كان ياما كان ولد مصرى اصيل ملامحة مصريه احلامه عصرية عاش حياتة برة مصر عاش الكرامة ..عاش الحرية لكن جواه هموم وطنية كان شايل هموم بلده حاسس بولاد بلدة عيونة حيرانه على البلد قلقانه فكر هو وشباب زيه قالوا يلا نعمل ثورة... ثورة مصرية أفكار مصرية مفهاش أجندة خارجية مفهاش عمالة اجنبية مفهاش مصلحة شخصية لكن فيها قضية وطنيه ..وكانت البدايه يوم 25 واتجمعوا الأحرار ونادوا ع الثوار يا أهلينا أنضموا لينا ..يلا يا ولاد سلميه سلميه ..ونزل الاحرار وهتفنا باعلى صوت الشعب يريد اسقاط النظام ..كان جوانا نار و غضب وجات جمعة الغضب واشهد ياكوبرى قصر النيل على شهدا مصرين ولاد طيبين راحوا فى غمضة عين ..كان جوانا أمل قابلونا بالجمل واتجمعوا الخاينين على قتل الطيبين ..وفاتت الايام ورفعت ثورتنا للمداولة 18 يوم كنا دولة جوة دولة مفهاش عبيد ولاسيد مفهاش اخوانى ليبرالى علمانى مسلم ومسيحى سلفى كان فيها مصرى وبس و مرت الساعات ووصلنا للاستفتاءات وبدأت الانقسامات اللى كنا بنحميهم وبيحمونا قالوا انت اهل جنة وانت اهل نار واشتغلوا الاشرار ...وبدأت الصفقات واتنسى اللى مات ..ودوروا ع الكراسى وسبونا فى ماسبيرو واندهس مينا واحد من اهالينا وسبونا فى محمد محمود وقالوا بلطجية شهدا عواطليه واخدين ترمادوول ..وقالوا على ست البنات ايه وداها هناك ..ومجلس الوزرا وبور سعيد اللى راح يشجع رجع شهيد ووزارة الدفاع والبلد تتباع ...ودخلنا ع الانتخابات جابولنا فلول وفلول والشعب قال هاختار المر ولا المرار اتارى الاتنين نفس الاختيار ...وكانت النهايه من اللى قالوا حموا الثورة طلعوا ان الثورة هى اللى حمتهم من جمال وابوه واختاروا واحد وجابوه ...وسابوا المعتقلين فى السجون وخرج ارهابين ووضعوا بصمتهم على شبابنا فى سينا اخدوهم غدر وخيانة وكل اللى هيعملوه ياسادة كالعادة لجنة اخفاء حقائق ..وفى النهاية مازال الولد المصرى جواه ثورة مصرية راجعة قوية بعيون ثأرية من اللى باعوه وخانوه وكمان سحلوة واخدوا منه اخته واخوه حبيبتة واللى بيحبوه
المحاكمة المحاكمة العصابة لسه حاكمه ومحمد حسنى مبارك زى محمد مرسى مبارك ..وانتظروا الولد الثورى البسيط وهو راجع من جديد وبيصنع ثورتة ثورة على الجبان ثورة على اللى خان ثورة على العسكر ثورة على الاخوان انتظروا ابن مصر واقف قدام القصر بينادى ع الشهدا بينادى ع الثوار خلاص بقينا أحرار.
الله .............الوطن ............حق الشهداء .............الثورة
fawzy elrashidy
Nessun commento:
Posta un commento