وبعدين يا بلد ؟؟

وبعدين يا بلد رايحه على فين بعد ما مات ولادك الطيبين واتسجن حرية ولادك الباقين جوه الزنازين واتصاب اجدع ولاد مخلصين .

جابولنا اتنين فى انتخابات الرئاسة قاتل ومتواطىء علشان عارفين الشعب بيحب الأمثال الشعبيه وقالك المر من أجل الأمر وأهو راجل بيعرف ربنا مع العلم إن كل الناس تعرف ربنا ومصر بلد متدين بطبعه ، لكن مجلس القلل قالك حط دا عشان لما يحصل مظاهرات ينزل اتباعه يضربوا فى الثوار ويمنعوا اى مظاهرات ونسوا ان شباب مصر عنيد وبيقف فى وش الرصاص وعيونهم اقوى من القناص واسألوا رضا عبد العزيز وحرارة ، قالك رئيس ثورى طيب إزاى بس ثورى وكل أفعاله ضد الثورة بدل مايحاكم القاتل طلعهم خروج آمن بصفقه قذرة مات فيها 17 جندى فى رفح ، طيب حد يعرف حاجه عن الجناه ولا لجنة اخفاء الحقائق كالعاده ؟؟؟ بعد ماساب الشباب الثورى فى السجون وخرج شركاءه فى الاجرام السياسى باسم الدين ، وكمان جالنا شيوخ من زمن الكهوف تحرم وتكفر كل من يعارض النظام وكأن النظام نظام قرآنى أو دينى ، فبعد ان كانت القروض حرام أصبحت حلالا ، وبعد ان كان الكذب واختلاف الوعود وخيانة الأمانه من صفات المنافق أصبحت من الدهاء السياسى ، أنا مش عارف هى مصر كانت يوم 24 يناير 2011 دولة كافرة وعملنا ثورة علشان ندخل الدين الجديد؟؟ وهل الشريعة تخاطب اهلها أم تخاطب كافة الوطن يعنى تطبيق الشريعة يكون على المسلمين فقط أم على كل مواطن أم نطبق الشرع وكل بديانته واحكام شريعته ، وهل تطبيق الشرع يحتاج حياه كريمة وعدل وناس عادله أم تطبق كما هو عليه ، ومن هو المطيق هل ذاك أبو دقن أم ذاك ابو ذبيبه أم المسلم الذى سلم الناس من لسانه ويده وحاليا لا يوجد ذاك المسلم الذى نريد ان نرى الاسلام فيه لا هو فى الاسلام وخلاص . قال عمر بن الخطاب عندما جاء يسد يتهم خادمه بأنه سرق منه . قال له عمر بن الخطاب للسيد الشاكى " لو سرق خادمك مرة أخرى لقطعت يدك أنت " منتهى العدل والحكمة والإحساس بالفقراء . ياسادة لايوجد بيننا عمر بن الخطاب فى عدله بل يوجد عمر بن مرسى ومرسى وجماعته ، وأخيرا الدستور النووى ، الذى لم يذكر فى الاربع مسودات اللى طلعوا بيها اللجنة التحشيشية للدستور كلمة مواطنه غير مرة وحيده ، ولازم نفهم ان الدستور بيتحط للمشرع اللى هيحط القوانيين وطبعا معروف من هم ترزية القوانيين وهو الحزب الوطنى الجديد يعنى اللجنة جهزت القماشه والمقاسات والحزب الوطنى الجديد يفصل والشعب يلبس كالعادة ، معركتنا هى الدستور لانه دستور وطن مش  دستور جماعه ولا دستور أبوهم ومصر مش عزبه أبوهم ، وكمان غلق محلات بدون أى مسؤليه ولا احساس بالشارع ، ولا كام شاب هيقعد من الشغل ولا كام تاكسى هيركن من الساعة 10 والقهاوى وزيادة البطاله اللى هتزيد وميناء بور سعيد والاجانب اللى بترسى مراكبهم بالليل بالساعات وبيحبوا يتسوقوا من البلد ، ليه تمنع الرزق والسياحه ، ليه تعمل حاجه دون دراسة جدوى ونظرة مشمله للنتايج ؟؟

منتظر الشتيمه من اللجان الاكترونيه والمطبلتيه والمبرراتيه وميمنعش بتوع الليمون بردوا ، موتوا بغبائكم ، دماغنا مش هانسلمها لحد

الله ...........الوطن ...........حق الشهداء ........الثورة

fawzy elrashidy

رايحه على فين يامصر