جايلك ياميدانى ..راجعلك يابلدى بقالى حد فيكى ميدانى وأهلى اللى فى الميدان اللى مشفتهمش من زمان..اللى كان جنبى ومعرفش اسمه اللى كان بيرمى نفسه فى وش النار و يفتح صدرة للرصاص اللى بيستقبل الرصاصة مكانك تبقى الرصاصة جايه خايفة من صدر البطل ولو تعرف هى رايحة فى جسم مين والله والله كانت لفت ورجعت تانى للى بيضربها , لكنها من قلة احساسها بتيجى مش حاسه باى جرح غير انها خارجة من جبان رايحة تسكن جوه بطل ودمه يملى كفك وتبص فى عينه تلاقيها بتبتسم ونظراته بتقولك كمل مشوارنا خد حقى وحقك نص ثورة معناها مقبرة للثوار واخر كلمه قولتهالو وعينى بتدمع على الولد اللى بموته بتحيا البلد نام ياصاحبى يا أخويا يا ابنى يا أبويا يامسلم يامسيحى يامصرى احنا مكمليين ودمك اللى روى الارض هيطرح بطل زيك وهنأسس وطن يسمع شكاوى المظلومين هنأسس مصر مش خايفة من صوت الاذان ولا خايفة الكنائس تتبنى.. هناسس وطن غنى وطن يبقى فيه المصرى عزيز متصان وعمره ما يكون متهان
نازلين تحريرنا ميدانا ونرجع اللى فات يا أهالينا انضموا لينا .
مليونية 20 أبريل ..هى مليونية الرمق الأخير بل بداية ثورة مصر ثورة الشهداء ...ثورة الأحياء ثورة الجياع ...ثورة الكرامة ..
لكل مصرى بيحب البلد بجد..اتمنى من كل التيارات سواء اسلامية او يسارية او ثورية او ليبرالية.. أتمنى من كل ثائر هينزل الميدان الا ينساق وراء أى هتافات عدوانية لأى طائفة بمعنى ممكن يدخل بينا حد يغلط فى الاحزاب الاسلامية او اى تيار اسلامى حتى يقوم بالوقيعة أو حد يندس بين التيارات الاسلامية ويغلط فى الثواروالثورة احنا هننزل على قلب رجل واحد .
نازليين عشان الثورة وبس حق اللى مات والابطال المعتقلين ومحاكمة الفاسدين ودستور لكل المصريين وانهاء حكم العسكر وعيش حرية عدالة اجتماعية وعدم تأجيل الانتخابات وتطهير الداخلية والاعلام وهدم كل ماهو فاسد وبناء مصر الامن والامان
وياريت محدش يرفع اى شعارات حزبية أو طائفية او انتخابيه لاى من مرشحى الرئاسة مش عاوزين الثورة والميدان تتقلب لمعرض اعلانات والكل يكون نازل وعارف انه هيرجع ببداية ثورة وبداية مصر أو يرجع شهيد ..احنا مش نازلين رحلة ترفيهيه
ياريت نرجع لروح ال 18 يوم اللى خلعنا فيهم المخلوع ومازال النظام قائم احنا نازلين نزيل هذا النظام الفاسد افتكر اخوك وصاحبك اللى دمه لسه على هدومك .
لا سبيل لنا للخروج من قبضة حكم العسكر الا بالتوحيد فلنتوحد كشباب ثورة وينضم وحدتنا من يريد بقانون الميدان والثورة والثوار وليكن شعارنا أيد واحدة فى حب مصر ..وأمامكم فضاء الفيس بوك يتسع للخلاف والنقد ولكن فى الميدان كلنا أيد واحدة يامصريين..ضد الفساد لا أخوانى ولا سلفى ..لا ليبرالى ولا علمانى ...لا مسلم ولا مسيحى ..مصرى وبس
ورغم انتقادى الشديد للأخوان وكل تجار الدين والمصلحنجية الا اننى لابد أن أكون ملتزم بقانون الميدان وأدب الثوار وقدسية تلك الأرض المرتوية بدماء أطهر شباب الأرض
و أحب أقول للجان الاكترونية وحزب الكنبة اللى هيبدأو ينتشروا ويمارسوا هوياتهم فى شتميتنا أحب أقولهم ياللى بتشتم فى الثوار بطلبوا دايما انكم تشوفوا عكس اللى شايفاه عنينا
تاركين وقاحة الصورة و بتكلموا عن ما وراءها وكأنه واقع حتى ينام الضمير في ثبات عميق.. اصل دول قابضين .. اصل دول بلطجية .. يستاهلو هو ايه اللى نزلهم
استحلفكم بالله ان تراجعوا انفسكم فالشيخ الشهيد وطالب طب الشهيد ما كانوا يوما بلطجية ولا طلبوا يوما اجر ما فعلوه...راجعوا انفسكم فالحق بيٌن حتى لو انت شايفه ضعيف وواجب عليك الاعتراف بيه والضلال بيٌن حتى لو قوى وواجب عليك محاربته ....حتى لو بالكلمة ..
*وبقول لليائسين اللى عاوزين يفضلوا حاطين رؤسهم فى الرمال ويقولوا خلاص بلادكم ضاعت وانتهت أحب أقولهم بصوا للميدان هتلاقوه بيكتب أجمل بداية
*واللى بيقولوا علينا عملاء وخونة وقابضين وبلطجيه وماجورين خليهم براحتهم .. احنا بردوا مؤدبين ومسالمين
وأحب أقول للجميع انتبهوا مجلس العسكر اللى الثورة حماته مش هو اللى حماها انهم بيعملوا بشتى الطرق انهم يأجلوا الانتخابات أكبر وقت ممكن طول ماحسنى عايش وطول مالسه ليهم مصالح خايفين عليها , وهيحاولوا يطبطبوا على جماعتهم ويحلوا وزارة الجنزورى ويسيبوا الحرية والعدالة تشكل الحكومة بس فيه وزارات محدش هيقرب منها غير مجلس العسكر وعشان يحرموا المظاهرات بما لايخالف شرع الله وهتكون بحجة ان الدستور مش جاهز وان ولاد ابو اسماعيل عامليين قلق وفيه انفلات أمنى فيجب على كل مصرى بيحب البلاد الانتياه لان قوتهم بتستمد من ضعفنا ..اللى يحب مصر مايخونش مصر
الله...............الوطن..........................الثورة
fawzy elrashidy