نظـــام أستيـكـا

إمسح كمان يانظام جبان ، كنت فاكرك جاى تمسح دمعة الأُم ، كنت فاكرك هتحاكم اللى هدر الدم ، كنت فاكرك جاى تزيل الهم ، وانا اللى سبت امى فى غدر إخوانك ، دور فى دفاترك عليا ، هتلاقينى أنا الشهيد ، أنا اللى جبتك من بعيد ، وحطيتك ع الكرسى الفريد وقلت مصر هتبقى احلى  لكن يا خسارة دمى فيك ، جيت بذبيبه ووش بشوش ، وجبتلنا مشروع فنكوش ، مكنتش اعرف انك زى بوش إمسح كمان يانظام جبان ، عاوز تمسح التاريخ ، عاوز تمسح ذاكرة الثورة ، صدقنى مش هتقدر يبئى لسه معرفتش يعنى أيه شباب ثورة ومفهمتش يعنى ايه ثورة رغم انك لو دورت فى دفاترك هتلاقى اللى جابك على راس النظام هما اللى إنت بتمسحهم من ع الحيطان بس يا خسارة مجهودك الضائع لأن الصورة فى قلوبنا والثورة فى عقولنا ،  ياريت زى مابتمسح صورة الجرافتى حاول كمان تمسح الثورة  وترجعلنا الشهدا ، 
، طب قولى هى الصور عملت أيه عملت ثورة ع الحيطان ولا إنت افتكرت انهم هيرجعوا تانى مع المعتقلين ويبدأو الثورة من جديد ولا انت فصلت الكلام غلط كعادتكم إن الشهدا أحياء ، فهم احياء عند ربهم يرزقون ، متخفش منهم اوى كدة فهم أحياء رغم موتهم، وأنتم أموت رغم أنكم أحياء.
تاريخ الثورة معروف والله ماهما تحاولوا تغيروه أو تبدلوه مش ممكن هتسطروه إنتم كما تشاءون لأنه متسطر بدم الشهيد اللى رسم ملامح البلد دى وجيتم إنتم وبتحاولوا تغيروه ، التاريخ مش مجرد وجوه وكلام وتبريرات ، التاريخ ذاكرة محفورة فى الوجدان مرسومة بالشهداء ، حاول تمسح ملامحنا الثورية وعزيمتنا القوية وشوف رصاصكم وأمنكم ومليشياتكم ولا نظرة صورة شهيد وبطل حى بيجيب حقه ومعتقل منتظر يكسر القفص ويطير، لو اتحذفنا من ع الحيطان هانحذفكم من ع الارض لان الحيطة مبنيه بصورتنا والارض مرويه بدمنا ، ومهما تحاولوا تمارسوا سياسة لفت الإنتباه مرة برفح ومرة بفيلم ومرة بتشويه الشرفاء واخيرا مسح الجرافيتى ، احب اقولكم قضيتنا هى الدستور ومش هنسهى عنه دا قضية شعب ورخصة وطن ...سياسة غبية وقديمة ، سياسة لفت الانتباه.
وأخيرا  وبعد كلامى منتظر المبرراتيه يبرروا ويهللوا كالعاده وكأننا انتخبنا نظام مبررومهلل فقط يانظام غبى عمرك ماهتفهم مطلبى لأانك مش نظامى دا نظام سكسونيا 
الله ....الوطن .... حق الشهداء ....الثورة
fawzy elrashidy