إمنع الإنتخابات وإعمل عصيان مدنى

الحل الوحيد لوقف عجله إنتاج الدم اللى راكبها الإخوان وكل من يسير فوق الدماء المصريه وكأنها وصلة تزحلق على الجليد بطرق أكروبات بهلوانيه بالكدب والنفاق حتى أصبح الكدب والنفاق من عاده لعباده ، الحل فى منع الإنتخابات البرلمانيه الإخوانيه بكل أنواع الطرق ، والعصيان المدنى الشامل ، ومحدش يقول مقاطع أو عاوزين ضمانات علشان تكون نزيهه ، أولا نزيهه دى الله يرحمها مع من يسفكون الدماء ، واللى سرق شهيد سهل جدا يسرق صوت الحى ، واللى مقاطع وبس زيه زى اللى بيشارك لأنه عباره عن متفرج على خراب مصر وضياع حق الشهداء والأحياء ، لأن فى كل الأحوال اللى معاه الصندوق هو الكسبان وسيبكم من إن الناس كرهتهم ومخنوقه ، لكن الصندوق بيحب اللى معاه المفتاح والمفتاح مع سارق الثورة والصندوق وسارق الأحلام ومغتال الحقائق  ،فإن كانت هناك شرعيه فهى شرعية صندوق الشهيد لأنه غير قابل للتزوير.و اللى بيقولك إنقلاب عسكرى وان العسكر هينقذوه من حرامية الثورة ، أحب أقولهم إن العسكر كان بيآمن المسروقات دى لحد ماوصلت مكتب الإرشاد وأخدوا قلادات نيل ، الثورة مش هتنجح ولا يتم إنقاذها بتداول الأدوار بين العسكر والإخوان ، الثورة بالثوار وللثوار ، وهناك فرق كبير بين اهلنا وإخواتنا فى الجيش وبين العسكر ، واللى يقولك يشكروا عشان مضربوش زى سوريا وليبيا ، لازم تفهم إن سوريا فيها الجيش مخترق واللى ماسكهم ماهر الأسد إبن عم بشار يعنى حفاظ على نظام بشار ، أما فى ليبيا كلها كانت كتائب إما أولاد معمر أو مرتزقه بفلوس ، أما فى مصر الجيش هو ولادنا واخواتنا وأهلنا ، ولو تم إختراقه هيكون جيش للنظام الاخوانى ألعن من سوريا وليبيا ، زائد مليشيات وهيكون حرس ثورى للنظام زى إيران.
فى النهايه إمنع الإنتخابات وخلص مصر من النظام الإرهابى وأعمل عصيان فى كل مكان ودا الاستقرار لان مش ممكن تغير جرح على قذاره لازم تنضف الأول وبعدها تغير ع الجرح
الله.....الوطن.....حق الشهداء والأحياء.......الثورة
fawzy elrashidy