ، فيجب محاكمة كل من أسفك الدماء المصريه ، وكل من ساهم فى ذلك ، وكل من لم يحمى تلك الدماء ، فالقاتل كما المتواطئ كما الساكت عن الحق  ، فالحزب الوطنى ذهب وحل محله الحزب الوطن الاخوانى بجناح الحريه المسلوبه والعداله الزائفه  ، ولن أقول مثل الجميع بأن الجيش سلم مصر للأخوان ، بل أقول سلم الجيش الاخوان للشعب المصرى ، وتعرف الشعب على تجار الدين ومن يدعون أنهم أولياء ودعاة دين وعرفهم الشعب ، وسيطيح الشعب بهم قبل بيع مصر بالصكوك الإسلاميه ولاأدرى أى إسلاميه تلك التى تبيع البلاد أو ترهن ترابها التى ضحى من أجله خيرة باب مصر، فلقد تجاوزت أحلام الإخوان حتى مرشدهم ، وتجاوزت طموحاتهم ، فالأخوان عباره عن شخص واحد  والباقى صدى صوت فقط ،  فهم كانوا يحلمون بالخروج من السجون المصطنعه لان ليس منهم من سجن فى قضايا وطنيه بل كلها مليشيات وغسيل أموال وخيانه ولكم فى عملية الكربون الأسود 1989 عظه ولابد من محاكمه مرسى بسببها ، فهم كما جماعة تعيش تحت الأرض وفجأة كسبوا شقة سوبر لوكس ، ومن أطماعم قرروا بناء 10 أدوار فوق تلك الشقه دون أى دراسه ، سوى اللهم ثقه ومشورة اهل وعشيرة ، فما للبنيان إما ان يهدم أو يتم بيعه لمستثمر قادر على هدمه وبناءه كما يريد هو وجماعته ، فهل ينتظر شعب مصر وقوع البلد أم بيعها أم يلحقون بما تبقى منها ، وفى النهايه يجب محاكمة مبارك سياسيا حتى وإن لم يقتل الثوار فهو المسؤل عن حمايتهم ، ويجب محاكمة الإخوان ومرسى لأنه فى  عهده قتل الكثيرون ، ويجب محاكمة المجلس العسكرى ، فالجميع مُدان ، ولابد من تغير الجرح على نظافه ، ولابد من محاكمات ثوريه ، فالثورة التى لاتحكم تحاكم ، وحين يسكت أهل الحق عن الباطل ، يتوهم أهل الباطل أنهم على حق ، فالثورة ليست كوبى وبيست ، ولازم من استكمالها وبأى طريقه ، فإن لم يتم إستكمال الثورة وحق الشهداء ومعرفة الطرف التالت المعروف جيدا ، فاسمح لى أن أقول لك ياعزيزى كلنا فلول ،  إنتهى 

الله...الوطن....حق الشهداء .... الثورة

fawzy elrashidy