يعملوها الخونة ويقع فيها الشعب

كلمتين لازم أقولهم ، خايف أندم على أيام مبارك رغم إنى من أشد معارضية ، كلام هاقوله وأريح ضميرى لما عملنا الثورة دى طالبنا بحاجات من حقنا ، حاجات آدميه وحقوق لأى مواطن عادى ، لم نطالب بمال أو ثروة أو شو إعلامى ، كان هدفنا بسيط وحلمنا أبسط ، عيش ،حريه . عداله إجتماعية ، مصر كانت متجوزة النظام القديم الفاسد جواز  كاثوليكى ، أخدناه منه ودفعنا الفاتورة غالى جدا من أرواحنا وشهداءنا اللى مازل دمهم وحقهم ضايع ، لكن للأسف سلمناها لجماعة بتغتصبها وتبهدلها وتبيعها ، خايف أكون وقعنا فى فخ إعلام وخطة ممنهجة وهمونا بأشياء ليست تضمن إلا صفقات فى الخفاء ومصلحة جماعة ، مثلا أرصدة المخلوع ،والطرف التالت اللى هم أصلا المليشيات ، وموقعة الجمل اللى مازالت لغز  ،  خايف أكون سلمنا البلد للى قتل ثوارنا وشهداءنا لأن كل الشواهد بتقول كده ، من الخروج الآمن وقلادات النيل وشوارع تكتب بأسماء من قامت الثورة ضدهم من نظام فاسد سابق ،  لــ سينا اللى بتتباع بعد ما ضحينا كتير من أجلها ،لــ خروج جماعات الإرهاب من السجون وإستدعاءهم من الخارج وحذف أسماءهم من ترقب الوصول ، لــ مصالحة الامريكان و أخذ اسرائيل بالاحضان ، لــ غاز مصر اللى مازال يضخ لإسرائيل والشعب مش لاقى الانبوبة إلا من رحم ربى ومعاه كوبون الحرية والعداله ، لــ خط الانابيب اللى مش بيتفجر من وقت قدومهم على راس النظام ،  لــ شيوخ الظلام اللى ظهروا فجأة وبيكفروا كل ما يعارض رأيهم ، لــ من يريدون تطبيق الشريعة وكأنها ظهرت فجأة وكأن مصر ستفتح من جديد ، لــ اللى بيطالبوا بتكسير الآثار وكأننا بنتعبدهم ، فى النهاية أن لا أدافع عن نظام مبارك لانى على مبدأى والقاتل زى المتواطئ مع تبادل أدوارهم ،ومرسى مش رئيس مصر ، مرسى عضو فى جماعة ، سيبكم من لعبة الصناديق ،و لو مش قادرين نسلم البلد للثوار اللى دفعوا فاتورة تحريرها غالى جدا ، أو لرئيس ثورى يبئى الافضل ترجعوها زى ماكانت قبل فوات الآوان ،والبكاء على اللبن المسكوب، وخليكم ماشيين على نهج المر من أجل الأمر اللى وصلتونا للمرحلة دى بسببها وكان فى أيدنا لا نوافق على المر ولا الأمر  ، واللى هيقولى حنيت لأيام مبارك هقوله مازلنا فى أيام مبارك ومعاه  هدية كمان جماعة ألعن من مبارك ، واللى يقولى موتوا بغيظكم هاقوله موتوا بغباءكم . اللى مش فاهمين كلامنا ، إحنا بردوا مكملين وزى ماسبتونا فى كل اللى فات من ماسبيروا لمحمد محمود لمجلس الوزرا للعباسية لبور سعيد وزى ما قلتوا علينا بلطجية وخونه وعملاء احنا بردوا مكمليين

خلص الكلام يامن تريدون تكفيرنا بأجمل شىء وهى ثورتنا ، حسبى الله ونعم الوكيل 

الله .......الوطن ......حق الشهداء......الثورة 

fawzy elrashidy

مكمليين