لف وارجع تانى

بلدى الكل فاكر انه فاهم فيها وعارف كل حاجة فيها لحد خلاص مافككوها ,, عملوها لعبة وسابونا نتفرج عليها كانت فى أيد نظام فاسد ولما عملنا ثورة وقلنا خلاص رجعناها وجمعناها و هنبنوها ونعلوها وهتفنا فى كل حتة أيد واحدة أكتشفنا بعدها انها أيد واحدة آه لأن التانيه مقطوعة وحتى كمان الآيد الواحدة نسينا انها مش صباع واحد فيها خمس أصابع ومش كلهم زى بعضهم ,,فيها الصباع الاول قتل الثورة وسحلها وعراها ,, وفيها الصباع التانى سرطانى عاوز ينتشر فى كل الايد وياخدها لحسابه ونسى أنه صباع واحد فى الأيد ملهوش لازمة حتى لو كان أقواهم ,, وفيها الصباع التالت مع الرايجه شغال يبصم مع الكل ومهوش فاهم لكن قالك لازم أشارك حتى وان كنت بالبصمة ,, وفيها الصباع الرابع لا بيهش ولا بينش كمالة عدد لازم يكون موجود لاستكمال المنظر وبس وممكن يسند مع كل صباع شوية وخلاص ,, أما الصباع الخامس فهم شباب الثورة اللى بيحاول كل دوول قطعه من الأيد الواحد رغم انه هو اللى حركهم بعد شلل وجرى الدم فيهم بعدم عدم وفى الأخر جروا هم دمه على الأرض ,,يبقى منقلش أيد واحدة لان صوابعك مش زى بعضيها .
ومشكلتنا فى ان كل واحد فينا فى اتجاه كل واحد بيخطط ازاى ياخد التورتة كاملة ولو حد فكر ياخد حتة منها التانى بيفكر ازاى يسمهالوا ,, العسكر خايف على مصالحة المشتركة بين النظام السابق والنظام السابق الحالى , والحكومة جات محلل ومش عاوزة تطلق الوزارة آه نعم جواز المحلل الشرعى لكن كانوا شارطين عليه الطلاق
ومجلس الشعب واقف ع السلم مش عارف يطلع ولا ينزل ومحدش شايفه لكن الأعضاء شايفه نفسها وبس ,, ورغم اننا هنرجع نقطة الصفر من جديد فى حالة حل المجلس لان كل حاجة هتتفكك من تانى بمعنى اى عضو ماضى لمرشح فى الانتخابات هيكون باطل وكمان الاحزاب الممثلة على القوائم فى البرلمان اللى مرشحه عضو برده هيكون باطل وكمان اى عضو هيشارك فى صياغة الدستور هيكون باطل..
وهل تعلم ان فى حالة حل مجلس الشعب انه هيكون هناك فرصة لاسترجاع خيرت الشاطر حسب المادة 18 من الدستور وعلشان كدة حاسس ان البرلمان الأخوانى مش فى دماغه حل المجلس لانه بردو مستفيد,, بمعنى حالة صدور حكم بحل مجلس الشعب، حيث تنص المادة 18 على أنه "فى حالة خلو مكان أحد المرشحين خلال الفترة بين إعلان قائمة المرشحين وقبل انتهاء الاقتراع يتم الإعلان عن هذا الخلو وتأجيل الموعد المحدد للاقتراع مدة لا تزيد على 25 يوما ويكون لغير باقى المرشحين التقدم للترشيح خلال 7 أيام على الأكثر من التاريخ الذى أعلن فيه خلو المكان ويطبق نفس الحكم إذا كان الخلو خلال الفترة بين بدء إجراءات انتخابات الإعادة وقبل انتهاء "الاقتراع".
ووفقا لهذا النص فإن الانتخابات قد يتم تأجيلها لنحو 25 يوما فى حالة حل البرلمان، نظرا لخلو أماكن المرشحين الذين ترشحوا على قائمة أحزاب سياسية باعتبار أن هذه الأحزاب لم يعد لها ممثلون فى البرلمان، وبالتالى لا يحق لهم الترشح فى الانتخابات الرئاسية ويتبع ذلك إعادة فتح باب الترشح فى الانتخابات الرئاسية.
وطبعا أى قانون هيعملوا مجلس الشعب قبل الحل هيفعل فعلا ولا يعتبر باطلا وعشان كدة بيسعوا جاهدين تطبيق قانون العفو السياسى عن كل ما أدين فى جرائم سياسية فى عهد النظام السابق وبكدة هيرجع خيرت الشاطر يترشح فى ال 7 أيام فترة السماح لامتلاء الأماكن الخاليه من المرشحين بعد بطلان ترشيحهم ويتم الحشد لعمل توكيلات وطبعا واذا قيل لهم اعملوا توكيلات لعملوا
وفى النهاية أعتقد أنه سيناريو ممنهج ومعد مسبقا حتى نرجع نقطة البدايه ويتم تأجيل الانتخابات بسبب بطلان كل ماسبق قانونيا ودستوريا ,, مع احتياطى اختلاق الأزمات داخليا وخارجيا بسبب الأصابع الخفية أو اليد الأخرى التى تظهر فى الأزمات ,, من أزمة الجيزاوى والسعودية ,,وأولاد أبو أسماعيل ووزارة الدفاع واستخدام البلطجية فى كل المشاكل ,, وأزمة الجنزورى والكتاتنى ,, وطبعا غير أزمات الحياة المنسية من عيش وغاز وزبادة أسعار:
وكل دا لاننا لم نسمع لصوت الضمير وسمعنا فقط لصوت المصالح والكراسى المخلعة ومشينا بدون كاتلوج للبلد وبنحاول نجمعها بس كل واحد بدماغه ومصلحته
حاسس ان الشهدا بيجمعوا بعض وراجعيين من تانى , عرفوا اننا عاجزين ناخد حقهم فكروا هما يرجعوا ياخدو حقنا وحقهم ويرجعوا تانى
 البلد محتاجة كاتلوج أصلى وكاتلوج بلدى هو الضمير و الدستور اللى ممكن يجمعها بس يكون كاتلوج صح ميكنش كاتلوج تايوانى على يد مصرية. 
الثورة مستمرة حتى تفرض أحكامها
fawzy elrashidy