ملعون أبوك ياسكوت

ياقلوب متلونه بالغدر والخِسه لو كنتم فاكرين حلمنا ممكن يموت متفرحوووش ، الثورة إتولدت فكره ومش ممكن تموت ، الأرض إاللى بترتوى بالدم بتطرح بطل يكمل المشوار، مش ممكن الثائر الحق أو أى إنسان آدمى يساعد الظالم على ظلمه ، أو الفاسد على فساده ،جاء خياط إلى سفيان الثورى فقال له إنى أخيط ثياب السلطان، أفترى أنى من أعوان الظَلمه؟  فقال سفيان بل أنت من الظَلمه أنفسهم ، ولكن أعوان الظلمه من يبيع لك الإبره والخيط ، لا يمكن أن نساعد الظالم على ظلمه ، والفاسد على فساده ، فلتكن مصر صوب أعيننا وليكن الشهداء قبلتنا لإستكمال الثوره وأهدافها ، بكل تأكيد هناك مشاكل قائمه  بسبب شياطين الثوره التى دخلت بين الثوار من أحزاب كرتونيه وأقنعة تتساقط ونفاق وصفقات على الدماء ، ولكن الشباب والثوره بينهم حب ودم ، و حالياً بينهم الشيطان الأكبر الذى يريد أن ينهى علاقة الشباب بالثوره بل بمصر كلها ، مرة بنزول المليشيات والعصابات ضد الثوار وأخرى بخطف الشباب وأخرى بتلفيق التهم وكتم الحريات وأخرى بإختلاق فتن وانقسامات مره مسلم ومسيحى ومره اختلاق فيديوهات عبيطه لشباب يدعون أنهم من بور سعيد لإفتعال أزمه بين الأولتراس الأهلاوى والبورسعيديه ولكن افتكاسات مفقوسه لأن الشباب أوعى بكتير من تلك الخزعبلات وأى كان الحكم فى كل القضايا المسرحيه ، وأخرى بغلاء الأسعار وضرب السياحه وشراء الفنادق بأقل الأسعار وتكوين إمبراطوريه رأسماليه، وأخرى بيبيع مصر باسم الشرع بما يسمى بالصكوك الاسلاميه التى تحق للمالك بيع أسهمه لاى حد حتى لو ليهودى او قطرى ، وبعد أن فتحت بلاعه مصر وخرج منها شيوخ ظلام تكفر الناس وارهاب فكرى وتشويه للدين لابد من ثوره تنضيف مصر من العقول المتحجره العفنه .

 وفى النهايه كلمه لدكتور البرادعى وأ /حمدين صباحى ، الشباب نازل يوم 25 لاستكمال الثوره ورحيل النظام اللى مش نظام وتخليص مصر من الاحتلال الاخوانى ، مش علشان دستور وانتخابات ، لكم دبلوماسيتكم ولنا ثورتنا وميدانا ، الدم مش وجهات نظر وغير قابل للتفاوض ، ومع كامل الاحترام لسيادتكم ووطنيتكم التى لا يختلف عليها سوى الغير وطنيين والخرفان التى لاتفكر ، ماحضراتكم إلا شركاء ثوره ولكم آرائكم كثوار ولستم كمرشدين ولسنا كخرفان ، واللى مش فاهمين نزولنا احنا مكمليين ومستمرين لأننا شباب بنعشق الموت ومش بنخاف لان الموت هو اللى بيخاف من شباب الثوره والرصاصه مازالت فى عينى ومحدش كاسر عينى وهناخد حق الشهدا وحق الجيزاوى وحق وفاء وحق مصر من مغتصبى الاحلام وسارقى الطموحات ، ومحطمى الكرامه المصريه ،إنتهى.

الله.....الوطن.....حق الشهداء ......الثوره

fawzy elrashidy

                                        ملعون أبوك ياسكوت