إخطفنى شكرا

الحمد لله يارب رجع جنودنا من رحلة الخطف على نفقة الدوله وبعد عناء الشعب المصرى والقلق على الخاطفين والمخطوفين ، وفى لحظة تراجع مع النفس وحين قطع الكهرباء عن كل مصر ، قام الخاطفيين بالنظر لوجوه الجنود الغلابه فصعبوا عليهم وحينها قام الخاطفيين الشرفاء الحلوين بالقيام بصلاة إستخاره وإتفقوا على تسليم الجنود من غير الهجوم على الشرطه وحفاظاً على أرواح الجيش قاموا باسوا الجنود فى بقهم وطبطبوا عليهم وقالولهم متخافوش يا قطاقيط هنتصل بــ بابا مرسى يجيى ياخدكم وجابلهم شيبسى ولبان وكانز ، وقلولهم هتوحشونا ياولاد وقاموا حضنوا بعض .

والحمد لله الرئاسه قابلت الولاد الجنود الغلابه ودقنهم محلوقه تمام ولابسين اللى ع الحبل والريس قال خطاب والجنود فى وسط الكلام كانوا بيقولوا لبعض دا مصدق نفسه ياعم إخلص ولا رجعونا للخاطفين تانى ، والريس بيقول العمليه سيناء أطلقت فى العام الماضى ومازالت شغاله ، الله طيب لما هى من سنة وشغاله ، أيه بئى كانت عطلانه يعنى لما الولاد دى إتخطفت ولا أيه ؟!! .

طيب سيبك من الناس ياريس الحقوده دى واللى بتسأل عن صحة الخاطفيين وهما فين وكده إحنا بس عاوزيين نطمن عليهم وهياخدوا قلادات نيل إمتى وطبعا لاننسى دورهم فى حرب أكتوبر المجيده ، وهيعملوا مؤتمر صحفى ولا لأ علشان يوضحوا بس إزاى تمت عمليه الخطف بنجاح والتسليم أيضاً بنجاح لأنه إنجاز يحسب للساده الخاطفين بارك الله فيهم ، وسيبك ياريس من الناس اللى بتقول أفلام ومسرحيات وكلام من دا ، دى ناس جاحده وفلول ، يعنى أيام مبارك كانوا يقدروا يقولوا كدهون ، دى ناس معفنه بتاكل جبنه نسيتو ومتمردين .

أنا بحبك ياريس وبدافع عنك وعلى فكرة انا مش إخوانى بس بحاول أحترمهم ، لكن ليا سؤال بعيد عن الناس الحقوده دى ، بالنسبه للــ 16 جندى اللى ماتوا وهما بيفطروا فى رمضان أيه ، ولا اللى يموت مش تبعنا  ؟؟! وبالنسبه للــ 3 ضباط وأمين الشرطة اللى ليهم سنتين أيه نظامهم ولا اللى مخطوف بجد ميحسبش ؟؟!! 
عموما ياريس ربنا يوفقك والسبكى ولا العادلى جروب يتعاقدوا معاك فى الفيلم الجديد القادم لما تحب تعمل فيلم شوف العصفورة ، بس ياريت تفهم اننا عندنا مخ شغال ومش بناخد حبوب منع العقل زى الجماعه ، ياريت تفهم الشباب المصرى بئى ، منكم لله مليتوا البلد.