ألــووو يا مصــر

ألوو ألووو.. ردى بئى ..ردى يامصر وحياة ثوارك ..ورحمة شهداءك .. يامصر ليه بس تليفونك مقفول ، ولو إتفتح بيكون مشغول ، سيبانى ليه محتار على طول ، بقول كلامى وفين الرد ، ألووو ألووو ، طب ردى ع الخط التانى ،خط الكلام الإنسانى ،مكالمتى ليه مقطوعة ، ليه الحرارة مرفوعة ، ومرارة الناس مفقوعة ، وكلام أونطة وجزب وشد، ألوو ألووو ، ياسينترال بعيار فالت ، أنا هاتصل تانى وتالت دا انا كلمتى ياما اتقالت وهاقولها مهما تزعل حد ، رغم السكات سامع دوشة , ومزايدة وصراع ومناوشة ، مترمميش جدران بايشة ، إبنى الجديد والحيل يشتد ، يا أم الكتابة المسطورة ليه من بكاكى مفطورة ، كام مرة سدتى فاتورة ، مملكش غير كلمة وهدمة وعزيمة قايدة ومحتدمة ‘إزاى أكون برة الخدمة وأنا رصيدك ساعة الجد.

ألووو أيوه يا مصر ، مصر سمعانى ، أنا إبنك يا أم الدنيا أرجوكى ردى عليا ، ليه مش سمعانى ، رغم الدوشة اللى فيكى أنا سامعك ، سامع بكاءك على ولادك اللى راحوا اللى جٌم من بطنك ورجعوا لبطنك ، أنا اللى باقى منهم ومعايا إخواتى فى المعتقلات ومصابين بس صدقينى كله يهون يابهيه ، مصر يا أما ردى عليا.

ألوو أيوه ياإبنى عامل أيه وحشتونى ياثوار يا أطهر من اجنبت بطنى ، سامحونى يا ولادى حاسه
إنى مش أمكم حاسه إنى مرات أبوكم ، بعد ماخلعت الأولانى اللى كان واخدنى منكم وحرمنى من حضنكم وقلت خلاص هاضمكم وتعيشوا فى حضن أمكم جانى عريس تانى بضحكة مغشوشة وذبيبة منقوشة قالى هكون آمين وولادك هما ولادى لحد ماأخد غرضه ورمانى ورماكم اتاريه له جماعة تانيه والقديمة تحلا حتى لو كانت وحله أنا تايهه يا ولادى .

ألووو أيوه يا أمى إحنا اللى غلطانيين سبناهم عليكى وقلنا هتبقى سعيدة رغم ‘إن زوج الام عمره ماهيكون عم لكنه هو الهم صدقينى راجعينلك يا أمى وهتعيشى ويانا وترجع ضحكتك ، آه إنكسر ضهرك على ولادك اللى راحوا وتجاعيد الزمن بانت على وشك لكن والله راجعينلك نرجع ضحكتك تانى وتقعدى ع الترعة تغسلى شعرك زى العروسة البهية ..

ألوو ايوه ياابنى هاحكيلك اللى جرالى فى بعدكم ، بقى عندى محرقة يومية بتحرق ولادى الطيبين الكادحيين ، عندى ناس بتاكل لحم ولادى وتمص دمائه ، عندى اعلام كاذب ورؤساء صحف تهتم بأكل الحكام وشربهم ولا تهتم باكل ولادى ولبسهم وفضائيات ارهاب فكرى لأولادى ، وناس يا ولادى غريبة عليا بيقولوا انهم من صلبى بس دوول مش ولادى بيقولوا اسلاميين وبيقسموا الدين وناس تقول أقباط مهجر ، لا لا أنا ولادى مصريين مش دوول ولا دوول ، أنا حاسه فى بعدكم يا ثوارى ‘إنى اتعرضت فى وقت واحد لضربة ، إعصار من ماركة توسنامى مع زلزال قوى مقياس ريختير ميقدرش يسجله على ضربة كيماوية ساحقة انزلها بى اعداء الداخل ، تعبت ياولادى 

ألوووو يامصر يا أمى متزعليش وبلغى اللى حبسينك اننا قادمون وهم المغادرون وقوليلهم كلمة أخيرة والحدق يفهم ، الضغط يولد الإنفجار والإنفجار يولد الأبطال والإنتصارات وان اكتر حاجة تؤلمننا كثوار اننا عندنا كتير ليكى يا أمى لمستقبلك ومستقبلنا ، ولكن فيه ناس عاوزانا على دكة الإحتياط ، معاش مبكر ، حماس وحب ليكى يا أمى لكن مع وقف التنفيذ وهانفذ بس اصبرى راجعيين والله راجعيين 
فى آمان الله يا أم الدنيا 
فى آمان الله يا ولدى سلامى لأخواتك الثوار والفاتحة لاودى الشهداء 
الله ...الوطن ....حق الشهداء ....الثورة 
fawzy elrashidy

fawzy elrashidy