حضرت المنصة و غابت الثورة

فى جمعة لم الشمل تقريبا محدش لقى الشمل فلموا نفسهم وروحوا على البيت بعد رحلة مباركية عسكرية بديعية ,
ويحزننى جدا ان ثورة الكرامة بقت عبارة عن ثورة منصات وأغراض شخصية للمتحولون وأصحاب المصالح وفعلا أصبحوا عبأ على الثورة وبيزيدوا فى الحمولة على أكتاف الثوار الحقيقين , طول الأيام الأخيرة كنا بنادى بلم الشمل ومحدش يرفع شعارات غير علم مصر لان دى الحاجة الوحيدة اللى المفروض يجتمع الجميع حواليه ممكن أو مقبول ترفع علم سوريا على الأقل ولكن رأيت حاجات غريبة ومريبة أعلام سودة وبيضة وأعلام السعودية يعنى أيه دا .
ويعنى أيه 9 منصات فى ميدان واحد , عامليين زى جماعة عملت فرح ونصبوا المسارح وجابوا المعازيم وعواجيز الفرح وغاب العريس اللى هو الثائر الحق وغائبت العروسة اللى هى الثورة المغتصبة من عسكر وتجار دين وكمان مش موجودة غير فى الميكروفات وعلى ألسنة شاويش المسرح زى صفوت حجازى وكتير من المطبلاتية واللى بيأجروا عيونهم شوية تدمع على دم الشهداء لكسب تعاطف المعازيم فقط لكسب صوتهم فى الصندوق .
كان عندى رأى من الأول ان الاخوان والسلف ملهمش أمان لان كل’ يغنى على مرشحاه ومصلحتاه و ليلاه حضر الجميع وغابت الثورة.
وكمان العسكر والأخوان عاملين زى التليفون والجراب فى اى وقت التليفون يدخل فى الجراب حفاظا عليه وشويه يخرج يتهوى ويرجع تانى فهم الاثنان صنعوا من أجل بعض فعلا مصنوعين فكريا لان الفكر صناعة وانا لا أتطرق للخليقة لان خلقهم الله ولكن هم صنعوا افكارهم السمومية الملتويه وعندى اعتقاد قد يصل للتأكيد انهم بينزلوا بأمر من العسكر ومؤكد طبعا أمر المرشد وبينزلوا لاخماد روح الثورة وانتهاء اليوم عند المغرب حسب الاجندة المحطوطة ليهم وبينزلوا وكانها رحلة باتوبيساتهم بسندوتشاتهم ببابا غنوجهم بهتافتهم بشعاراتهم.

ويلا قومي يا ولية نعتصم بدل ماحنا قاعدين فاضين يوم الجمعة كدة خشوا البسوا يا عيال كلها كام ساعة و نرجع البيت و نروح شغلنا بكره

ان ما يفعله مؤيدي الاخوان هو تقليد أعمى للثوار بس بنكهة بديعية ...مقلدون متأخرون عبط

الوضع الحالى للثورة بيفكرنى بالظبط زى الفرقة الموسيقية فى فيلم تايتنك المركب بتغرق والمياه وصلت لدقون الناس والفرقة الموسيقية بتعزف ومش حاسين بأى حاجة لحد ماغرقت السفينة وغرق الجميع .

وفى النهاية ورغم كل دا لابد من استكمال الثورة ولكن مش هيكملها غير ثوارها الحقيقين الثوار اللى منهم من استشهد ومن أصيب ومن أعتقل ولكن متأكد ان كل دا بيشحن الثوار ثورة لان الثائر بيثور حتى على نفسه ياريت نعيش الواقع حتى لو مر لان الخيال لو حلو بيفضل خيال لكن مش بيوصل لنتيجة بلاش كلمة ايد واحدة دى لان الثوار بتقول ايد واحدة وعاوزين لم الشمل وايد واحدة  بس صوابعك مش زى بعضيها وبردو فى نفس الايد الواحدة

مش هيكمل الثورة غير الثائر الحق الناس اللى بتشتغل من أجل مصر من دكتور البرادعى وشباب 6 أبريل شباب اولتراس شباب كفايه وضباط 8 أبريل وباقى شرفاء الجيش و رجالة السويس وجميع رجالة وبنات مصر الاحرار ولاد مصر اللى بتحب البلد من قلوبهم بجد لخاطر البلد مش لخاطر شخص ولا جماعة

ومش مهم يوم جمعة فات لكن مش أخر يوم ولا الجمعة هى يوم الثورة فكل الأيام ثورة وكل ثورة ليها ثوارها اللى بيحموها

وطول ما فينا نفس يبئى لسه عايشين ويبئى فى أيدينا التغير ونوجه الدفة زى مااحنا عاوزين.

لو صوتنا ماهوش واصل ....طب فاصل ونواصل .....ونكمل ونثـــور

حارب لاخر امل..
صارع جيوش اليأس. ..اهدم بيوت الفشل....وانسى الشعور بالنقص....حاول اكيد تقدر.. .دى الفرصة ضوء اخضر.. .فتح السكك مرر....لحظة ثقة بالنفس

تحياتى لكل ثائرى مصر الحقيقين فقط 

                                                             زعلان عليكى مصر

   

شباب مصر الثائر راجعين

اللى سرق الثورة يرجعها

                      دى الحقيقة مفهاش كلام كلهم باعو مصر من اجل الكرسى وباعو الثورة والثوار وخونوهم وأحلو دمهم 

ونصيحتى لكل اصدقائى الثوارهيخونوكم كتير أوى الفترة الجايه اكتر من الاول وهيعملوا على اهباط عزيمتكم وهيعملوا اشاعات اكتر وهيحاولوا يضربوكم فى بعض ولكن انتبهوا جيدا اصدقائى الاعزاء

الله........................الوطن ..............الثورة

fawzy elrashidy