دستور قندهار بطعم الفتة

اللجنة التحشيشية للدستور خرجت علينا من مطبخ العك السياسى بمنشور عن الدستور الجديد وهو اشبه بصينية فتة دستورية ولكن مدسوس بها كل انواع مكسرات الارهاب الفكرى الوهابى والافكار الطائفيه المتزحلقة فوق غلاف الشرع ولكن الخلاف ليس على الشرع الخلاف على من يطبقون الشرع ، انه دستور يخدم مصلحة جماعة متآسلمة ولا يخدم مصلحة إسلام ولا وطن ولا اى دين ولا حرية ولا رأى بل صينية الفتة الدستورية لهم فقط لكل من أكل معهم أو منهم فى المطبخ الإخوانى السلفى السياسى فهو آمن  وطبعا الفاتورة على حساب الشعب ، والشعب يغسل الأطباق فى الصندوق بنعم للجنة ولا للنار وطبعا بمسحوق  الغسيل العقلى اللى بيصنعوه فى مصنع الارهاب الفكرى التابع لهم ولخدمة مصالحهم ، كيف لهولاء ان يكتبوا دستور تاركين فقهاء الدستور والقانون 
سوف اتكلم فقط عن مادتين فى الدستور وطبعا هو مكتوب فى صيغة 48 مادة وكلهم عباره عن كبسولات سامه لكن كل ماده على حسب خدمتهم والمادة الفعاله لمصالحهم وطز فى الشعب ياخد مسكنات عادى .. اولا المادة 14-( تكفل الدولة التوفيق بين واجبات المرأة نحو الأسرة وعملها فى المجتمع ، ومساواتها بالرجل فى ميادين الحياة السياسية والاجتماعية والثقافيه دون إخلال باحكام الشريعة الإسلاميه ) عاوز اعرف بئى مين اللى هيحدد انها تبع الشرع ولا لا وكمان هى المرأة كانت قبل كدة عايشة فى بيت ابو لهب وعاوزينها تعيش فى الدين الجديد ولا هما عاوزينها عبارة عن جارية فقط  لها بيتها وخلاص ويتزوجن فى سن التاسعة والشرع بيقول تتجوز 4 ، وطبعا المادة سوف تفعل بطريقتهم ، هما  نسوا ان الست دى كانت فى الثورة وهى اللى وصلتهم انهم يكونوا أصحاب قرار.
ثانيا المادة 46 ( الرموز الوطنية المعنوية واجبة التوقير والاحترام ويحذر ازدرائها وفقا للقانون ) وطبعا الرموز دى ستتحول بقدرة قادر لكل ماهو رمز متآسلم بمعنى مفيش خروج عن الحاكم وإياك تقول رأيك هانقطع لسانك ونسجن حريتك أو بمعنى إخرص ياشعب ، وطبعا هيقولك ما هو الشعب هيستفتى على المواد دى وأصلا الشعب مش عارف يعنى أيه مواد ويعنى أيه دستور إلا من رحم ربى من مثقفى البلد والغير مطبلين مهللين مبررين ، لكن اللى هيعرفوه ان نعم للجنة ولا للنار والصندوق قال كلمته وغزوة الصناديق وصوت جاهل واحد كفيل بضياع أمة كامله 
وأخيرا أحب أقول معركتنا هى عدم تمرير هذا الدستور النووى رغم أعمال لفت الانتباه وتشويه الشرفاء لكن إصحى ياشعب وياشباب الثورة معركتنا هى الدستور مصر رايحة لقندهار آخر فى الفكر وصومال آخر فى الحياة ، لا ولم ولن نتركهم يسرقوا مستقبلنا كما سرقوا ثورتنا . ولازم تفهموا اننا عملنا ثورة وضحينا فيها ومعملناش ثروة بتتوزع عليكم .
الله .... الوطن ....حق الشهداء......الثورة
FAWZY ELRASHIDY