طائر النهضه العجيب

طائر النهضه العجيب وموطنه الأصلى قطر ،وله دقن وكرش وكوارع وصدر منفوخ ومنقار طويل وصوت جعار ، ويتغذى على الدستور المسلوق،ويلد بيض عباره عن مانجا، وهو عباره عن طائر نشأ عن تزواج غراب وبومه ، وكانت النتيجه طائر النهضه العجيب ، وهو عباره عن طائر يعمل بالوقود حتى وصل حال شعب النهضه بأن يحدد لهم 5 ليتر بنزين فى اليوم للسياره ودا طبعا لأن طائرالنهضه يحتاج بنزين كتير أحسن ميطرش والشعب ماينهضش ، كما أن طائر النهضه يتغذى على عيش المواطنين ولا يأكل الجبنه النيستو يامعفنييين ، لذلك قررت الحكومه اعطاء 3 أرغفه لكل مواطن ودا طبعا علشان الطائر ياكل ويشبع ويعرف يطير زى العصافير ، كما أن مصروف طائر النهضه بالعمله الصعبه ومش بيستعمل جنيه الغلابه الجنيه إبن البطه السودا المصرى ، فلازم نعوم له الجنيه ونغرقهوله ونرفعله الدولار واليورو علشان يعرف يعيش لكن الشعب يعيش ميعش عادى هو انتم أصلا هتعيشوا ليه المهم الطائر ياشعب جاحد حاقد ، وبما إن الطائر بيطير فمش لازم يعنى أى حاجه بتمشى ع الأرض يعنى نولع فى القطارات والأتوبيسات ونغرق المراكب لان دى كلها كماليات فارغه ملهاش لازمه مادام كده كده هتموتوا يبئى نساعدكم ع الموت ، منها نخلص منكم ومنها نخلص من المواصلات التعبانه دى واللى عاوز يروح شغله ولا مدرسته يركب دقن وجناح ويطير زى طائر النهضه العجيب ، وبما إن الطائر مش بيحب الشريك وشغال فريك ،فلازم نولع له فى حديقة الحيوان لانها ملهاش لازمه مادام عندنا طائر النهضه ، ولازم نخربله السياحه ونفضى له الفنادق علشان يلف فى البلد براحته ويسيح بمزاجه ويقف ع الأهرامات وياخد جوله فى قناة السويس قبل ما تنكتب باسمه لأن الطائر المدلل لازم يدلع ومن حق الطائر يدلع ، ونعمله صكوك اسلاميه ومش مهم تخالف شرع أو تكون معاه ماهى الديمقراطيه والعرس الديمقراطى اختلاف بردوك ، وعلشان الطائر حامل وعاوز يستقر فلازم نقوله نعم يا إستقرار يامستققريييين 

من الآخر علشان الشعب دا ينهض فعلا لازم يدبح طائر النهضه العجيب دا اللى طلع فنكوش ويشرب مرقه الطائر العجيبه ويعيش ويبئى طائر النهضه يامغيبـييييييييييين.

الله ...الوطن .....حق الشهداء ......الثوره

fawzy elrashidy